1 Korintus 8 - Jaji ma Su-sungi

Wo-waro ga'a nyengara 'i si'a'a nanga ioronongoḏu ngo-ngaku rimoi 'aḏi basono baraḏosa

¹ Nange-ne, ngoi mau to kanau mangale ngo-ngoromo ga'a sipula'a toma jou'ongu ma somoara. Tantu ḏua, 'oru ga'a ananga 'aḏi kanau 'i banari: “Ngene mo-moini rananga wo-waro.” Mada'a ma nyonyata 'oru ga'a ngene wo waro gena-ge 'i sidadi ngene nanga 'akala re sinyingara 'i momole. Siḏibo ḏi'i, nanga dadalara 'i sinamoto ngowa'a lelegu manga 'akala re sinyingara.

² 'A guna ḇato 'o mata'ajiri unanga 'o waro lai repe mangale 'oru ḇato; momongolo ua, unanga 'a waro pa'i ceka'a ua ḇato!

³ Mada'a na'o 'a guna ḇato 'o dadalara Ma Jou'ongu Madutu, unanga gena-ge Ma Jou'ongu Madutu 'u nana'o.

⁴ Sababu gena-ge mangale oromo ngo-ngoromo ga'a sipula'a re 'i dadi jou-jou toma jou'ongu ma somoara. Ngene wa waro mangale rimoi i'a mai ua jou'ongu ma somoara toma dungia ne, 'i 'ahu-'ahu. Re ngene wo waro ḏi'i, Ma Jou'ongu Madutu Unanga gena-ge pa'i matengo ḇato; lelegu 'i cua.

⁵ Tantu ḏua, 'age rema ngowa'a ga'a 'aḏi kanau 'age jou'ongu ma repe 'i 'ahu toma diwanga re toma tana'a.

⁶ Mada'a ra ngene, Ma Jou'ongu Madutu pa'i matengo ḇato, Unanga ngene nanga Ḇaḇa, ga'a 'O sidadi ḏua 'ori i'a mo-moini re ngene wo 'ahu di'a Unanga. 'Age Ma Jou pa'i matengo ḇato, Unanga gena-ge Yesus Kristus. Ma Jou'ongu Madutu 'o pula'a kuasa ra Unanga gena-ge, la 'O sidadi 'ori i'a mo-moini re ngene ḏi'i wo 'ahu sababu Unanga gena-ge.

⁷ Mada'a ngowa'a mo-moini ua ya sanga wo-waro gena-ge. 'Age taninga sigolona ngowa'a ga'a ma siḏa 'aḏi silamo'o re siḏubuso jou'ongu ma somoara singadolo 'orasa nange-ne. Dadi na'o ananga 'aḏi oromo ngo-ngoromo ga'a sipula'a ḏua toma jou'ongu ma somoara, ananga gena-ge 'aḏi basono baraḏosa. Ananga gena-ge manga 'akala re sinyingara ma dara 'i mereoso moju, sababu ya sanga wo-waro ua mangale jou'ongu ma somoara 'i 'ahu-'ahu ua.

⁸ Momongolo ua, ngo-ngoromo 'i sigasa ua ngene lebe co-cori ra Ma Jou'ongu Madutu: Na'o ngene wa oromo ngo-ngoromo gena-ge si'utungu ngene ua. Siḏibo ḏi'i, na'o ngene wa oromo ngo-ngoromo gena-ge ua, mai sirugi ngene ua.

⁹ Kalaha ngini ni oromo ngo-ngoromo ga'a sipula'a ḏua toma jou'ongu ma somoara sababu ni sanga wo-waro ḏua mangale jou'ongu ma somoara 'i 'ahu-'ahu ua; ngini balasu ni ma'istiari mangale ninga ioronongoḏu ngo-ngaku rimoi ga'a manga 'akala re sinyingara ma dara 'i mereoso moju, awa 'aḏi oromo ngo-ngoromo gena-ge re 'aḏi basono baraḏosa.

¹⁰ Ngoi 'ari maksudu so'o ne: Si'ade-'ade ngini ga'a sanga wo-waro gena-ge, ni majoreke ni oromo ngo-ngoromo ga'a sipula'a toma jou'ongu ma somoara. Ḏua ioronongoḏu matengo ngo-ngaku rimoi ga'a 'akala re sinyingara ma dara 'i mereoso moju 'o oḏi'i ngini ni oromo ngo-ngoromo gena-ge toma wala ma dara ga'a ngowa'a 'aḏi silamo'o re siḏubuso jou'ongu ma somoara. Ḏua ioronongoḏu ngo-ngaku rimoi gena-ge 'ai 'akala re sinyingara 'i dadi nau'u di'a 'o oromo ngo-ngoromo gena-ge ḏi'i.

¹¹ Ma ḏo-ḏogumu tala, ngini ga'a na sanga wo-waro ḏua, ni si'a'a ninga ioronongoḏu ngo-ngaku rimoi 'ai ngo-ngaku 'i dadi cira. Re 'a Kristus 'o sengene di'a unanga ḏi'i!

¹² Dadi wakutu ngini ni 'a'a ḏosa so'o gena taninga ioronongoḏu ngo-ngaku rimoi singadolo unanga 'o oromo ngo-ngoromo ga'a 'o ta'ajiri Ma Jou'ongu Madutu 'a wosono; ngini ni baraḏosa ra Kristus!

¹³ Sababu gena-ge, na'o ngo-ngoromo 'i si'a'a 'ari ioronongoḏu ngo-ngaku rimoi 'o eta'a toma ḏosa, ngoi to oromo haiwani ma la-la'eme riwara. Awa-awa unanga 'o baraḏosa sababu ngoi.