1 Korintus 7 - Jaji ma Su-sungi

So-sano mangale molo'ara

¹ Ioronongoḏu ngo-ngaku rimoi 'oru ga'a ngini ni lefo taninga surata ma dara mangale molo'ara ma 'atoranga, nange-ne ngoi ta siajele ra ngini: Na'o na-nau'u matengo 'o molo'ara ua, gena-ge 'i rousu.

² Mada'a 'age rema ngowa'a manga repe 'aḏi sudala. Sababu gena-ge, na-nau'u matengo re matengo balasu remanga were'a, re we-were'a matengo re matengo balasu remanga nau'u.

³ Nau'u balasu otu malomu tai were'a, re were'a balasu otu malomu tami nau'u. Ngowa'a ga'a raḏi molo'ara enanga ma duhu balasu so'o gena-ge.

⁴ Sababu were'a 'ami lese di'a pa'i munanga masiretene ḇato ua, mada'a 'ami lese di'a 'ami nau'u ḏi'i. So'o gena-ge ḏi'i, nau'u 'ai lese di'a pa'i unanga masiretene ḇato ua, mada'a 'ai lese di'a 'ai were'a ḏi'i.

⁵ Awa ni ma'u ki-kiḏanga matengo re matengo bae nau'u toma were'a, bae were'a toma nau'u. Nyengara ḇato na'o ngini nga muḏiḏi ni ma'u fakati ni otu malomu ua, dadi ni manyiata ra Ma Jou'ongu Madutu. Mada'a ma 'orasa ti'ara awa! Togumu i'a ngini ni otu malomu ḏi'i. Dadi awa-awa ni sanga bo-baja toma 'Iblisi sababu ngini nga'unu ua ni manahana ninga lese ma nyafusu.

⁶ Ngoi to kanau so'o gena-ge di'a parenta ua mada'a to ajele ma ngale so'o ne: Na'o ngini nga muḏiḏi ni ma'u mafakati ni otu malomu ua di'a ti'ara awa; mete'e ngoi, gena-ge nyengara.

⁷ Momongolo ua, ngoi lebe sanangi na'o na-nau'u mo-moini 'aḏi ma tero sa'olo ngoi, kama molo'ara ua. Mada'a Ma Jou'ongu Madutu masiretene 'O pula'a matengo re matengo remanga cocatu masiretene; matengo re matengo manga cocatu 'i ma tero ua: Mamuni'a sanga cocatu molo'ara, mamuni'a sanga cocatu molo'ara ua.

⁸ Toma ngowa'a ga'a molo'ara nyangu re toma were'a ga'a raḏi balo, ngoi 'ari duga re domolo so'o ne: Na'o ni nyengara, jobilaha ni molo'ara ua, ma tero ngoi.

⁹ Mada'a na'o ngini nga'unu ua ni manahana ninga nyafusu; lebe bae ni molo'ara. Sababu jobilaha ni molo'ara reo ni molo'ara ua, kara nga'unu ua ni manahana ninga nyafusu.

¹⁰ Ngini ga'a reni molo'ara, 'isene ngoi 'ari parenta nena-ne (ra ngoi ino ua, mada'a ra Ma Jou tala): We-were'a ga'a remo molo'ara, awa ma sisoi'i tala 'ami nau'u.

¹¹ Mada'a na'o we-were'a matengo remo sisoi'i tala 'ami nau'u, balasu mo dadunu maḏibo tami nau'u bolo molo'ara rawara. So'o gena-ge ḏi'i, ngini nau'u, awa ni ma'u to-tola'a taninga were'a.

¹² Ngini ioronongoḏu ngo-ngaku rimoi ma lelegu, ngoi to ajele ma ngale ra ngini (ra ngoi ino, mada'a ra Ma Jou tala ua): Na'o nau'u matengo ga'a ngowa'a ngaku Yesus, ro molo'ara were'a ga'a ngaku Yesus ua re were'a gena-ge mo nyengara 'ahu mamete'e ra unanga moju, nau'u gena-ge awa 'o ma'u to-tola'a tai were'a gena-ge.

¹³ Re na'o were'a matengo ga'a ngowa'a ngaku Yesus, remo molo'ara nau'u ga'a 'o ngaku Yesus ua re unanga 'o nyengara 'ahu mamete'e ra munanga moju, were'a gena-ge awa mo ma'u to-tola'a tami nau'u.

¹⁴ Ma sababu nena-ne: Ma Jou'ongu Madutu 'o siwola i'a nau'u ga'a ngaku Yesus ua re 'U jaga ma tero sa'olo unanga gena-ge 'Ai ngowa'a. Ma Jou'ongu Madutu 'o si'a'a gena-ge sababu na-nau'u unanga ro molo'ara were'a ga'a ngowa'a ngaku Yesus. So'o gena-ge ḏi'i, Ma Jou'ongu Madutu 'o siwola i'a were'a ga'a ngaku Yesus ua re 'O jaga ma tero sa'olo munanga gena-ge 'Ai ngowa'a sababu munanga remo molo'ara nau'u ga'a ngowa'a ngaku Yesus. Na'o so'o gena-ge ua, ananga manga ngowa'a ma tero sa'olo ngowa'a faja. Momongolo ua, ngowa 'olo gena-ge Ma Jou'ongu Madutu 'a siwola i'a ananga, re Unanga ya'u jaga ananga gena-ge ma tero sa'olo 'Ai ngowa-ngowa'a ḏi'i.

¹⁵ Mada'a na'o ngowa'a ga'a 'aḏi ngaku Yesus nyangu, ananga mau 'aḏi ma'u to-tola'a nau'u ga'a ngowa'a ngaku Yesus, bolo were'a ga'a ngowa'a ngaku Yesus; ngini na'u sieanga i'a ananga ḇato. Nau'u bolo were'a ga'a ngowa'a ngaku Yesus balasu 'aḏi simau-mau awa manga were'a bolo nau'u ga'a ngaku Yesus ua 'aḏi 'ahu mamete'e ra ananga. Sababu Ma Jou'ongu Madutu 'o mau manga 'ahu tamanga ngitu re ngale 'i dame.

¹⁶ Ngene wa waro ua: Awa-awa na'o ngini ngowa'a ngaku Yesus ni ma'u to-tola'a awa ninga nau'u bolo were'a ga'a 'aḏi ngaku Yesus nyangu, ḏuanga i'a ngini ḏa ni sigasa ananga toma salamata.

'Ahu ma tero sa'olo wakutu Ma Jou'ongu Madutu nu'u 'aro'o

¹⁷ Mada'a ngoi to pula'a 'ari parenta toma jama'ata mo-moini so'o ne: Ngini matengo re matengo 'oru ḇato ninga ḏe-ḏegoro toma dungia wakutu Unanga 'o 'aro'o ngini di'a ni dadi 'Ai ngowa-ngowa'a, awa na ngali ḏe-ḏegoro gena-ge sababu Ma Jou'ongu Madutu ra sitantukanga di'a ngini.

¹⁸ Si'ade-'ade, na'o matengo ro sanga suna wakutu Ma Jou'ongu Madutu 'o 'aro'o unanga di'a 'o dadi 'Ai ngowa'a, awa unanga gena-ge 'a kutale singi-ngiranga didina'o gena-ge. So'o gena ḏi'i, na'o matengo 'o sanga suna ua wakutu Ma Jou'ongu Madutu 'o 'aro'o di'a 'o dadi 'Ai ngowa'a, awa unanga gena-ge 'o masuna.

¹⁹ Sababu mete'e bolo mete'e ua suna ma 'atoranga; fara ḏiḏi, gena-ge 'i 'oru ua. Mete'e Ma Jou'ongu Madutu 'ai parenta, gena-ge lebe ma la-lamo'o i'a.

²⁰ Dadi matengo re matengo ninga 'ahu nange-ne balasu ma tero sa'olo ngini ninga 'ahu wakutu Ma Jou'ongu Madutu 'o 'aro'o ngini di'a ni dadi 'Ai ngowa-ngowa'a.

²¹ Si'ade-'ade i'a, na'o ngini ngowa'a budaka wakutu ngini sanga 'aro'o ni dadi Unanga 'ai ngowa-ngowa'a, awa ngini ninga 'akala re sinyingara basono kangela. Mada'a na'o ngini ni sanga donga di'a ni dadi ngowa'a bebasa, nyengara na pake donga gena-ge.

²² Sababu na'o ngini ngowa'a budaka wakutu ni sanga 'aro'o ni dadi Unanga 'ai ngowa-ngowa'a, ngini reni dadi ngowa'a bebasa toma ḏosa ma kuasa. So'o gena-ge ḏi'i, ngini ngowa'a bebasa wakutu ni sanga 'aro'o ni dadi Unanga 'ai ngowa-ngowa'a, ngini reni dadi Kristus 'ai budaka.

²³ Ma Jou Yesus ro tibo ngini re ra fangu ḏua. Sababu gena-ge, awa ni sidoa'a ninga diri di'a ni dadi manusia manga budaka.

²⁴ Dadi ioronongoḏu ngo-ngaku rimoi, 'oru ḇato ninga ḏe-ḏegoro toma dungia wakutu Ma Jou'ongu Madutu 'o 'aro'o ngini di'a ni dadi 'Ai ngowa-ngowa'a, awa ngini na ngali.

Do-doto'o di'a ngowa'a molo'ara nyangu

²⁵ Ngoi nange-ne mau to kanau mangale ngowa'a 'aḏi molo'ara nyangu. Kalaha ngoi to sanga parenta ua ra Ma Jou mangale gena-ge, mada'a Ma Jou ro sijumu 'Ai 'akala re sinyingara ma la-la ra ngoi: Unanga 'O riono ngoi di'a to dadi ngowa'a ga'a manusia nyengara 'aḏi ngaku. Sababu gena-ge, ngoi to ajele ma ngale nena-ne ra ngini:

²⁶ Ngene wa waro nanga 'ahu toma 'orasa nange-ne wo basono kangela. Sababu gena-ge, ngoi to fikiri jobilaha wo molo'ara awa.

²⁷ Na'o ngini reni molo'ara, awa ni disa ngo'omo di'a ni ma'u to-tola'a taninga were'a gena-ge. Na'o ngini ni molo'ara nyangu, ni disa were'a rawara.

²⁸ Mada'a na'o na-nau'u matengo ga'a ni molo'ara nyangu, ḏuanga i'a unanga 'o molo'ara, gena-ge 'i dadi ḏosa ua. So'o gena ḏi'i na'o mosolese matengo munanga mo molo'ara, gena-ge 'i dadi ḏosa ua. Mada'a ananga ga'a raḏi molo'ara, ḏuanga i'a 'aḏi sanga dola'aku ma repe, re ngoi to mau dola'aku gena-ge silalo'o ra ngini.

²⁹ Ioronongoḏu ngo-ngaku rimoi, ngoi 'ari maksudu so'o ne: Ngene nanga donga sa'i 'i cua toma dungia nena-ne. Sababu gena-ge, mulaingi nange-ne re si'a 'a guna ḇato rai were'a ḏua, awa unanga pa'i 'o fikiri tau-taunu mangale 'ai were'a ḇato.

³⁰ Ngowa'a ga'a 'aḏi rerese ma gaḏi sababu manga 'akala re sinyingara kangela, awa ananga gena-ge pa'i 'aḏi fikiri tau-taunu mangale manga kangela ḇato. Ngowa'a ga'a 'aḏi maroanga, awa ananga gena-ge pa'i 'aḏi fikiri tau-taunu mangale manga roanga ḇato. Ngowa'a ga'a 'aḏi tibo 'ori i'a rimoi, awa ananga gena-ge pa'i 'aḏi fikiri tau-taunu mangale 'ori i'a gena-ge.

³¹ Re ngowa'a ga'a fikiri mangale munara pa'i dungia nena-ne ḇato, awa 'aḏi pula'a manga ngo-nganono pa'i toma harata dungia nena-ne ḇato. Sababu dungia rema dara mo-moini nena-ne ti'ara riwara, enanga 'i iranga.

³² Ngoi to nyafusu, awa ngini ni mafikiri lai repe mangale ninga 'ahu. Na-nau'u ga'a kamanga were'a ua, ananga gena-ge nyengara 'aḏi mafikiri mangale pa'i Ma Jou 'ai mau-mau ḇato: Ma duhu sa'olo 'aḏi sisanangi Ma Jou 'ai 'akala re sinyingara.

³³ Mada'a na-nau'u ga'a remanga were'a 'aḏi mafikiri lai repe mangale manga 'ahu ḏi'i: Ma duhu sa'olo 'aḏi sisanangi manga were'a 'ami 'akala re sinyingara;

³⁴ singadolo ananga manga fikirana 'i sasalanga: ananga mau 'aḏi sisanangi Ma Jou'ongu Madutu re manga were'a ḏi'i. We-were'a kamanga nau'u ua bolo mosolese molo'ara ua, ananga gena-ge nyengara 'aḏi mafikiri pa'i Ma Jou 'ai mau-mau ḇato: Ma duhu sa'olo 'aḏi de-de'oso ti-tiai Ma Jou remanga lese re remanga 'akala re sinyingara. Mada'a we-were'a ga'a remanga nau'u, ananga 'aḏi mafikiri lai repe mangale manga 'ahu ḏi'i: Ma duhu sa'olo 'aḏi sisanangi 'ami nau'u 'ai 'akala re sinyingara.

³⁵ Ngoi to lefo surata so'o gena-ge di'a ngini masiretene ninga la. Ngoi 'ari maksudu ua to simaha ua ni molo'ara. Siḏibo ḏi'i 'ari maksudu ngini ni 'ahu la-la taninga de'oso re ḏegoro ga'a patasa di'a ngowa'a ngaku Yesus. Dadi ninga 'akala re sinyingara 'i sasalanga ua, mada'a pa'i ra Ma Jou ḇato.

³⁶ Na'o na-nau'u matengo 'o basono 'ai de'oso re ḏegoro 'i patasa ua toma we-were'a matengo ga'a ro sijaji di'a ma'u molo'ara, re we-were'a gena-ge remo bi-biri'i re 'o mau molo'ara munanga gena-ge, awa ngini ni dola'aku. Ananga nyengara ma'u molo'ara; gena-ge ḏosa ua.

³⁷ Mada'a na-nau'u ga'a 'o nga'unu 'o manahana 'ai lese ma nyafusu re 'o sitantukanga ḏua 'o molo'ara ua we-were'a ga'a ro sijaji pasala ḏua. Sidogo ḏi'i, unanga ngowa'a 'u simau-mau ua, mada'a 'ai putusanga gena-ge pa'i mete'e unanga 'ai mau masiretene. Unanga gena-ge 'o 'a'a 'ori i'a ma la-la.

³⁸ Dadi na-nau'u ga'a molo'ara we-were'a gena-ge, unanga 'ai ga'a la-la. Mada'a na-nau'u ga'a molo'ara ua were'a gena-ge, unanga 'ai ga'a lebe la-la.

³⁹ Were'a ga'a rami nau'u mo makole tami nau'u singadolo 'ami nau'u 'o sengene. Na'o 'ami nau'u ro sengene, munanga mo bebasa di'a munanga mo molo'ara moju mete'e 'ami mau, mada'a balasu 'ami nau'u gena-ge ngowa'a ngaku Yesus.

⁴⁰ Mada'a munanga mo bara'utungu masala na'o mo dadunu mo molo'ara riwara. 'Oru ga'a ngoi to kanau gena-ge ngoi 'ari 'akala ma sanga mada'a ta sibasono tala reo kuasa toma Ngagara 'Ofi-'Ofi ino, ngoi to kanau so'o gena-ge.