1 Korintus 6 - Jaji ma Su-sungi

Awa ni kalaki ioronongoḏu ngo-ngaku rimoi toma juruhakimi

¹ Ngini ngowa'a ngaku Yesus, i'a sa'olo na'o taninga sigolona ni ma'u hali, ni nau'u masala sigasa toma juruhakimi ga'a ngaku Yesus ua! I'a sa'olo ngini ni golo'o ua toma jama'ata di'a ananga ya sidiai hali gena-ge!

² Ngini ni waro bolo ua, Ma Jou'ongu Madutu 'ai 'umata ananga sanga watasa di'a ḏuanga i'a sijuruhakimi dungia nena-ne?! Dadi, na'o ngini ḏuanga i'a sijuruhakimi dungia nena-ne, tantu ḏua ngini nga'unu ni sidiai ninga hali ga'a mapake ua!

³ Ngini ni waro ḏi'i bolo ua, ngene ḏuanga i'a wo sijuruhakimi mala'ekata! Dadi tantu ḏua ngini nga'unu ḏi'i sijuruhakimi pa'i ninga hali wange moi-wange moi!

⁴ Sababu gena-ge, na'o taninga sigolona ni ma'u hali, i'a sa'olo ngini ni nau'u di'a tagi kalaki toma juruhakimi ga'a ngaku Yesus ua?! Kalaha kai ḏe-ḏegoro ua, 'a guna ḇato toma jama'ata nga'unu 'o sidiai ninga hali gena-ge!

⁵ Ngoi to kanau so'o gena-ge, la to sipula'a mara'a ngini! Sanga ua, matengo i'a mai ua ioronongoḏu ngo-ngaku rimoi, ga'a rai 'akala ma soro'unu ua di'a 'a sijuruhakimi ninga hali!

⁶ Mada'a siḏibo ḏi'i, ioronongoḏu ngo-ngaku rimoi 'o tagi toma juruhakimi ga'a 'o ngaku Yesus ua di'a 'o kalaki ioronongoḏu ngo-ngaku rimoi lelegu!

⁷ Ra Ma Jou'ongu Madutu 'ai momina, ngini mode-mode'e reni iranga taninga hali gena-ge na'o ngini ni tagi kalaki toma juruhakimi ga'a ngaku Yesus ua. Sababu de'oso re ḏegoro gena-ge 'i patasa ua di'a ngowa'a ngaku Yesus! Jobilaha, ngini ni sanga rugi, bolo ni sanga 'adili ua!

⁸ Siḏibo ḏi'i, ngini masiretene ni sirugi ngowa'a lelegu bolo ngowa'a lelegu sanga 'adili ua, sababu ngini. Sidogo ḏi'i, ngini ni madaga'a so'o gena-ge taninga ioronongoḏu ngo-ngaku rimoi!

⁹ Ngini ni waro bolo ua mangale ngowa-ngowa'a ga'a mete'e ua Ma Jou'ongu Madutu 'ai 'akala ma mau, ananga gena-ge 'aḏi sanga nyo-nyoimi ua ra Ma Jou'ongu Madutu 'ai ngowa-ngowa'a?! Awa ngowa'a nu'u sihaga ngini: Ngowa-ngowa'a ga'a 'aḏi sudala, 'aḏi silamo'o re siḏubuso jou'ongu ma somoara, 'aḏi tinikai, na-nau'u su-sudala, ma'u nakala na-nau'u re na-nau'u, ga'a gena-ge pa'i sipula'a mara'a na-nau'u ḇato,

¹⁰ ngowa'a to-tori'i, ngowa'a nyafusu lamo'o woḏi, ma'eto-'etolo, 'aḏi jajaha demo, oromo ngowa'a lelegu manga galasau'u ma duduala. Ngowa'a mo-moini gena-ge ḏuanga i'a 'aḏi osama nyo-nyoimi ua ra Ma Jou'ongu Madutu 'ai ngowa-ngowa'a.

¹¹ 'Au nga'ene, 'age mamuni'a taninga sigolona ga'a manga de'oso re ḏegoro so'o gena-ge ḏi'i. Mada'a 'orasa nange-ne Ma Jou'ongu Madutu 'o si'ofi ngini taninga ḏosa mo-moini re Unanga 'o sidadi ngini sa'olo 'Ai ngowa'a 'ofi-'ofi re ngowa'a kamanga sala ua ra Unanga 'ai momina. Mo-moini gena-ge sababu ngini reni marimoi ra Ma Jou Yesus Kristus re sababu ḏi'i Ma Ngagara 'Ofi-'Ofi tananga Jou'ongu Madutu tala.

Maki-kiḏanga toma su-sudala

¹² 'Age ngowa'a mamuni'a ga'a 'aḏi kanau, “Ngoi nyengara madaga'a 'oru ḇato.” Mada'a ngoi to kanau, “Mo-moini ua rema faeda.” 'Age mamuni'a ga'a 'aḏi kanau ḏi'i, “Ngoi nyengara madaga'a 'oru ḇato.” Mada'a ngoi to kanau, “Ngoi to oḏu'u sipula'a 'ari diri 'i dadi budaka toma 'oru ḇato.”

¹³ 'Age ḏi'i rema ngowa'a lelegu ga'a 'aḏi kanau, “Ngo-ngoromo di'a 'i osama toma po'olo re po'olo di'a ngo-ngoromo ma ngi'i.” Mada'a fara ḏiḏi gena-ge Ma Jou'ongu Madutu 'a singi-ngiranga na'o ngene wo sengene. Ngene nanga lese awa wa sipake di'a wo sudala, mada'a nanga lese wa sipake di'a wo de-de'oso Ma Jou'ongu Madutu re Unanga gena-ge 'a parenta nanga lese.

¹⁴ Ma Jou'ongu Madutu dadunu 'o si'ahu Ma Jou Yesus moju tai sengene Rai kuasa. So'o gena-ge ḏi'i, Ma Jou'ongu Madutu dadunu 'o si'ahu ngene tananga sengene Rai kuasa.

¹⁵ Ioronongoḏu ngo-ngaku rimoi, ngini ni waro ua mangale ninga lese gena-ge 'i marimoi ra Kristus 'ai lese ḏi'i. Dadi, i'a sa'olo ni sipake di'a ni otu toma we-were'a su-sudala?! Na'o so'o gena-ge, ngini ninga lese ga'a marimoi ra Kristus, ni sirimoi toma we-were'a su-sudala 'ami lese! 'A'a so'o gena-ge awa!

¹⁶ Ngini ni waro bolo ua, na'o matengo i'a 'o otu toma we-were'a su-sudala, unanga 'o marimoi rami lese?! Sababu toma Boku 'Ofi-'Ofi 'i silefo so'o ne: “Ananga nga muḏiḏi gena-ge 'aḏi dadi rimoi.”

¹⁷ Mada'a matengo i'a ga'a 'o marimoi ra Ma Jou Yesus, unanga 'o marimoi ra Ma Jou 'ai Roh ga'a Ma Ngagara 'Ofi-'Ofi.

¹⁸ Ni maki-kiḏanga toma su-sudala! Sababu ḏosa mo-moini ga'a ngene wo 'a'a, pa'i sudala ḇato si'a'a ngene nanga lese 'i baraḏosa tananga lese masiretene.

¹⁹ Ngini ni waro bolo ua mangale ninga lese 'i dadi Ma Ngagara 'Ofi-'Ofi ma Wala?! Enanga gena-ge ga'a Ma Jou'ongu Madutu masiretene 'O pula'a ra ngini 'i tegoro taninga lese. Dadi, ninga lese ta ngini ua mada'a ta Unanga,

²⁰ sababu Ma Jou'ongu Madutu ra tuusu re ra fangu di'a ngini. Sababu gena-ge, ngini ni pake ninga lese di'a silamo'o Ma Jou'ongu Madutu.