1 Korintus 5 - Jaji ma Su-sungi

Su-sudala toma jama'ata ma dara

¹ Ngowa-ngowa'a raḏi siajele ḏua ra ngoi mangale madaga'a 'ori i'a ma faja tani jama'ata ma dara! 'Age rema na-nau'u matengo ga'a ma'u sala rema ngina bau. Ngowa-ngowa'a ga'a 'aḏi ngaku Yesus ua mai 'aḏi 'a'a so'o gena ua.

² Kalaha so'o gena ngini ni momole moju! Momongolo ua ninga 'akala re sinyingara balasu 'i kangela re nu sisupu unanga gena-ge taninga sigolona sababu 'ai ga'a so'o gena-ge.

³ Mode'e, 'age ngoi to ma'u kiḏanga ra ngini. Mada'a tari 'akala re sinyingara ma dara ta sibasono ngoi 'age ra ngini toma limau Korintus. Sababu gena-ge, ngoi reta putusu mangale ngene balasu wo sihukumu unanga ga'a 'o madiga'a ḏosa so'o gena-ge.

⁴ Dadi wakutu ngini ni malomu renanga Jou Yesus 'ai kuasa, ngini ni fikiri taninga 'akala re sinyingara ma dara ngoi ḏi'i 'age ra ngini.

⁵ Re ngini balasu ni sisupu ngowa'a matengo gena-ge ga'a madiga'a ḏosa taninga sigolona re simaha awa unanga 'o marimoi ra ngini. Gena-ge 'i ma tero sa'olo ngene wo sidoa'a unanga toma 'Iblisi. Dadi 'Iblisi 'i sisangisara 'ai lese, la ḏuanga i'a 'o maḏibo toma ngo'omo boloto. Na'o so'o gena, Ma Jou Yesus ḏuanga i'a 'o sisalamata unanga 'ai nyawa wakutu Unanga dadunu 'o sapolo moju.

⁶ Rousu ua, ngini ni momole. Ngini ni waro bolo ua 'ade-'ade ma betongo so'o ne: “Ragi pa'i ceka'a ua sikaluba toma tarigu, mada'a tarigu mo-moini 'i ramasa?!”

⁷ Sababu gena-ge, ma tero sa'olo ngowa'a Yahudi sisupu ragi tamanga wala di'a Paskah ma Wangere, ngini balasu ni upa'a ninga ragi ma siḏa. 'Ade-'ade gena-ge ma ngale: Ngini balasu ni sisupu ngowa'a ga'a 'o madiga'a ḏosa so'o gena-ge. Na'o ngini ni 'a'a so'o gena, ngini ni dadi ngowa'a su-sungi ga'a 'ofi-'ofi; mode-mode'e ngini kaninga ragi ua. Re ngini ni dadi 'ofi-'ofi ḏua sababu Kristus 'o dadi doba ma ngowa di'a jou-jou toma Paskah ma Wangere.

⁸ Sababu gena-ge, ino ngene wo silamo'o Paskah ma Wangere so'o nena-ne: Ngene balasu ma tero sa'olo ngowa'a Yahudi ga'a 'aḏi 'omo ua roti rema ragi. 'Aḏe-'aḏe gena-ge ma ngale: Ra ngene nanga 'ahu nena-ne balasu wo madaga'a awa 'ori i'a ma jira bolo nanga 'ulungu ma jira. Mada'a ra ngene nanga 'ahu nena-ne ngene balasu wo madaga'a 'ori i'a ma la-la re nanga 'akala re sinyingara 'i ba-banari, ma tero sa'olo ngene wo 'omo roti kama ragi ua.

⁹ Ngoi 'ari surata toma ḏu-ḏuḏunu, ngoi to siajele ra ngini awa ngini ni ma'u supu re osama toma ngowa'a ga'a su-sudala.

¹⁰ Kalaha ngoi to kanau so'o gena, ngoi 'ari maksudu ua ngini ni ma'u supu re osama toma ngowa'a ga'a 'aḏi ngaku Yesus ua: Ngowa'a ga'a su-sudala bolo ngowa'a ga'a nyafusu lamo'o woḏi, oromo ngowa'a manga galasau'u ma duduala bolo 'aḏi silamo'o re siḏubuso jou'ongu ma somoara. Na'o ngoi 'ari maksudu ngini ni ma'u supu re osama toma ngowa-ngowa'a so'o gena-ge, tantu ḏua ngini balasu ni sisoi'i tala dungia nena-ne!

¹¹ Ngoi 'ari maksudu so'o ne: Ngini balasu ni ma'u supu re osama awa toma ngowa'a ga'a 'aḏi mangaku ananga masiretene ngowa'a ngaku Yesus, mada'a ananga 'aḏi su-sudala bolo 'aḏi nyafusu lamo'o woḏi, 'aḏi silamo'o re siḏubuso jou'ongu ma somoara bolo 'aḏi si'u'ua ngowa'a, 'aḏi ka'e ma'eto-'etolo bolo oromo ngowa'a manga galasau'u ma duduala. Ngowa-ngowa'a gena-ge, ngini na'u tegoro oromo mamete'e mai awa.

^12-13 Ngowa-ngowa'a ga'a 'aḏi ngaku Yesus ua, ngoi 'ari kuasa 'i cua di'a ta'u sihukumu ananga. Pa'i Ma Jou'ongu Madutu ḇato, Unanga rai kuasa di'a sihukumu ananga. Mada'a ngini ga'a ngowa'a ngaku Yesus, ngini masiretene reninga haku di'a sihukumu jama'ata ga'a 'aḏi 'a'a ḏosa. Ma tero sa'olo 'i silefo ḏua toma Boku 'Ofi-'Ofi ma dara enanga ma betongo so'o ne: “Ngini na'u sisupu ngowa'a ma jira taninga sigolona.”