1 Korintus 2 - Jaji ma Su-sungi

Habari mangale Yesus 'ai se-sengene toma salib

¹ Ioronongoḏu ngo-ngaku rimoi, 'elingi wakutu ngoi to sapolo to tutumu ngini re to singadolo habari ra Ma Jou'ongu Madutu ino ra ngini: Ngoi ta pake demo-demo mete'e 'ari pahe bolo 'akala ma soro'unu ua.

² Tari 'akala re sinyingara ma dara, ngoi reta sitatapu tala, ma di'ara sa'olo ngoi to tegoro taninga sigolona, ngoi to kanau 'ori i'a ma lelegu ua; pa'i mangale Yesus Kristus ga'a ngowa'a 'U sisalib.

³ Wakutu ngoi to tegoro marimoi ra ngini, ta sibasono tala 'ari lese 'i lamahana, re ngoi to mojongo singadolo 'ari lese 'i terewete.

⁴ Habari ga'a ngoi ta singadolo ra ngini, to pake demo ua ga'a manusia 'aḏi ta'ajiri 'akala soro'unu di'a to baja ngini, la ni ngaku ngoi. Mada'a ngoi ta singadolo mete'e Ma Jou'ongu Madutu 'ai Ngagara 'Ofi-'Ofi ma kuasa. Ma Jou'ongu Madutu 'o pula'a kuasa gena-ge sa'olo bukiti rimoi mangale ngoi 'ari babata re 'ari do-doto'o 'i banari.

⁵ Dadi ngini reni ngaku Kristus gena-ge mete'e ua manusia manga 'akala ma soro'unu, mada'a sababu kuasa ra Ma Jou'ongu Madutu tala.

Ma Jou'ongu Madutu 'ai 'akala ma soro'unu

⁶ Kalaha ngoi 'ari demo-demo mete'e 'ari pahe ua di'a to baja ngini, la ni ngaku ngoi, mada'a ngoi to kanau mangale 'akala soro'unu ra ngini ga'a ninga ngo-ngaku lai te'e. Mada'a 'akala soro'unu gena-ge mete'e manusia manga 'akala ma soro'unu ua bolo 'akala soro'unu ra guna ḇato ua ga'a remanga kuasa toma dungia nena-ne. Toma wangere rimoi toma biono i'a manusia manga kuasa gena-ge 'i iranga.

⁷ Ngomi mi kanau mangale 'akala soro'unu da'u ra Ma Jou'ongu Madutu tala, ga'a 'ua re 'au wali manusia ya waro ua. Mada'a dungia 'i dadi nyangu, Ma Jou'ongu Madutu ra sidodahe pasala ḏua, la ngene sanga barakati kasingado-ngadolo i'a.

⁸ Matengo i'a mai ua, toma ngowa'a ga'a remanga kuasa manga sigolona, ananga ya waro mangale 'akala soro'unu gena-ge. Sababu, na'o ananga ya waro, tantu ananga 'U salib ua nanga Jou, Unanga ga'a 'O mulia.

⁹ Siḏibo ḏi'i, gena-ge 'i dadi ma tero sa'olo silefo toma Boku 'Ofi-'Ofi ma dara: “ 'Oru ga'a manusia 'aḏi oḏi'i re ya 'isene nyangu re 'i osama toma manusia manga 'akala nyangu, gena-ge Ma Jou'ongu Madutu ra sidodahe di'a ngowa'a ga'a 'aḏi dadalara Unanga.”

¹⁰ Mada'a Ma Jou'ongu Madutu 'o pake Ma Ngagara 'Ofi-'Ofi di'a 'O sijumu 'Ai maksudu gena-ge ra ngene. Ma Ngagara 'Ofi-'Ofi gena-ge 'i waro 'oru ḇato ga'a 'i go-gogono, Ma Jou'ongu Madutu 'ai rahasia mai lai ngido.

¹¹ Sababu matengo i'a mai ua 'a waro ngowa'a lelegu manga 'akala re sinyingara ma dara, pa'i unanga masiretene 'ai roh ḇato. So'o gena ḏi'i mangale Ma Jou'ongu Madutu: Pa'i 'Ai Ngagara 'Ofi-'Ofi masiretene ḇato ya waro 'Ai 'akala re sinyingara ma dara.

¹² Re ngene wo sanga ua dungia ma 'akala; mada'a wo sanga Ma Ngagara 'Ofi-'Ofi ra Ma Jou'ongu Madutu tala, la nga'unu wa sahe mo-moini ga'a Unanga ro pula'a ra ngene sababu 'Ai mura re dadalara.

¹³ Sababu gena-ge, ngomi ma siajele mi pake ua demo ga'a mete'e manusia manga 'akala soro'unu, mada'a mi pake demo toma Ngagara 'Ofi-'Ofi ra Ma Jou'ongu Madutu tala. Dadi ngomi mi sitarangi 'ori i'a mangale Ma Jou'ongu Madutu toma ngowa-ngowa'a ga'a raḏi dawongo Ma Ngagara 'Ofi-'Ofi.

¹⁴ Mada'a ngowa-ngowa'a ga'a Ma Ngagara 'Ofi-'Ofi 'i cua ra ananga, ananga gena-ge 'aḏi oḏu'u dawongo 'oru ga'a Ma Ngagara 'Ofi-'Ofi 'i siajele. Sababu ananga ya ta'ajiri gena-ge sa'olo 'ori i'a ma parasaja ḇato. Ngowa'a gena-ge ya sahe yoḏu'u, sababu pa'i Ma Ngagara 'Ofi-'Ofi ḇato na riono ngene nga'unu wa disa waro re wa sahe enanga rema faeda.

¹⁵ Ngowa'a ga'a raḏi dawongo Ma Ngagara 'Ofi-'Ofi ra Ma Jou'ongu Madutu tala, ananga nga'unu 'aḏi waro 'oru ḇato. Mada'a matengo i'a mai ua ga'a dawongo ua Ma Ngagara 'Ofi-'Ofi, ananga nga'unu ua 'aḏi sahe mangale ngowa'a ga'a raḏi dawongo Ma Ngagara 'Ofi-'Ofi manga 'ahu ma duhu.

¹⁶ Sababu enanga gena-ge ma tero sa'olo 'i silefo ḏua toma Boku 'Ofi-'Ofi ma dara: “ 'A guna nga'unu 'a waro Ma Jou 'ai fikirana?! 'A guna nga'unu 'o ajele ma ngale Unanga gena-ge?!” Mada'a ngene ga'a rewo dawongo Ma Ngagara 'Ofi-'Ofi nga'unu wa sahe Kristus 'ai fikirana!