1 Korintus 15 - Jaji ma Su-sungi

Mangale Yesus dadunu 'o 'ahu moju

¹ Ioronongoḏu ngo-ngaku rimoi, nange-ne ngoi to si'elingi ngini mangale Habari Roanga ga'a 'au nga'ene ngoi reta singadolo ra ngini. Re ngini rena dawongo Habari Roanga gena-ge singadolo 'i dadi ma tero sa'olo ninga ngo-ngaku ma ba-bangini.

² Na'o ngini na cako'o namo-namoto Habari Roanga gena-ge ḏuanga i'a ngini sanga salamata. Mada'a na'o ngini ni ngaku 'ori i'a ga'a 'i banari ua, tantu ḏua ngini ninga ngo-ngaku enanga ma faeda 'i cua.

³ 'Oru ga'a ngoi reta dawongo ra Ma Jou, ngoi reto singadolo ra ngini ḏi'i. Enanga ma la-lamo'o ma re'u i'a nena-ne: Kristus 'o sengene di'a 'O tuusu ngene tananga nanga ḏosa-ḏosa, gena-ge 'i silefo pasala ḏua toma Boku 'Ofi-'Ofi,

⁴ Unanga 'u siotomo mada'a pasala i'a toma wangere ma soi ro'ange dadunu 'O 'ahu moju. Gena-ge ḏi'i 'i silefo pasala ḏua toma Boku 'Ofi-'Ofi.

⁵ Wakutu Unanga dadunu 'o 'ahu moju, Ro masijumu 'Ai diri ra Petrus, kara Tai me-mete'e ma lelegu.

⁶ Pasala i'a, toma 'orasa rimoi Unanga 'o masijumu 'Ai diri ḏi'i toma ngowa'a nga latu romotoa pai'i. Ananga gena-ge manga repe 'aḏi 'ahu-'ahu moju singadolo nange-ne, pa'i nga muḏuo i'a ḇato raḏi sengene.

⁷ Pasala i'a, Kristus 'o masijumu 'Ai diri ḏi'i ra Yakobus, gena ḏua kara Tai so-soma'a mo-moini.

⁸ Ma ḏo-ḏogumu, Unanga 'o masijumu 'Ai diri ḏi'i ra ngoi wakutu ngoi to sisikisa ngowa'a ngaku Yesus. Ngoi ma tero sa'olo ngowa kiau ga'a aro sibuoro ma ngara ngadolo nyangu.

⁹ Ngoi, Yesus 'ai so-soma'a ma pake ua, patasa ua si'aro'o ngoi Yesus 'ai so-soma'a, sababu ngoi to sisikisa ngowa-ngowa'a ngaku Yesus.

¹⁰ Mada'a sababu Ma Jou'ongu Madutu 'ai mura re dadalara, nange-ne ngoi to dadi Yesus 'ai so-soma'a. Unanga 'ai mura re dadalara ga'a 'O sijumu ra ngoi gena-ge 'i parasaja ua. Siḏibo ḏi'i, ngoi to munara lebe te'e i'a reo 'ari ḏagilomu ga'a Yesus 'ai so-soma'a ma lelegu. Mada'a gena-ge 'i dadi, sababu ngoi 'ari dinga'unu bolo 'ari wo-waro ua. Siḏibo ḏi'i sababu Ma Jou'ongu Madutu 'a sidodai 'ai mura re dadalara ra ngoi re 'Ai mura re dadalara gena-ge 'i mamete'e ra ngoi.

¹¹ Sababu gena-ge, bae ngoi bae Yesus 'ai so-soma'a ma lelegu ga'a raḏi singadolo Habari Roanga ra ngini, 'oru ua! Enanga lebe la-lamo'o i'a nena-ne: ngomi mi singadolo Habari Roanga gena-ge re ngini rena ngaku.

Ngowa'a raḏi sengene ḏuanga i'a dadunu 'aḏi 'ahu moju

¹² Ngomi mi singadolo ḏua habari mangale Kristus ro sengene re dadunu 'O 'ahu moju. Dadi, i'a sa'olo taninga sigolona 'age ga'a 'aḏi siajele mangale ngowa'a raḏi sengene dadunu 'aḏi 'ahu yoḏu'u?!

¹³ Na'o si'ade-'ade i'a ngowa'a senge-sengene dadunu 'aḏi 'ahu yoḏu'u, Kristus dadunu 'o 'ahu ua ḏi'i.

¹⁴ Re si'ade-'ade i'a Kristus dadunu 'o 'ahu ua, 'oru ḇato ngomi masingadolo, enanga ma faeda 'i cua re ninga ngo-ngaku 'i dadi parasaja.

¹⁵ Sidogo ḏi'i, ngomi mi dadi ngowa'a sakisi sa-sakala ra Ma Jou'ongu Madutu. Sababu ngomi rema singadolo mangale Ma Jou'ongu Madutu dadunu ro si'ahu moju Kristus toma ngowa'a senge-sengene manga sigolona. Mada'a, na'o banari ngowa'a senge-sengene dadunu 'aḏi 'ahu yoḏu'u; tantu ḏua Ma Jou'ongu Madutu dadunu ro si'ahu ua ḏi'i 'a Kristus.

¹⁶ Sababu si'ade-'ade i'a ngowa'a senge-sengene dadunu 'aḏi 'ahu yoḏu'u, Kristus ḏi'i dadunu 'o 'ahu ua toma ngowa'a senge-sengene manga sigolona.

¹⁷ Re na'o Kristus dadunu 'o 'ahu ua, tantu ḏua ninga ngo-ngaku ma faeda 'i cua re ngini ni tegoro toma ḏosa ma dara moju, sababu ninga ḏosa 'i singi-ngiranga nyangu!

¹⁸ So'o gena ḏi'i, ngowa'a ngaku Yesus ga'a raḏi sengene, ḏuanga i'a ananga gena-ge 'aḏi sanga sengene kasingado-ngadolo i'a.

¹⁹ Na'o nanga ngo-nganono ra Kristus pa'i wo 'ahu toma dungia nena-ne ḇato, marai ngene ngowa'a ga'a lebe rugi reo manusia mo-moini toma dungia nena-ne ma dara.

²⁰ Mada'a momongolo ua, mode-mode'e enanga ma banari so'o ne: Ma Jou'ongu Madutu dadunu 'o si'ahu moju 'a Kristus toma ngowa'a senge-sengene manga sigolona. Enanga gena-ge 'i dadi didina'o mangale Ma Jou'ongu Madutu ḏuanga i'a dadunu 'o si'ahu ngowa'a ga'a raḏi sengene.

²¹ Ngene mo-moini wo sengene sababu pa'i matengo ḇato ga'a 'o mete'e ua Ma Jou'ongu Madutu 'ai parenta. So'o gena ḏi'i ngowa-ngowa'a nga'unu dadunu 'aḏi 'ahu moju toma ngowa'a senge-sengene manga sigolona, sababu pa'i Matengo ḏi'i 'Ai ga'a.

²² Ngowa'a mo-moini ga'a raḏi marimoi ra Adam, balasu 'aḏi sengene. So'o gena ḏi'i ngowa'a mo-moini ga'a raḏi marimoi ra Kristus, ḏuanga i'a Ma Jou'ongu Madutu dadunu ya'u si'ahu toma ngowa'a senge-sengene manga sigolona.

²³ Mada'a mo-moini gena-ge enanga rema 'orasa: Siḏa-siḏa 'a Kristus. Maha wakutu 'a Kristus dadunu 'o sapolo moju, kara Ma Jou'ongu Madutu dadunu 'o si'ahu moju ngene ga'a rewo marimoi ra Kristus.

²⁴ Togumu i'a, Kiamata ma Wangere 'i ngadolo. Toma 'orasa gena-ge Kristus 'o sita'aloko mo-moini ga'a parenta bae toma diwanga, bae toma tana'a bolo le'a ḇato. Togumu i'a, 'a Kristus sa'olo 'Olana dadunu 'o sidoa'a 'Ai kuasa ra Ma Jou'ongu Madutu, 'Ai Ḇaḇa.

²⁵ Kristus balasu 'o parenta sa'olo 'Olana singadolo Ma Jou'ongu Madutu 'o 'a'a Kristus 'ai lawana mo-moini toma dungia, ananga gena-ge 'aḏi ta'aloko ra Kristus.

²⁶ Re maut, enanga gena-ge Kristus 'ai lawana ma ḏo-ḏogumu ga'a Unanga 'a sita'aloko.

²⁷ Toma Boku 'Ofi-'Ofi ma dara 'i silefo so'o ne: “Ma Jou'ongu Madutu 'o 'a'a 'ori i'a mo-moini 'i ta'aloko ra Unanga.” Enanga gena-ge 'i tarangi ḏua mangale Ma Jou'ongu Madutu 'o osama nyo-nyoimi ua toma “ 'ori i'a mo-moini” gena-ge, sababu Unanga 'o 'a'a 'ori i'a mo-moini 'i ta'aloko ra Kristus.

²⁸ Mada'a togumu i'a, 'ori i'a mo-moini gena-ge ri ta'aloko ra Kristus, kara Kristus masiretene Ma Jou'ongu Madutu 'ai Ngowa'a Nau'u ḏuanga i'a 'a sidoa'a 'Ai kuasa ra Ma Jou'ongu Madutu ga'a 'O sita'aloko kuasa mo-moini ra Kristus. Dadi Ma Jou'ongu Madutu masiretene ḏuanga i'a 'O parenta 'ori i'a mo-moini.

²⁹ Na'o ngowa'a senge-sengene dadunu 'aḏi 'ahu yoḏu'u, i'a sa'olo ngowa'a sanga baptis di'a ngowa'a ga'a raḏi sengene?! Na'o mode-mode'e ngowa'a senge-sengene dadunu 'aḏi 'ahu yoḏu'u, ma faeda 'oru ananga ya si'a'a so'o gena!

³⁰ Si'ade-'ade i'a ngowa'a senge-sengene dadunu 'aḏi 'ahu yoḏu'u. Ma faeda 'oru ngomi mi basono tau-taunu bahala pa'i di'a singadolo gena-ge ḇato?!

³¹ Ioronongoḏu ngo-ngaku rimoi! Wangere ma jelele i'a, ngoi to basono bahala ga'a nyengara 'i sigasa ngoi toma sengene — ngoi to sa-sakala ua! Ngoi to sa-sakala ua ḏi'i na'o ngoi to kanau ngoi to matoro sababu ngini reni ngaku 'a Kristus Yesus, nanga Jou.

³² Na'o pa'i sanga 'utungu nanga 'ahu toma dungia nena-ne ḇato, ma faeda 'oru ngoi to makutale talaḏi ngowa'a ma jira toma limau Epesus. Ngowa'a gena-ge ma tero sa'olo singa-singa! Si'ade-'ade i'a ngowa'a senge-sengene dadunu 'aḏi 'ahu yoḏu'u. Jobilaha ngene mete'e dolabololo enanga ma betongo so'o ne: “Ino ngene oromo re wo ka'e ma'eto-'etolo wa sisanangi nanga 'ahu, sababu da-daini bolo ḏiḏingi ngene wo sengene.”

³³ Awa ngowa'a 'aḏi sihaga ngini: “Na'o ngini ni ma'u rimoi toma ngowa'a ma jira, tantu ḏua manga de'oso re ḏegoro gena-ge 'i sijira ngini ninga de'oso re ḏegoro ma la-la.”

³⁴ Ngini balasu ni ma'insafu re madaga'a ḏosa rawara: 'Age rema ngowa-ngowa'a taninga sigolona ga'a 'aḏi nana'o nyangu Ma Jou'ongu Madutu sababu 'aḏi ngaku ua Unanga ḏuanga i'a 'O dadunu si'ahu ngowa'a toma ngowa'a senge-sengene manga sigolona. Ngoi ta siajele gena-ge, la ngini ni basono mara'a!

Mangale manusia manga lese ga'a dadunu 'i 'ahu moju

³⁵ Mada'a ḏa 'age rema ngowa'a ga'a 'aḏi ngaku nyangu do-doto'o gena-ge 'aḏi sano so'o ne: “Ma duhu sa'olo ngowa'a raḏi sengene nga'unu dadunu 'aḏi 'ahu moju? Ngowa'a raḏi sengene manga lese ri wejere. Dadi lese le'a ino nga'unu dadunu si'ahu ananga?”

³⁶ Haga masala! Si'ade-'ade i'a, ngene wo siare gisisi rimoi. Na'o gisisi gena-ge 'i wejere ua, enanga 'i konyo ua re 'i dadi go-gahu ua. Gena-ge ma tero sa'olo ngowa'a raḏi sengene manga lese.

³⁷ Ngini ni siare gisisi ma moi'i ḇato bae gisisi gandum ma moi'i bae gisisi ma lelegu. Ngini ni siare ua go-gahu ga'a 'i konyo ḏua!

³⁸ Mada'a Ma Jou'ongu Madutu masiretene 'a 'a'a gisisi gena-ge 'i konyo re 'i dadi ma lese re rema so'a, mete'e Unanga 'ai mau. Unanga gena-ge 'a 'a'a go-gahu fara muḏuo i'a re enanga ma duhu 'i ma tero ua.

³⁹ So'o gena ḏi'i, 'oru ga'a 'i 'ahu-'ahu re 'i nga-ngagara enanga ma lese 'i ma tero ua: Ngene wa oḏi'i manusia re haiwani toma tana'a du-dudungu, ma lese 'i ma tero ua, namo toma diwanga ma lese ma tero ua reo nyao'o toma ngoloto ma lese.

⁴⁰ So'o gena ḏi'i, 'ori i'a toma diwanga re 'ori i'a toma tana'a: 'Ori i'a toma diwanga, enanga ma rousu masiretene re 'ori i'a toma tana'a, enanga ma rousu masiretene. Re fara ḏiḏi gena-ge 'i ma'u rapu.

⁴¹ Wangere ma la'o reo ngara enanga ma tarangi ma'u rapu, re mumuḏungu enanga ma tarangi manga ḏi'i. Re mumuḏungu mo-moini ma tarangi 'i ma tero ua.

⁴² So'o gena ḏi'i, ngowa'a raḏi sengene ga'a ḏuanga i'a dadunu 'aḏi 'ahu moju. Manga lese ga'a wa otomo, gena-ge lese ga'a weje-wejere. Mada'a lese ga'a dadunu 'i 'ahu moju, gena-ge lese ga'a kama wejere ua.

⁴³ Wakutu wa otomo lese gena-ge, 'i dadi mereoso re rousu riwara. Mada'a lese ga'a dadunu 'i 'ahu moju, lese gena-ge 'i dadi te'e re rousu.

⁴⁴ Wakutu wa otomo, lese gena-ge ma 'asala toma tana'a. Mada'a pasala i'a ngene dadunu wo 'ahu moju wo dawongo lese ma 'asala toma Ngagara 'Ofi-'Ofi. Dadi 'age lese ga'a ma 'asala toma tana'a re 'age ḏi'i lese ga'a ma 'asala ra Ma Jou'ongu Madutu ino.

⁴⁵ Ma tero toma Boku 'Ofi-'Ofi ma dara 'i silefo: “Manusia ma mulaingi 'a Adam, unanga gena-ge Ma Jou'ongu Madutu 'o sidadi unanga 'o 'ahu.” Mada'a Adam ma sidu-duu'u gena-ge 'a Kristus, dadunu 'O 'ahu moju, la 'O pula'a 'ahu kasingado-ngadolo i'a ra ngene.

⁴⁶ Sapolo ma mulaingi gena-ge lese toma tana'a, lese ra Ma Jou'ongu Madutu ino ua. Lese ra Ma Jou'ongu Madutu 'i sapolo ma soi ḏiḏi

⁴⁷ Adam ma mulaingi sidadi reo tana'a. Mada'a Adam ma soi ḏiḏi, Kristus, unanga gena-ge 'ai 'asala toma soroga tala.

⁴⁸ Manusia ma tero sa'olo Adam ma mulaingi ga'a sidadi reo tana'a. Mada'a ngowa-ngowa'a manga 'asala toma soroga ma tero sa'olo Kristus ga'a sapolo toma soroga tala.

⁴⁹ So'o gena-ge ḏi'i, nange-ne nanga lese ma jamani ma tero sa'olo 'a Adam 'ai jamani ga'a sidadi reo tana'a. Ḏuanga i'a nanga lese ma jamani 'i dadi ma tero sa'olo Unanga gena-ge toma soroga tala.

⁵⁰ Ioronongoḏu ngo-ngaku rimoi, nange-ne ngoi to siajele ra ngini, lese toma tana'a 'i osama yoḏu'u ra Ma Jou'ongu Madutu 'ai dungia su-sungi ga'a Unanga 'o parenta sa'olo 'Olana. Sababu ngene nanga lese ḏuanga i'a 'i sengene re 'i wejere. Dadi sanga ua 'i osama toma ngi'i ga'a 'ahu kasingado-ngadolo i'a.

⁵¹ Ni 'isene la-la ino! Ngoi to kanau ra ngini mangale 'ua re 'au wali 'i dadi rahasia, mada'a 'orasa nange-ne Ma Jou'ongu Madutu ra sitarangi ra ngene: Ngene mo-moini ua wo sengene, mada'a ngene mo-moini ma tero sa'olo manongoso.

⁵² Gena-ge 'i dadi na'o ngene wo 'isene terompet ma iḏingi ma ḏo-ḏogumu. Kage-kage re tado la'o ua ngowa'a raḏi sengene dadunu 'aḏi 'ahu moju re dawongo lese su-sungi ga'a 'i wejere ua. Re ngene ga'a 'ahu moju nanga lese ri manongoso.

⁵³ Ngene nanga lese toma tana'a ga'a 'i sengene re 'i wejere, ḏuanga i'a singali reo lese ma 'asala toma soroga ga'a kama sengene ua.

⁵⁴ Mo-moini gena-ge 'oru ga'a 'i silefo toma Boku 'Ofi-'Ofi toma 'orasa gena-ge, enanga 'i sitotomo: “Maut enanga ri iranga, dadi ngene sanga 'ahu kasingado-ngadolo i'a.”

⁵⁵ “Hei maut 'ani de-de'e nanga le'a?! Hei maut 'ani bisa nanga le'a?!”

⁵⁶ Maut ma bisa gena-ge ḏosa ga'a 'i sigasa ngene toma sengene. Re ḏosa rema kuasa sababu Musa 'ai hukumu.

⁵⁷ Mada'a ngene wo sibere ie murasa ma la ra Ma Jou'ongu Madutu, sababu Unanga 'o sibebasa ngene toma ḏosa ma kuasa. Dadi wo 'ahu kasingado-ngadolo i'a sababu Yesus Kristus nanga Jou.

⁵⁸ Sababu gena-ge, ioronongoḏu ga'a ngoi tini dadalara, ngini ninga ngo-ngaku balasu lai te'e, la ninga ngo-ngaku kama elala awa. Ni munara ra Ma Jou kama togumu awa, reninga 'akala re sinyingara mode-mode'e. Sababu ngini ni waro mangale 'oru ga'a ngini ni munara di'a Ma Jou, tantu ḏua enanga 'i parasaja ua.