1 Korintus 13 - Jaji ma Su-sungi

Dadalara

¹ Si'ade-'ade i'a, ngoi nga'unu to sikanau manusia mo-moini manga demo bolo mala'ekata-mala'ekata ma demo ḏi'i. Mada'a na'o 'ari dadalara toma ngowa'a lelegu 'i cua, ngoi to kanau ma tero ḇato sa'olo saragi ma iḏingi, ma ngale 'i cua.

² Si'ade-'ade i'a ngoi rari kuasa di'a ta siajele habari da'u ra Ma Jou'ongu Madutu tala. Re ta sahe wo-waro mo-moini, re ba-banari lai ngido re 'ari ngo-ngaku lai te'e ra Ma Jou'ongu Madutu singadolo nga'unu to parenta kie 'i malage. Mada'a na'o 'ari dadalara toma ngowa'a lelegu 'i cua, ngoi ngowa'a ma pake ua.

³ Si'ade-'ade i'a 'ari 'ori i'a rana mo-moini ta sibalangu di'a ngowa'a ma dinga'unu ua re to pula'a 'ari lese di'a ngowa'a ya tau'u sababu ngoi to mete'e Yesus. Mada'a 'ari dadalara di'a ngowa'a lelegu 'i cua, mo-moini gena-ge ma faeda ri cua.

⁴ Matengo ga'a 'o dadalara ngowa'a lelegu, unanga gena-ge 'ai 'akala ḇanyo, 'ai 'akala lai rousu, ham-ham ua, matoro ua re momole ua.

⁵ 'Ai de'oso re ḏegoro lai rousu toma ngowa-ngowa'a lelegu, disa pa'i 'ai paralu ḇato ua, capati ruta ua, gogono 'akala re sinyingara ua.

⁶ Matengo ga'a 'o dadalara ngowa'a lelegu, 'o sanangi ua na'o ngowa'a lelegu 'aḏi 'a'a 'ori i'a ma jira. Mada'a 'o maroanga pa'i na'o ngowa'a lelegu 'aḏi 'a'a 'ori i'a ma la-la.

⁷ Unanga 'o tahana talaḏi 'oru ḇato toma ngowa'a lelegu ino, 'o ngaku 'oru ḇato ga'a la-la mangale ngowa'a lelegu. Unanga 'o masinganono tau-taunu ngowa'a lelegu manga de'oso re ḏegoro 'i dadi la-la. Re 'o pake 'akala ḇanyo tau-taunu toma ngowa'a lelegu.

⁸ Dadalara kama ḏo-ḏogumu ua. Mada'a cocatu mo-moini ra Ma Jou'ongu Madutu ino bae kuasa di'a siajele habari da'u ra Ma Jou'ongu Madutu tala, ḏuanga i'a 'A sitogumu; bae kuasa di'a kanau pake Ma Ngagara 'Ofi-'Ofi ma demo, ḏuanga i'a 'I sitogumu; bae kuasa di'a singadolo wo-waro ra Ma Jou'ongu Madutu, ḏuanga i'a 'i togumu ḏi'i.

⁹ Sababu nange-ne nanga wo-waro re kuasa di'a siajele habari da'u ra Ma Jou'ongu Madutu tala, cocatu romoḏiḏi gena-ge, enanga 'i tiai nyangu.

¹⁰ Mada'a ḏuanga i'a wakutu Ma Jou'ongu Madutu 'a sitiai mo-moini, cocatu gena-ge 'i iranga sababu ngene wa paralu riwara.

¹¹ Wakutu ngoi to ngowa 'olo i'a moju, ngoi to kanau sa'olo ngowa 'olo, 'ari rorasa sa'olo ngowa 'olo, 'ari 'akala ma sanga sa'olo ngowa 'olo. Nange-ne ngoi reto la-lamo'o, 'ari de'oso re ḏegoro, demo re ganau sa'olo ngowa 'olo riwara. Ngoi reto matogumu to pake de'oso re ḏegoro gena-ge sababu ngoi ta paralu riwara.

¹² 'Oru ga'a ngene wa oḏi'i nange-ne, ma tero sa'olo wa oḏi'i nanga guḏumingi toma kasina, enanga 'i sairamu moju. Mada'a ḏuanga i'a ngene wo oḏi'i Unanga tarangi madutu sababu ma'u talaḏi biono. Nange-ne, ngoi ta nana'o mo-moini nyangu mangale Ma Jou'ongu Madutu. Mada'a ḏuanga i'a ngoi tu nana'o Unanga mode-mode'e, ma tero sa'olo Unanga ro nana'o ngoi mode-mode'e.

¹³ Dadi, nange-ne fara ro'ange balasu ngene wa si'a'a: wo ngaku, wo nganono re wo ma'u dadalara. Mo-moini gena-ge ma la-lamo'o ma re'u i'a: wo dadalara ngowa-ngowa'a lelegu.