1 Korintus 12 - Jaji ma Su-sungi

Cocatu toma Ngagara 'Ofi-'Ofi ino

¹ Ioronongoḏu ngo-ngaku rimoi, nange-ne ngoi to mau ngini ni sahe mode-mode'e mangale Ma Jou'ongu Madutu 'ai cocatu toma Ngagara 'Ofi-'Ofi ino.

² 'Elingi wakutu ngini ni nana'o nyangu Ma Jou'ongu Madutu, ngini ni sanga sihaga singadolo ni puji re silamo'o jou'ongu ma somoara, enanga gena-ge 'i popongolo.

³ Sababu gena-ge, ngini balasu ni waro mangale ngowa'a ga'a Ma Jou'ongu Madutu 'ai Ngagara 'Ofi-'Ofi ya'u ḏegoro, ananga gena-ge sanga ua 'aḏi sosowini Yesus. So'o gena-ge matengo i'a mai ua nyengara 'aḏi sijumu tamanga 'ahu mangale “Yesus gena-ge manga Jou,” ḏuga-ḏuga Ma Ngagara 'Ofi-'Ofi ya'u ḏegoro.

⁴ Cocatu-cocatu ma duhu lai repe ga'a toma Ngagara 'Ofi-'Ofi ino. Mada'a ma 'asala toma Ngagara 'Ofi-'Ofi pa'i rimoi ḇato.

⁵ Ngowa'a 'aḏi de-de'oso Ma Jou 'aḏi pake duhu lai repe, mada'a Ma Jou ga'a ngowa'a 'aḏi de-de'oso, Unanga pa'i matengo ḇato.

⁶ Ma Jou'ongu Madutu 'o sijumu 'ai kuasa tananga 'ahu 'o pake duhu lai repe, mada'a Ma Jou'ongu Madutu ga'a 'o munara toma 'ori i'a mo-moini tananga 'ahu mo-moini, Unanga pa'i matengo ḇato.

⁷ Ma Jou'ongu Madutu 'o sijumu Ma Ngagara 'Ofi-'Ofi ma kuasa 'o pake duhu lai repe toma ngowa'a ngaku Yesus mo-moini, la ngene wo ma'u riono matengo re matengo:

⁸ 'Age rema ngowa'a matengo sanga kuasa di'a singadolo 'akala ma soro'unu ra Ma Jou'ongu Madutu tala. 'Age ma lelegu sanga kuasa di'a singadolo wo-waro mangale Ma Jou'ongu Madutu. Kuasa-kuasa gena-ge ma 'asala toma Ngagara 'Ofi-'Ofi pa'i rimoi ḇato.

⁹ Ma Ngagara 'Ofi-'Ofi gena-ge 'i pula'a ra matengo, ngo-ngaku ra Yesus lai te'e. Re Enanga gena-ge ḏi'i sipula'a kuasa toma ngowa'a lelegu di'a si-la ngowa'a siḏi.

¹⁰ Matengo sanga kuasa di'a 'a'a ga'a hera-heranga, ma lelegu sanga kuasa di'a siajele habari da'u ra Ma Jou'ongu Madutu tala. Ma lelegu sanga 'akala soro'unu di'a nga'unu ya waro na'o 'ori i'a ma 'asala toma Ngagara 'Ofi-'Ofi re 'ori i'a ma 'asala toma roh ma jira. Re ma lelegu sanga kuasa di'a kanau pake Ma Ngagara 'Ofi-'Ofi ma demo, re ma lelegu ḏi'i sanga kuasa di'a siguci Ma Ngagara 'Ofi-'Ofi ma demo.

¹¹ Mo-moini gena-ge Ma Ngagara 'Ofi-'Ofi pa'i rimoi ḇato, Enanga ma munara. Ananga matengo re matengo sanga kuasa toma Ngagara 'Ofi-'Ofi mete'e Enanga gena-ge ma mau masiretene.

Lese ma bageanga lai repe, mada'a pa'i lese rimoi ḇato

¹² Ngene, ga'a rewo marimoi ra Kristus, ma tero sa'olo manusia manga lese. Pa'i lese rimoi ḇato mada'a lese ma bageanga ma repe. Kalaha lese ma bageanga lai repe mada'a bageanga gena-ge, 'i dadi lese rimoi ḇato.

¹³ So'o gena ḏi'i, ngene bae ngowa'a Yahudi, bae ngowa'a Yahudi ua, ngowa'a budaka, bolo budaka ua, ngene mo-moini wo dadi ma tero sa'olo lese rimoi ga'a 'i marimoi ra Kristus. Gena-ge 'i dadi wakutu ngene wo sanga baptis rema Ngagara 'Ofi-'Ofi ga'a 'i tegoro ra ngene matengo re matengo nanga 'akala re sinyingara ma dara.

¹⁴ Ma lese pa'i bageanga rimoi ḇato ua, mada'a 'age bageanga ma repe toma lese.

¹⁵ Si'ade-'ade, rou 'i kanau, “Ngoi ne giama ua, dadi ngoi to osama nyo-nyoimi ua toma lese.” Kalaha rou ne giama ua, rou 'i osama nyo-nyoimi ḏi'i toma lese.

¹⁶ Si'ade-'ade i'a, ngau'u 'i kanau, “Ngoi ne la'o ua dadi ngoi to osama nyo-nyoimi ua toma lese.” Kalaha ngau'u ne giama ua, ngau'u 'i osama nyo-nyoimi ḏi'i toma lese.

¹⁷ Si'ade-'ade i'a, lese rimoi mo-moini pa'i la'o ḇato, ma duhu sa'olo lese gena-ge 'i 'isene?! Bolo si'ade-'ade i'a lese rimoi pa'i ngau'u ḇato, ma duhu sa'olo lese gena-ge 'i tumese?!

¹⁸ Mada'a momongolo ua ngene wo oḏi'i masiretene mangale Ma Jou'ongu Madutu 'a si'aturu lese ma bageanga mo-moini mete'e Unanga 'ai mau.

¹⁹ Na'o mo-moini gena-ge pa'i lese ma bageanga rimoi ḇato, ma lese 'i cua!

²⁰ Dadi bageanga ma repe, mada'a ma lese pa'i rimoi ḇato.

²¹ Sababu gena-ge, awa la'o 'i kanau toma giama, “Ngana, ngoi tini paralu ua!” Re awa sae'e 'i kanau toma rou, “Ngana, ngoi tini paralu ua!”

²² Siḏibo ḏi'i, lese ma bageanga ga'a wa ta'ajiri 'i mereoso, ngene wa paralu masala;

²³ re lese ma bageanga ngene wa ta'ajiri kama ijana ua, ngene wa tailako masala. Lese ma bageanga ga'a ngowa'a ya oḏi'i yoḏu'u, ngene wa sipake pakeanga.

²⁴ Lese ma bageanga ga'a wa oḏi'i i'a lai rousu, ngene wa kadiarata riwara. Ma Jou'ongu Madutu 'a sifato ḏu-ḏuanga ḏua mete'e Unanga 'ai mau, la ngene wo kadiarata la-la bageanga ga'a ngene wa ta'ajiri ma ijana cua bolo mereoso.

²⁵ Sababu gena-ge, lese sibalangu yoḏu'u mada'a bageanga re bageanga balasu 'i ma'u tailako i'a re ino:

²⁶ Na'o bageanga rimoi enanga 'i siḏi, bageanga mo-moini 'i basono siḏi. Na'o bageanga rimoi ngowa'a ya sitoro, bageanga mo-moini 'i maroanga.

²⁷ Ioronongoḏu ngo-ngaku rimoi, ngini mo-moini ma tero sa'olo Kristus 'ai lese re matengo re matengo ni dadi ma tero sa'olo Unanga 'ai lese ma bageanga.

²⁸ So'o gena ḏi'i toma jama'ata, Ma Jou'ongu Madutu 'a sitantukanga ḏua matengo re matengo nanga munara: Ma mulaingi, Yesus 'ai so-soma'a kara nabi-nabi, kara guru-guru, ananga remanga kuasa di'a 'a'a ga'a hera-heranga, remanga kuasa di'a si-la ngowa'a siḏi, remanga kuasa di'a riono ngowa'a lelegu, remanga kuasa di'a sinyanyasele jama'ata, re ananga ga'a 'aḏi kanau pake Ma Ngagara 'Ofi-'Ofi ma demo.

²⁹ Ananga mo-moini sanga kuasa ma tero ua: Ananga mo-moini ua 'aḏi dadi Yesus 'ai so-soma'a, mo-moini ua 'aḏi dadi nabi-nabi bolo 'aḏi dadi guru-guru bolo remanga kuasa di'a 'a'a ga'a hera-heranga!

³⁰ Ananga mo-moini ua remanga kuasa di'a si-la ngowa'a siḏi. Mo-moini ua nga'unu 'aḏi kanau pake Ngagara 'Ofi-'Ofi ma demo re mo-moini ua nga'unu siguci Ma Ngagara 'Ofi-'Ofi ma demo.

³¹ Dadi, ngini ḏi'i balasu ni makutale mode-mode'e di'a ni sanga cocatu-cocatu lebe lamo'o i'a. Mada'a nange-ne ngoi to sijumu ra ngini ngo'omo ga'a lebe rousu i'a reo cocatu gena-ge mo-moini.