1 Korintus 11 - Jaji ma Su-sungi

¹ Ngini balasu ni cuḏuḏu'u 'ari de'oso re ḏegoro; ma tero sa'olo ngoi masiretene to cuḏuḏu'u 'a Kristus 'ai de'oso re ḏegoro.

Mangale sae'e ma jujuwurungu

² Ngoi tini sitoro sababu ngini ni 'elingi tau-taunu 'ari de'oso re ḏegoro re 'ari do-doto'o. Sidogo ḏi'i, ngini ni mete'e mode-mode'e 'ari do-doto'o ga'a reni dawongo re to sipula'a ḏua ra ngini.

³ Mada'a ngoi to mau ngini ni sahe mangale na-nau'u manga sae'e, gena-ge 'a Kristus. Re we-were'a manga sae'e, gena-ge na-nau'u. Re 'a Kristus 'ai sae'e, gena-ge Ma Jou'ongu Madutu.

⁴ Na'o na-nau'u matengo 'o manyiata bolo 'o siajele habari da'u ra Ma Jou'ongu Madutu tala toma jama'ata 'o pake sae'e ma jujuwurungu, unanga gena-ge 'o silamo'o 'a Kristus ua, ga'a 'ai sae'e.

⁵ Siḏibo ḏi'i, na'o we-were'a matengo mo manyiata bolo mo siajele habari da'u ra Ma Jou'ongu Madutu tala toma jama'ata ma pake ua 'ami sae'e ma jujuwurungu gena-ge, munanga romo silamo'o 'ami nau'u ua, ga'a 'ami sae'e. Gena-ge 'i ma tero sa'olo 'ami utu tami sae'e rema ḇukuku.

⁶ Sababu gena-ge, na'o we-were'a matengo mo oḏu'u mapake 'ami sae'e ma jujuwurungu, jobilaha na'o munanga ma guti 'ami utu tami sae'e. Mada'a na'o ma guti bolo ma bukuku 'ami sae'e, munanga mo sipula'a mara'a 'ami diri. Dadi jobilaha munanga mo pake 'ami sae'e ma jujuwurungu.

⁷ Na-nau'u paralu ua mapake sae'e ma jujuwurungu, sababu Ma Jou'ongu Madutu 'ai rupa re jamani re 'Ai kabasarana 'i waiti toma na-nau'u. Mada'a na-nau'u 'ai kabasarana 'i waiti toma we-were'a.

^8-9 Sababu na-nau'u ma 'asala toma we-were'a ino ua, mada'a we-were'a ma 'asala toma na-nau'u ino. Re na-nau'u sidadi ua sa'olo ri-riono di'a we-were'a, mada'a we-were'a sidadi sa'olo ri-riono di'a na-nau'u.

¹⁰ Sababu gena-ge, we-were'a balasu pake jujuwurungu tamanga sae'e sa'olo nana'o rimoi mangale munanga mo isene na-nau'u re mo sisanangi mala'ekata-mala'ekata ga'a 'i uningi.

¹¹ Kalaha so'o gena-ge, we-were'a 'aḏi paralu na-nau'u manga ri-riono ma tero sa'olo na-nau'u 'aḏi paralu we-were'a manga ri-riono di'a ngene ga'a rewo marimoi ra Yesus.

¹² Sababu kalaha we-were'a ma mulaingi sidadi toma na-nau'u ino, mada'a maha siḏagi i'a we-were'a sibuoro na-nau'u. Mo-moini gena-ge ma 'asala ra Ma Jou'ongu Madutu tala.

¹³ Nena-ne tai'i ngini masiretene ni madibanga: Patasa bolo ua, na'o we-were'a matengo mo manyiata ra Ma Jou'ongu Madutu toma jama'ata mo pake 'ami sae'e ma jujuwurungu ua?!

¹⁴ 'Ua re 'au wali moju 'i dadi biasa ḏua re sidoto'o ḏua ra ngini mangale na-nau'u manga utu kiḏanga 'i patasa ua.

¹⁵ Mada'a di'a we-were'a, ananga manga utu kiḏanga gena-ge 'i dadi ananga manga biono gau'u. Dadi Ma Jou'ongu Madutu 'o pula'a utu kiḏanga toma we-were'a sa'olo manga sae'e ma jujuwurungu.

¹⁶ Na'o 'age rema ngowa'a 'aḏi ma'u lawana mangale utu, ngoi to siajele ra ananga, bae ngene bae jama'ata-jama'ata ma lelegu, 'atoranga gena-ge 'i dadi biasa di'a ngene mo-moini toma jama'ata ma dara; 'atoranga ma lelegu 'i cua.

Ma Jou 'ai Perjamuan

¹⁷ Ngoi tini sitoro ua mangale 'ori i'a nena-ne: Ngini ninga lo-lomu 'i sigasa ua ngini toma la-la, mada'a 'i sigasa ngini toma la-la ua.

¹⁸ Sababu ma mulaingi, ngoi reto 'isene wakutu ngini ni lomu sa'olo jama'ata 'age toropo romoḏiḏi ma'u lawana. Re ngoi masiretene repe ta ngaku mangale 'ori i'a gena-ge 'i banari!

¹⁹ Dadi ngini ni marimoi riwara. Tantu ḏua, ngini ni 'a'a so'o gena, la ḏuanga i'a 'i waiti ra ngini, 'a guna rana manga ngo-ngaku 'i mode-mode'e — mada'a ngini ni rapu!

²⁰ Wakutu ngini ni malomu di'a ni oromo Ma Jou 'ai Perjamuan, ngini ni fikiri ni si'elingi Ma Jou Yesus 'ai se-sengene di'a ngini — mada'a so'o gena-ge ua!

²¹ Sababu wakutu ngini ni tegoro di'a ni oromo, matengo re matengo ni marerebe ni oromo ninga ngo-ngoromo masiretene, singadolo mamuni'a 'aḏi sanga oromo ua, re ma lelegu 'aḏi 'etolo!

²² I'a sa'olo so'o gena?! Ngini reninga wala bolo ua?! Dadi ni oromo re ni ka'e taninga wala masiretene! Bolo ngini ninga 'ulungu ma dara ni sipula'a mara'a Ma Jou'ongu Madutu 'ai jama'ata re sipula'a mara'a ngowa'a ma dinga'unu ua?! Ngoi to kanau 'oru ra ngini?! Ni fikiri ngoi ḏuanga i'a to sitoro ngini?! So'o gena ua!

²³ Sababu do-doto'o mangale Ma Jou 'ai perjamuan ga'a ngoi ta singadolo ra ngini, ngoi nena-ne ta dawongo ra Ma Jou masiretene so'o ne: Toma lobi'i ga'a 'a Yudas 'o sipula'a Yesus toma ngowa'a ma jira, Yesus 'o 'oro roti

²⁴ re Unanga 'o sibere ie murasa ma la ra Ma Jou'ongu Madutu. Togumu i'a, Unanga 'a poti-poti ma roti gena-ge re 'O kanau, “Nena-ne Ngoi 'ari lese ga'a sidoa'a di'a ngini. Na si'a'a tau-taunu di'a ni si'elingi Ngoi.”

²⁵ So'o gena-ge ḏi'i, ananga 'aḏi oromo togumu i'a, Unanga 'a 'oro sawo'o ma dara rema 'anggur re 'O kanau, “Sawo'o ma dara rema 'anggur nena-ne, gena-ge Ma Jou'ongu Madutu 'ai jaji ma su-sungi ga'a sitotomo Rari ngaunu. Soi rai o'o i'a ngini ka'e 'anggur nena-ne, ngini si'a'a di'a si'elingi Ngoi.”

²⁶ Dadi soi rai o'o i'a ngini ni oromo roti re ni ka'e 'anggur gena-ge, ngini ni singadolo Ma Jou 'ai se-sengene singadolo Unanga 'o dadunu sapolo moju.

²⁷ Sababu gena-ge, ngowa'a ga'a 'aḏi oromo roti re ka'e 'anggur ga'a ma tero sa'olo Ma Jou 'ai lese re 'Ai ngaunu, mada'a ya sidodai duhu 'i patasa ua, ananga gena-ge raḏi baraḏosa ra Ma Jou; sababu ananga 'aḏi silamo'o ua Unanga 'ai lese re 'Ai ngaunu.

²⁸ Dadi matengo re matengo siḏa-siḏa balasu ni mafikiri la-la mangale roti re 'anggur ma maksudu, kara nyengara ni oromo roti re ka'e 'anggur.

²⁹ Sababu na'o ngowa'a 'aḏi oromo roti re ka'e 'anggur gena-ge ya sidodai duhu ga'a 'i silamo'o ua Ma Jou 'ai lese, gena-ge ma tero sa'olo ananga masiretene 'aḏi oromo re ka'e ma tero sa'olo golo'o katula ga'a Ma Jou'ongu Madutu ya'u sipula'a.

³⁰ Ma sababu gena-ge taninga sigolona 'age rema ngowa'a manga repe ga'a 'aḏi siḏi, manga lese 'i mereoso, re ḏi'i mamuni'a raḏi sengene.

³¹ Mada'a na'o siḏa-siḏa ngene wo mafikiri la-la mangale 'oru wo 'a'a, Ma Jou'ongu Madutu na sihukumu ngene ua.

³² Mada'a na'o wo sanga hukumu ra Ma Jou'ongu Madutu, gena-ge mangale Unanga 'o doto'o ngene, la awa ngene sanga hukumu kasingado-ngadolo i'a sirimoi reo ngowa'a 'aḏi ngaku Yesus ua.

³³ Sababu gena-ge, 'ari ioronongoḏu ngo-ngaku rimoi, na'o ni malomu di'a ni oromo re ni ka'e di'a ni si'elingi mangale Ma Jou 'ai se-sengene, balasu ni ma'u totoma matengo re matengo.

³⁴ Na'o 'age rema ngowa'a ga'a 'aḏi sawini, ananga balasu 'aḏi oromo siḏa tamanga wala. Dadi ni mete'e 'ari 'atoranga gena-ge na'o ni malomu, la ninga lo-lomu gena-ge 'i sigasa ngini toma ḏosa ua, dadi Ma Jou'ongu Madutu nu sihukumu ua. Re 'ori i'a ma lelegu, ngoi ta sitarangi na'o dadunu to sapolo moju.