1 Korintus 10 - Jaji ma Su-sungi

Si'elingi mangale jou'ongu ma somoara

^1-2 Ioronongoḏu ngo-ngaku rimoi, ngoi tini si'elingi ngini 'oru ga'a 'i dadi ḏua tananga ete re dotumu, wakutu ananga 'aḏi mete'e 'a Musa. Ananga mo-moini kakamo ya'u saolo toma daeraha dongi-dongi re wakutu mo-moini 'aḏi iwanga Ngoloto Kolili manga rou 'i oḇoso ua. Wakutu ananga mo-moini 'aḏi iwanga Ngoloto Kolili re kakamo ya'u saolo, gena-ge 'i ma tero sa'olo ananga mo-moini 'aḏi sanga baptis re 'aḏi dadi 'a Musa 'ai me-mete'e.

³ Ananga mo-moini 'aḏi oromo ngo-ngoromo da'u soroga tala,

⁴ re mo-moini 'aḏi ka'e ḇanyo da'u soroga tala. Ḇanyo gena-ge Ma Jou'ongu Madutu 'a sisupu toma maḏi ino, re maḏi gena-ge 'a Kristus ga'a ma'u mete'e ra ananga.

⁵ Kalaha so'o gena-ge, 'age ngowa'a manga repe tamanga sigolona ga'a Ma Jou'ongu Madutu 'o sanangi ua. Sababu gena-ge, ananga manga mayeti matai tukulangunu toma ngi'i dongi-dongi.

⁶ Gena-ge mo-moini 'i dadi sa'olo nana'o ra ngene, la awa wo nyafusu 'ori i'a ma jira ma tero sa'olo ananga.

⁷ Dadi ngene wo silamo'o re siḏubuso jou'ongu ma somoara awa, ma tero sa'olo tamanga sigolona ngowa'a mamuni'a ya si'a'a so'o gena-ge. Toma Boku 'Ofi-'Ofi 'i silefo so'o ne: “Ngowa-ngowa'a 'aḏi tegoro, ka'e re 'aḏi oromo. Togumu i'a 'aḏi roje-roje di'a silamo'o re siḏubuso jou'ongu ma somoara.”

⁸ Awa ngene wo 'a'a su-sudala ma tero sa'olo ngowa'a mamuni'a 'aḏi si'a'a so'o gena-ge tamanga sigolona. Sababu gena-ge, pa'i wange moi ḇato ananga 'aḏi sengene nga cala nyagi romoḏiḏi re cala ro'ange.

⁹ Awa ngene wo tai'i Ma Jou ma tero sa'olo tamanga sigolona ngowa'a mamuni'a 'aḏi si'a'a so'o gena-ge singadolo 'aḏi sengene sababu 'o cuku'u rema bisa ya'u tubu'u.

¹⁰ Awa ngene wo kuḏubungu ma tero sa'olo tamanga sigolona ngowa'a mamuni'a 'aḏi si'a'a so'o gena-ge singadolo mala'ekata ga'a sisengene ngowa'a ya'u sisengene ananga.

¹¹ Mo-moini gena-ge 'i dadi ḏua toma ngowa'a Israel sa'olo nana'o rimoi re ḏi'i ya silefo di'a si'elingi ngene, ga'a nange-ne wo 'ahu toma 'orasa ma ḏo-ḏogumu.

¹² Sababu gena-ge ioronongoḏu ngo-ngaku rimoi, na'o ni basono tala ninga ngo-ngaku lai te'e, balasu ma'istiari ino; awa-awa ni eta'a toma bo-baja!

¹³ Bo-baja ga'a ngini ni sanga, gena-ge ma tero sa'olo ngowa'a mo-moini ya sanga ḏi'i. Mada'a Ma Jou'ongu Madutu 'o sidaioranga 'Ai jaji ua. Unanga 'o simaha ua ngini ni sanga bo-baja ga'a kangela woḏi di'a ngini nga'unu ni tahana. Wakutu ni sanga bo-baja, Unanga 'o pula'a ngo'omo, la ngini ni dogo te'e dadi ni eta'a ua toma bo-baja.

¹⁴ Sababu gena-ge, ioronongoḏu ngo-ngaku rimoi ga'a ngoi tini dadalara, ni maki-kiḏanga silamo'o re siḏubuso jou'ongu ma somoara.

¹⁵ Ngoi to kanau ra ngini sa'olo ngowa'a 'akala soro'unu. Ngini masiretene balasu na dibanga 'ari demo gena-ge:

¹⁶ Ngini ni waro bolo ua, wakutu ngene wo 'oro sawo'o rimoi ma dara rema 'anggur kara wo sibere ie nanga murasa ma la ra Ma Jou'ongu Madutu, ngene wo sijumu mode-mode'e ngene rewo marimoi ra Kristus ga'a 'ai ngaunu 'i pa'ala di'a ngene?! Ngini ḏi'i ni waro bolo ua, wakutu ngene wo masibalangu roti re wo oromo, ngene wo sijumu mode-mode'e ngene rewo marimoi ra Kristus 'ai lese?!

¹⁷ Sababu roti pa'i ngai moi re ngene mo-moini wo oromo roti gena-ge. Dadi ngene ga'a nanga repe wo dadi nanga lese pa'i rimoi, re wo marimoi ra Kristus.

¹⁸ Ni tailako ngowa-ngowa'a Israel: Ananga sigae manga jou-jou di'a Ma Jou'ongu Madutu toma jou-jou ma kalero. Togumu i'a ananga 'aḏi oromo mamete'e manga jou-jou ga'a ya sipula'a nange-ge. Ngini ni waro bolo ua, wakutu ananga oromo so'o gena-ge, ananga 'aḏi ma'u rimoi matengo re matengo, re ḏi'i marimoi ra Ma Jou'ongu Madutu?!

¹⁹ 'Ari demo gena-ge ma maksudu 'oru: Jou'ongu ma somoara ma kuasa 'i cua. Re ngo-ngoromo ga'a sipula'a toma jou'ongu ma somoara, enanga gena-ge 'i sigasa bara'utungu ua!

²⁰ 'Oru ḇato ananga ya pula'a toma jou'ongu ma somoara gena-ge, 'aḏi pula'a di'a roh ma jira, di'a Ma Jou'ongu Madutu ua. Dadi ngoi to oḏu'u ngini ni marimoi toma roh ma jira.

²¹ Pa'i ni ka'e toma sawo'o ra Ma Jou, ni ka'e awa toma sawo'o toma roh ma jira. Pa'i ni oromo ra Ma Jou 'ai meja, ni oromo awa toma roh ma jira ma meja.

²² Bolo ngene mau wo si'a'a Ma Jou'ongu Madutu 'o ruta?! Bolo ngene lebe te'e reo Ma Jou'ongu Madutu dadi Unanga 'o sihukumu ngene ua?!

²³ 'Age ngowa'a mamuni'a ga'a 'aḏi kanau, “Ngene nyengara madaga'a 'oru ḇato.” Mada'a ngoi to kanau: Mo-moini ua rema faeda. 'Age ngowa'a mamuni'a ga'a 'aḏi kanau, “Ngene nyengara madaga'a 'oru ḇato.” Mada'a ngoi to kanau ḏi'i: Mo-moini ua nyengara 'i site'e ngowa'a manga ngo-ngaku.

²⁴ Ngini balasu ni 'a'a 'ori i'a ga'a 'i mete'e ngowa'a lelegu manga paralu. Awa ni 'a'a 'ori i'a pa'i ngini masiretene ninga paralu.

²⁵ 'Oru ḇato ga'a ngowa'a ya wu'unu toma pasara, wa oromo nyengara. Oromo ngo-ngoromo gena-ge reninga 'akala re sinyingara ma kanau 'i kangela awa.

²⁶ Sababu toma Boku 'Ofi-'Ofi 'i silefo so'o ne: “Dungia re ma dara mo-moini, Ma Jou'ongu Madutu 'ai 'ori i'a.”

²⁷ Sababu gena-ge, na'o ngini ni tagi sanga saele oromo toma ngowa'a ga'a ngaku Yesus ua, oromo ḇato ngo-ngoromo ga'a 'aḏi pula'a ra ngini. Ngini na disa waro awa na'o ngo-ngoromo gena-ge 'i sipula'a ḏua toma jou'ongu ma somoara, la ninga 'akala re sinyingara ma kanau 'i kangela ua.

²⁸ Mada'a, kalaha ngini ni waro oromo ngo-ngoromo gena-ge 'i wosono ua, na'o matengo i'a 'o kanau ra ngini, “Ngo-ngoromo nena-ne 'i sipula'a ḏua toma jou'ongu ma somoara,” awa na oromo! Sababu ngini balasu ni fikiri mangale unanga 'ai 'akala re sinyingara ma kanau ga'a siajele ra ngini mangale ngo-ngoromo gena-ge re ga'a 'o ta'ajiri oromo ngo-ngoromo gena-ge 'i wosono.

²⁹ 'Ari maksudu nena-ne: Mete'e ninga 'akala re sinyingara ma kanau, ngini nyengara ni oromo. Mada'a sababu ngini ni fikiri mangale unanga 'ai 'akala re sinyingara ma kanau, ni oromo awa. I'a sa'olo ngowa'a lelegu manga 'akala re sinyingara ma kanau 'i dola'aku ngoi di'a to 'a'a 'ori i'a ga'a ma rapu ua?!

³⁰ Na'o ngoi to oromo ngo-ngoromo re to pula'a murasa ma la ra Ma Jou'ongu Madutu, i'a sa'olo matengo i'a 'o sijuruhakimi ngoi di'a to 'a'a so'o gena?!

³¹ Dadi, 'oru ḇato ngini ni 'a'a - ni oromo bolo ni ka'e - ni si'a'a mo-moini, la ngowa'a 'aḏi silamo'o Ma Jou'ongu Madutu 'ai lomanga.

³² Awa ni 'a'a 'oru ḇato ga'a 'i si'a'a ngowa'a lelegu 'aḏi eta'a toma ḏosa; bae ngowa'a Yahudi, bae ngowa'a Yahudi ua, bolo ngowa-ngowa'a ra Ma Jou'ongu Madutu 'ai jama'ata.

³³ Gena-ge ma tero sa'olo ngoi ta 'a'a. Sababu gena-ge, ngoi to makutale to 'a'a ma la-la tau-taunu ga'a enanga 'i sisanangi ngowa'a mo-moini. Ngoi pa'i to 'a'a 'ori i'a ga'a ma la-la di'a pa'i ngoi ḇato ua. Mada'a to 'a'a 'ori i'a ga'a ma la-la di'a ngowa'a repe ḏi'i, la ananga mo-moini gena-ge ḏuanga i'a 'aḏi sanga salamata.