Luke 6 - Sangu: Isangu (snq) NT

Sesu aloonze mu dyaambu di wisi wukaloogi Basifu

¹ Mu wisi wukaloogi Basifu, Sesu ne bayikitsi baandi bayendenge mu nzile yivyogenge mu pwase banuungi. Bayikitsi baandi badokenge miluunde nuyange.

² Dikabu di bafwarisi bayambile yawu re: «Mugi yenu digonedoke miluunde mu wisi wukaloogu?»

³ Sesu ayagule yawu re: «Mayatsi re yenu dirange dyaambu divage David, wisi wu yane batu baandi bayulu nzale.

⁴ David ne batu babile naandi banyingene gu Ndagu Nzambi. Aboonge mape mayakusu Nzambi, ayi ne aveege bababile naandi, nisi nave siingise mugage dyo ke gu baveegitsi ba malagu.»

⁵ Sesu akoonde wuyambile nawu re: «Mwaane mutu, re Fumu wisi wukaloogu.»

Mutu wubile ne dikake dikateme

⁶ Wisi wususu wulooge, Sesu anyingene gu ndagu disaambulu, ne aloonzenge. Ve ganegare batu babayulungu musamu, gubile mutu ne dikake dimabagele dikateme.

⁷ Bateenditsi ba migage ne bafwarisi babeminenge Sesu, mulabe gane agubeeluse mutu wene mu wisi wulooge, mumbare babenenge disuge di wufurigile yandi.

⁸ Te Sesu wuyabenge mataase mawu ayambile dibagele dibile ne dikake dikateme re: «Teleme, ruge ve ganegare batu vave.» Ne ateleme ne agogule.

⁹ Kere Sesu ayambile nawu re: «Mugage wugonerume manenu nde muvage dinyi, vo nde muvage dibi mu wisi wulooge? Bweedi nde muyamune mutu vo nde mubokise?»

¹⁰ Abemine yawu bootsu, kere ayambile dibagele dibile ne dikake dikateme re: «Sukule dikake dyagu!» Asukule, ne dikake dyene dibeelugu.

¹¹ Te basupulitsi ba migage ne bafwarisi babasu ne kabu, ne bayambilenge yawu ne yawu mubene disuge dikevage yawu Sesu.

Sesu asoole digumi ne kime beyi

¹² Ve dikyesi dyene Sesu ayende gu yulu mukoongu musaambile. Amane dibati difwiimbe nusaambile Nzambi.

¹³ Ve gi wisi, Sesu atsitse bayikitsi baandi, asoole digumi ne babeyi, aveege yawu nduge re: bakime.

¹⁴ Mine mawu bile re: Simu yilugu ne Sesu re Pyere ne André mwaane ngwandi, Sak ne Sa, Filip ne Batelemi,

¹⁵ Mati ne Tome, Sak mwaane Alfé ne Simu yiroonde yobule tseengyandi,

¹⁶ Sude mwaane Sak ne Suda Iskaryote wugabe Sesu.

¹⁷ Sesu asunde nawu ne asikeme ve mulaandu. Dikabu dimbili bayikitsi baandi dibile vane. Ne vane ve bile piti yi batu bababurugu gu tseengi yotsu yi Sudé ne gu Serusalem. Bamosi baburugu gu mavule ma Tire ne Sidon gu tuungu mubu.

¹⁸ Baruge muyulu maambu maloonzenge yandi, ne mure Sesu akebeeluse yawu bambeedu bawu. Babaritsugungu maguge ne manyunyi mamabi, ne yawu gaandi babeelusu.

¹⁹ Batu bootsu babene wugaangilenge Sesu mumbare ngudi yivatenge mu yandi, yibeelusenge yawu bootsu.

Myule ne milogu

²⁰ Ve yulu vane Sesu abemine bayikitsi baandi nuyambile re: «Myule gu yenu masaandi, mumbare Bufumu bu Nzambi nde bweenu!

²¹ Myule gu yenu badigonerape nzale ne mapape, mumbare yenu digudile kure yimbili. Myule gu yenu badigonelile ne mapape, mumbare yenu diguseve.

²² Myule gu yenu ga batu bakole yenu, ga barune yenu, ga baseenge yenu, ga bapunze yenu, ne wuvagile yenu bumweenyi bububi mu dyaambu di Mwaane mutu.

²³ Veke labenge yenu maambu mene mootsu, labanu wunyi ne bilanu ne yinyunge, mumbare yenu diguveegu miseende mimbili gu yulu. Yabanu re nane re naritsugungu babigitsi maguge ne batayi bawu.

²⁴ Te milogu gu yenu bikiti, mumbare yenu dimamane wudile menu manyi.

²⁵ Milogu gu yenu badimayikure ne byootsu ne mapape, mumbare yenu diguyulu nzale. Milogu gu yenu badigoneseve ne mapape, mumbare yenu digubilenge ne rungile nulile mbili.

²⁶ Milogu gu yenu, ga batu bayambilile gu yenu ke maambu mamanyi. Nane gaandi re navagenge batayi bawu gu babigitsi ba wufure.

Diroonde gu bakolitsi

²⁷ Te mayambile yenu badigoneyulu maambu mami re: roondanu bakolitsi benu, vagilanu manyi gu babagonekole yenu.

²⁸ Veeganu myule gu yawu babagonedigene yenu. Saambilanu mu yawu babagonegyele yenu.

²⁹ Mutu ga adiimbe yu mu dibuge dimoosi, veege yandi ne dine. Mutu ga aboongile yu yigubuku gyagu ne mbabu, veege yandi ne kapagu.

³⁰ Gu wotsu wukevonde yu yivaave, veege. Mutu ga aboongile yu yivaave gyagu, yiyatombe yandi mu gabuse gyo.

³¹ Mootsu makaroondi yenu re batu bavagili yenu, vaganu munoongu wumoosi gu yawu.

³² Yenu ga diroonde ke babakaroondi yenu, ditaase re Nzambi aguveege yenu myula? Mumbare ne bange mabi bakaroondi ke babakaroondi yawu.

³³ Yenu ga divagile manyi ke gu babakavagili yenu manyi, ditaase re Nzambi aguveege yenu myula? Mumbare ne bange mabi bakavagi munoongu wumoosi.

³⁴ Yenu ga disoombise badole ke gu batu babakerungule wugabusile yenu, ditaase re Nzambi aguveege yenu myula? Nisi bange mabi bakasoombisi gaandi bange mabi mu gabusulu nzi yisoombise yawu.

³⁵ Te roondanu bakolitsi benu, vagilanu yawu manyi. Soombisanu gugataase wugabusulu, kere vane Nzambi Puungu aguveege yenu museende wumunene. Ne yenu digubile baane baandi, mumbare ayi wumunyi gu batu bootsu ne babanyi ne bababi.

³⁶ Labanu batu bootsu dingyebe nakalabi Tayenu.

Diyasosise bambaatsi

³⁷ Yenu diyasosise ne yenu dikeresosusu. Diyaveege batu mbele ne yenu dikereveegu mbele. Siingilanu batu kokolu ne Nzambi akesiingile yenu kokolu.

³⁸ Veegenganu bivaave bibinyi gu batu ne Nzambi aguveege yenu bimbili. Ne yandi agubase poonzyenu ne tsutsuru. Nzambi aguyetsige manenu ne gyetsugu gi dikayetsigi bambaatsi.»

³⁹ Sesu abetwile yawu noongu re: «Nge pafu arungule wuyenze nge pafu ga yandya? Yawu bootsu babeyi mbe bagulage gu dibile.

⁴⁰ Wuki muyikitsi asakerungule wuvyogilile muloonzi wandi. Te muyikitsi wotsu wumaditige mootsu maloonzu yandi, agubile ga muloonzi wandi.

⁴¹ Mugi yigonebemine yigyegise gi gu diisu di mbaatsyagu, te yisegonelabe murwale wu gu dyagu?

⁴² Tsenyi yirungule yambile mwaane ngwagu re: “Mwaane maame, siise maburuli yigyegise gi gu diisu dyagu”, te murwale wu gu diisu dyagu, yisegonelabe wo? Ga yisalabe murwale wu gu diisu dyagu, tsenyi yigurungule burule yigyegise gi gu diisu di mbaatsyagu? Yifutsi, burule kinde murwale wu gu diisu dyagu, kere vane yigulabe yigyesise gigu diisu di mwaane ngwagu ne velee.»

Muyikitsi wungyenze

⁴³ Sesu abekoonde wuyambile yawu re: «Mwiri wumunyi wuserungule wubure miluunde mimibi, vo mwiri wumubi wurebure miluunde miminyi.

⁴⁴ Mwiri wotsu wukayabunu ke mu miluunde myandi. Basakerungule wudooke banyiinge mu dikwake di ifuundi, vore bilili gu dikwake di misuumbe.

⁴⁵ Mutu wumunyi akapusi maambu mamanyi mabase gu murime wandi; ne mutu wumubi akapusi maambu mamabi mabase gu murime wandi. Mumbare maambu mabaase gu murime, re makayambili mune.

Ndagu beyi

⁴⁶ Mugi yenu dikatsitsi me re: “Fumu, Fumu!”, ne mane yenu disakavagi makayambili me?

⁴⁷ Maguritsige yenu yibagunu gi mutu wotsu wukayitsi gu me: Akayulu maambu mami ne akavagi mo.

⁴⁸ Ayi ga mutu wugoneruunge ndagu: Adoongise mikikile mi yibuge gyandi nguu ne mu dimanyi, nubaande wumakise ndagu. Ve ruge nyidu, mwaambe wubase ne maambe magubegene mu ndagu, te yisetsukeme, mumbare yo yiruungu bweedi.

⁴⁹ Te wukeyulu maambu mami, nubuse wuvage na yambile mo, ayi ga mutu wuruunge ndagu ve yibuge gigabuku mikikile, ve ruge nyidu, mwaambe wubaase, maambe magubegene mu ndagu, vane ne vane ndagu yotsu yibuundugu.»