Luke 4 - Sangu: Isangu (snq) NT

Sesu agwaarile mu dimaangu

¹ Ve burugu Sesu gu Surde abile wubasu ne Dinyunyi Disuungeme, ne Dinyunyi dyene diyenze yandi gu kumu.

² Guune, amaangu ne mukolitsi mu magumi mamane ma batsufu ne aseyi mu batsufu tsyene, ve vu batsufu tsyene ayulu nzale.

³ Kere vane mukolitsi ayambile yandi re: «Mumbare yire Mwaane Nzambi, rume dimanyi didi dikalugi dipe.»

⁴ Sesu agabusile yandi re: «Diteendu gu maambu ma Nzambi re: “Monyu wu mutu sake muyi dipe piinze.”»

⁵ Kere vane mukolitsi ayende naandi guga yulu. Vane ne vane aritsige yandi batseengi tsyotsu tsi buloongu,

⁶ ne wuyambile re: «Maguveege yu busine ne bunduumbe bu batseengi tsyene. Mare wuveegu bine byootsu ne marungule wuveege byo gu wotsu wumakeroonde.»

⁷ Kagu ga yibondimine me, maguveege yu bivaave byene byootsu!

⁸ Sesu amugabusile re: «Diteendu mu maambu ma Nzambi re: Bondimine ke Fumwagu Nzambi, ne salile ke yandi piinze.»

⁹ Ve yulu vane mukolitsi ayende naandi gu Serusalem, anakige yandi gu yulu mwaanze wu Ndagu Nzambi. Ne amuyambile re: «Ve yu Mwaane Nzambi, vele ne gu tsi!

¹⁰ Mumbare diteendu gu maambu ma Nzambi re: Nzambi agurume bakime baandi bagu yulu mukyele yu.»

¹¹ Ne vane baguyake yu mu myogu myawu mure yikere gubegane gyoru mu dimanyi.

¹² Sesu agabusile yandi re: «Diteendu mu maambu ma Nzambi re: “Yiyamaange Fumwagu Nzambi.”»

¹³ Ve vu masuge mootsu mumaange Sesu, mukolitsi aburugu ve yandi kwanga ne mu dikyesi dimosi diyelimine dikeroonde Nzambi.

Sesu abaande mudyanzu wandi gu Galilé.

¹⁴ Sesu agabuge gu Galilé wubasu ne ngudi yi Dinyunyi Disuungeme. Tsaangwandi yitsamugu mu museengi wotsu.

¹⁵ Aloonzenge gu bandagu tsi bibeengunu bi masaambulu, ne batu bootsu bakumisenge yandi.

Sesu abusu ne baandi

¹⁶ Wisi wumoosi Sesu ayende gu Nasarete gu bungugu yandi. Mu wisi wukaloogi Basifu anyingene gu ndagu disaambulu navagenge yandi ne kale. Ne ateleme murange mabigu.

¹⁷ Baveege yandi mugaande wu mubigitsi Isayi, anyangule wo ve yitsige giteendu re:

¹⁸ «Dinyunyi di Fumu diyi mu me, mumbare asoole me muyende guloonze tsaangu yiyinyi gu masaandi. Asindige me muyambile bisi tsugu re yenu dimayobugu, ne gu bange pafu re miisu menu mamabalugu, asindige me muyobule babagoneritsugu maguge.

¹⁹ Muloonze re: Yilime gigi re gikelabe batu bootsu manyi ma Fumu.»

²⁰ Ve yulu vane Sesu afurige mugaande, agabuse wo gu musalitsi, ne atsagele. Batu bootsu bababile gu ndagu disaambulu, miisu mawu mabile keke mu yandi.

²¹ Kere vane Sesu abaande wuyambile yawu re: «Mabigu mameyulu yenu mateendu mu mugaande wu Nzambi mamesupuge ne munyi.»

²² Bootsu bayambilenge bumweenyi bwandi ne bagibeme mu munoongu mabigu ma manyi maloonzenge yandi. Bayubulenenge re: «Wuwu sare mwaane Susefwa?»

²³ Sesu ayambile yawu re: «Mayatsi re yenu diguverile me noongu re: “Mubugitsi sabeelusi yibene.” Ne yenu digubeyambile me re: “Yetu ditseyulu tsaangu yi bimwiile byootsu bitsevage yu gu Kapernawum, sakoondi wuvage byo gu diimbu dyagu.”»

²⁴ Abekoonde re: «Nungyenze mayambile yenu, mubigitsi asakagobusu gu diimbu dyandi.

²⁵ Nungyenze mayambile yenu, mu dikyesi di mubigitsi Ili, gubile mbili bakwiili gu Israel, ve Nzambi asikige fule mu bilime bireru ne yirini, ne nzale yi yinene yidugulu mu tseengi yotsu.

²⁶ Ili asesindugu gu bakwiili bootsu ba Israel veengu gu mukwiili wu mweenyi, mwisi Sarepta gu museengi wu Sidon.

²⁷ Ne mu dikyesi di mubigitsi Ilisé gubile mbili batu ne makyedi gu Israel te gu yawu bootsu gusebeeluge mutu nisi wumoosi, veengu Naame mwisi Siri.»

²⁸ Ve yulu batu bootsu bababile gu ndagu disaambulu maambu mene, babase ne kabu.

²⁹ Yawu bateleme, bapunze Sesu gu diimbu ne bayende naandi gu yulu mukoongu wurungu Nasarete divule dyawu, muroonde wulikule yandi gu mbeengi.

³⁰ Te Sesu agyelugu, avyoge veganegarawu nuyendenge.

Sesu apunze dinyunyi didibi

³¹ Kere vane Sesu agulumuge gu Kapernawum, divule di museengi wu Galilé; ne aloonzenge batu wisi wukaloogu.

³² Bavure gibeme mumbare aloonzenge ne dinyaange dyotsu.

³³ Gubile mutu ne dinyunyi didibi gu ndagu disaambulu gu lonzenge Sesu ne yandi abwamugu pepe re:

³⁴ «O Sesu mwisi Nasarete, yiyagogule gu yetu, duke gune, mayatsi re yimitse nde gubunge yetu ne yire wuyelimine, yu wutsesoolu ne Nzambi!»

³⁵ Sesu abetile dinyunyi dyene, amuyambile re: «Rumbe, pule gugare mutu wuwu!» Ne dinyunyi di dibi divate, ne dilagise mutu ve ganegare piti gugayulusu yandi pyavi.

³⁶ Bootsu bavure gibeme ne bayambilenge yawu ne yawu re: «Nungyenze maame mabigu mane ngudi, agonerume ne dinyaange ne ngudi gu manyunyi mu wupule. Ne mo marepule!»

³⁷ Ne tsaangu yi Sesu yidugulu bitsige byootsu bi museengi.

Sesu abeeluse babeetsi

³⁸ Ve vate Sesu gu ndagu disaambulu, anyingene gu ndagu yi Simu. Adagise boyi bu Simu bu mugyetu abile ne yidine girage, ne vane bange ndagu baleende Sesu mubeeluse yandi.

³⁹ Aviindemine yandi nubetile yidine, ne gyo givu. Vane ne vane ateleme, ne abaande laambile yawu.

⁴⁰ Ve diviindemunu di wisi, bootsu bababile ne batu bane mabeelise ma minoongu minoongu babage yawu gu Sesu. Asunzile mutu mutu makake nubeeluse yawu.

⁴¹ Manyunyi mamabi gaandi mavate mu mbili batu ne wubwamugu re: «Yinde Mwaane Nzambi!» Te abetile mo nukare mo wuyambile, mumbare manyunyi mene masetsiimbungu re yandi re Wusoolu ne Nzambi.

Sesu aloonzenge mu bandagu ba masaambulu

⁴² Ne magyelu, Sesu avate gu divule, nuyende ve yitsige gigabile batu. Mbili batu bamubenenge, bapule ve yandi, baroonde re abilingi ke nawu.

⁴³ Te ayambile yawu re: «Bweedi mareyende guloonze tsaangu yiyinyi yi Bufumu bu Nzambi gu miseengi mimosi mumbare gine re yisalu gisindugu me ne Nzambi mudyanze.»

⁴⁴ Kere vane, aloonzenge mu bandagu ba masaambulu tsi museengi wu Sudé.