Luke 24 - Sangu: Isangu (snq) NT

Sesu araambugu gu difu

¹ Wisi wumareege wu tsonu, bagyetu bene bayende gu ngile, babage maatsi ne miyoombu bi tsulu yiyinyi biguumbe yawu.

² Badagise dimanyi ditsibugu ngile dimabundumusu ne ve tuungu.

³ Yawu banyingene, te basedagise nyuru yi Fumu Sesu.

⁴ Babile bamatsapulu. Vane ne vane babagele babeyi ne bidwaari bingayime basundigile yawu.

⁵ Bagaangu ne wome ne baviindige bambalenge bawu mu tsi; babagele bene babeyi bayambile yawu re: «Mugi yenu digonebene ve ganegare babafu wuyi monyu?

⁶ Asa gugu, atsefwangugu. Bangulanu mabigu mayambile yandi yenu ve nenebile yandi gu Galilé:

⁷ “Bweedi re Mwaane mutu aregabu mu makake ma batu bababi, aregomunu mu kurusu ne mu wisi wu mureru, agufwanguge.”»

⁸ Ne vane, bagyetu babangule mabigu ma Sesu.

⁹ Baburugu gu ngile ne bayende nyigule mootsu mane gu digumi ne muyikitsi wumoosi ne gu bayikitsi bane bootsu.

¹⁰ Bile re Mari mwisi Magedala ne Sane ne Mari nguyi Sak ne bagyetu bamosi bababile nawu. Banyigule munoongu wumoosi gu bakime ba Sesu.

¹¹ Te bakime ba Sesu bataasenge ke re magoneyambile bagyetu ke magyayugu ne basebile ne gitu mu yawu.

¹² Ne vane Pyere araambugu ne ayende bambaangu gu ngile. Apule, avindeme ne alabe keke bireende bifuuge bikatu nyuru Sesu ve tsi. Kere vane, agabugu gu mbugandi, agibeme time mbili mu dyaambu divyoge.

Bayikitsi babeyi babeengunu ne Sesu

¹³ Mu wisi ke wo, bayikitsi babeyi bayendenge gu diimbu dilugu re Emayuse, vale ne Serusalem mu magwere mabeyi ma mweendu.

¹⁴ Bayambilenge yawu ne yawu mu maambu mootsu mavyoge.

¹⁵ Ve yambilenge yawu ne yawu, Sesu yabene agogule ne apute yiloonge nawu.

¹⁶ Bayikitsi balabe Sesu, te basebeyabe yandi.

¹⁷ Sesu atombe yawu re: «Magoneyende yenu nuyambile nde gi?» Basikeme bootsu ne munyoongu.

¹⁸ Wumoosi ve ganegarawu wulugu re Kelopase ayagule yandi re: «Bisi Serusalem bootsu bayatsi maambu matsevyoge mu batsufu tsitsi! Ne yipiinze yiseyabe mo?»

¹⁹ Ayagule yawu re: «Mo gi?» Bayagule yandi re: «Matsevyoge mu Sesu mwisi Nasarete, beetsi nde mubigitsi wumunene. Mabigu mandi mabeetsi ne ngudi ne atsevagenge time maambu ma bimwiile ve wusu Nzambi ne ve wusu batu bootsu.

²⁰ Bivuunde byetu bi baveegitsi ba malagu ne bivuunde byetu bi buloongu bagabe yandi mure akeboku nugomunu ve kurusu.

²¹ Yetu dibetsingi ne gitu re yandi re wukeyobule Israel. Te labe gukende tsufu yireru vetsevyoge maambu mene.

²² Nungyenze, dikabu di bagyetu ve ganegare manenu batsevure gibemise yetu. Babeetsi ne gayipali gu ngile.

²³ Basadagise nyuru Sesu ne batsitse yambile yetu re: “Bakime ba Nzambi batsetutugile yetu ne batseyambile yetu re: Sesu ayimonyu!”

²⁴ Dikabu di batu bababile netu bayende gu ngile. Yawu gaandi badagise ke naveyambulu yawu ne bagyetu, te baselabe Sesu.»

²⁵ Ne vane ayambile yawu re: «Batu bagane buyedi be, mirime myenu mike page wubile ne gitu mu mootsu malubuse babigitsi!

²⁶ Wusoolu ne Nzambi ne ginene nyingene gu bunduumbe bwandi, bweedi arenenelabe maguge ma munoongu wene.»

²⁷ Kere Sesu anyigule yawu mootsu mateendu mu dyaambu dyandi, gu migaande mi Nzambi. Baande gu migaande mi Nzambi arume Muyise muteende, kwanga ne gu migaande myootsu mirume yandi babigitsi muteende.

²⁸ Ve pule yawu bebele ne diimbu diyenda yawu, Sesu aregile mawusu mu wuyelige yende vale nawu.

²⁹ Te babagele babeyi bayambile yandi re: «Bile netu! Wisi wumayide, ne dibati dimagogule.» Sesu anyingene gugare ndagu mubile nawu.

³⁰ Atsagele ve take nawu mu wuyi, aboonge dipe nugabuse dinyi gu Nzambi. Kere atabule dyo ne wuveege yawu.

³¹ Ne vane miisu ma bayikitsi mabalugu ne bayabe Sesu. Te vane ne vane, atsyemugile yawu.

³² Bayambelenenge yawu ne yawu re: «Nungyenze, betsi time ga mbaawu yitselulenge gugare mirime myetu ve yandi atseyambilenge yetu mu nzile ne wusupulile yetu mireendu mi maambu ma Nzambi.»

³³ Baraambugu ne bagabugu mu digwere dyene gu Serusalem. Badagise digumi ne muyikitsi wumoosi mbure moosi, yawu bootsu ne batu bababile nawu.

³⁴ Bootsu bayambile bayikitsi babeyi re: «Nungyenze, Fumu atsefwangugu! Simu atselabe yandi.»

³⁵ Bayikitsi babeyi banyigule bambaatsi maambu mavyoge mu nzile ne bayambile re: «Ditseyabe Sesu keke mu dikyesi di yandi atsegabile yetu dipe.»

Sesu atsoombugile bayikitsi baandi

³⁶ Ve yambilenge yawu nane, Sesu yabene atsoombugile yawu ve ganegare ne ayambile yawu re: «Polu yibili nenu!»

³⁷ Bayikitsi baparemugu ne balabe wome, bataase re bamalabe nde mukuyi.

³⁸ Te ayambile yawu re: «Mugi yenu dimaparemugu? Mugi yenu dine bapage mu mirime myenu?

³⁹ Beminanu makake mami ne byoru byami, ke time me! Gaangilanu me ne moniganu me! Mukuyi asaandi ne musonyi, nisi ne bivisi navegonelabe yenu me!»

⁴⁰ Mu mabigu mene, Sesu aritsige yawu makake ne byoru byandi.

⁴¹ Bayikitsi babase ne yinyunge ne bagibeme mbili; basenenekuunze wubile ne gitu. Kere Sesu atombe yawu re: «Yenu disaandi ne biwuyi gugwa?»

⁴² Baveege yandi yirini gi yibere gi gaangu.

⁴³ Yandi aboonge gyo ne ayi ve wuswawu.

⁴⁴ Kere vane ayambile yawu re: «Ve betsingi me kike nenu, mayambile yenu re: mootsu mayambile migage mi Muyise ne migaande mi babigitsi ne migaande mi Miimbu mu dyaambu dyami, byootsu bine gabiselabene.»

⁴⁵ Ne vane, Sesu atsibule buyedi bwawu mure bakeditige mabigu ma Nzambi, mateendu.

⁴⁶ Ayambile yawu re: «Yulwanu mabigu mateendu mu migaande miminyi: Wusoolu ne Nzambi agulabe maguge ne mu wisi wumureru, afwanguge.

⁴⁷ Bweedi re musamu wumunyi wuloonzu mu ndugami mu batseengi tsyotsu, baande gu Serusalem re: “Kalulanu buyedi ne Nzambi agusiingile yenu kokolu mu mabi menu!”

⁴⁸ Yenu re bimweenyi bi mootsu mane.

⁴⁹ Magusindigile yenu ndagi yisiise Tate, te gu yenu, bilanu gugare museengi, kwanga ne vekesundugulu yenu ne ngudi yi Nzambi.»

⁵⁰ Kere Sesu abage yawu gu tselu yi Betani. Asiimbule makake mandi muveege yawu myule.

⁵¹ Mu dikyesi disiimbule yandi makake mu wuveege yawu myule, ayagene nawu ne amake gu yulu.

⁵² Mu dikyesi dyene bayikitsi bagitse Sesu. Kere vane, bagabugu gu Serusalem ne yinyunge gi mbili.

⁵³ Ve pule yawu guune, babilenge makyesi mootsu ke gu ndagu Nzambi ne wugitsenge Nzambi.