Luke 23 - Sangu: Isangu (snq) NT

Sesu va wusu Pilate

¹ Ve yulu vane yawu bootsu bateleme ne babage Sesu ve wusu Pilate.

² Babaande wufurigile yandi maambu re: «Yetu ditsedagise dibagele didi asive batu ba diloongu dyetu mu wutumbise mulwaani. Agonekale yawu wuvaane lepu gu Sesar. Agonememe mu yabene re: yandi re Wusoolu ne Nzambi, yandi re Maate.»

³ Pilate adume yandi nzidu re: «Yire yivuunde gi Basifwa?» Sesu ayagule yandi re: «Yibene re wumayambile dyo.»

⁴ Pilate ayambile bivuunde bi baveegitsi ba malagu ne piti re: «Masadagise dyaambu didibi nisi dimoosi muveege yandi mbele.»

⁵ Te batu bagonesigimise re: «Gugare wuloonze wandi agonesive batu mu wulwaane. Abaande gu Galilé ne gu Sudé yotsu, kere vane amitse ne gunu.»

Sesu ve wusu Irode Atipase

⁶ Ve yulu Pilate nane, atombe mu wuyabe ga mutu wene bile nde mwisi Galilé.

⁷ Batu bayagule yandi re: «Sesu mwisi Galilé.» Irode Atipase yivuunde gi museengi wene abile batsufu tsyene gu Serusalem. Pilate nuyabe nane asindige Sesu gu Irode.

⁸ Irode alabe Sesu. Alabe wunyi wu mbili mumbare avureyulungu batsaangu ba maambu mavagenge yandi, abenenge wubeengunu naandi. Ataasenge re gotsu Sesu aguvage bimwiile ve wuswandi.

⁹ Irode adume yandi mbili banzidu, te Sesu asegabusile yandi dyaambu.

¹⁰ Bivuunde bi baveegitsi ba malagu ne bivuunde bi bateenditsi ba migage babile vane. Bafurigilenge yandi mbili maambu ne diragise.

¹¹ Irode ne migole myandi baseenge Sesu ne wudete yandi. Mu dyo, badwiise yandi munene yiliinge gi ne vuvulu, basindige yandi gu Pilate.

¹² Ne kale Irode ne Pilate basenoongenge, te mu wisi wene babile ne yinoongu.

Sesu aguboku guga mbele

¹³ Pilate agukige bivuunde bi baveegitsi ba malagu, barumitsi ne bivuunde bi batu bootsu.

¹⁴ Ayambile yawu re: «Yenu ditsebagile me dibagele didi nu wufurigile yandi re agonesive batu betu mulwaane dibaadi. Labanu matsedume yandi banzidu ve miisu menu, masalabe dyaambu di mbele nisi dimoosi mu mootsu matsefuunde yenu yandi.

¹⁵ Irode ne yandi gaandi asalabe dyaambu mumbare atsegabuse yandi gu me. Dibagele didi asavage dyaambu dibive dikeboku yandi.

¹⁶ Kagu makediimbise yandi ne banganzi kere vane makenyangumuse yandi.» [

¹⁷ Mu diyayi dyotsu divagungu Pake, Pilate apusilenge yawu mutu wumoosi gu tsugu.]

¹⁸ Te batu bootsu babwamugu re: «Bokise dibagele didi, pusile yetu Barabase!»

¹⁹ Barabase anyingusu gu tsugu mumbare aboke mutu gugare mulwaani wubile gu divule ne bisi Rome.

²⁰ Pilate aroondenge wunyangumuse Sesu, mu ditaase dyene, abekoonde yambile ne piti.

²¹ Te batu bootsu babwamugu re: «Gominanu, gominanu yandi ve kurusu!»

²² Pilate abeyambile di mureru re: «Dyaambu dibive ditsevage dibagele didi nde gi? Masegonelabe mbele mu wubokise yandi. Kagu magudiimbise yandi ne banganzi, kere make nyangumuse yandi.»

²³ Te batu bakoonde wubwamugu pepe re Sesu agomunu ve kurusu, muufi mawu mavyogilile ngudi.

²⁴ Ne vane Pilate asiingise dyaambu divonde piti.

²⁵ Irode apuse Barabase gu tsugu nane gi, asunzu gu tsugu nde mumbare aboke mutu dikyesi di mulwaani wu dibaadi ne bisi Rome. Pilate ayakise Sesu gu piti nuyambile re: «Vaganu yandi naroonde yenu.»

Sesu agomunu mu kurusu

²⁶ Migole bapapise Sesu kurusu ne bayende naandi. Mu nzile babeengunu ne Simu mwisi Sirene wututugungu gu banuungi baandi, bapapise yandi kurusu yi Sesu ne barume yandi mu wulaande yandi ne yo.

²⁷ Yiloonge gi batu gilaandenge yandi, kere bagyetu balilenge ne bakayigenenge mu yandi.

²⁸ Sesu agingugu gu yawu nuyambile re: «Bagyetu ba Serusalem, yenu diyalile mu me! Lilanu nde mu yenu bene ne mu baane benu.

²⁹ Nungyenze dikyesi dikeke bebele dikeyambilenge batu re: “Myule gu bigumbe, myule gu babasamabure ne gu babasamenwiise.”

³⁰ Ne vane batu baguyambilenge mikoongu re: “Minigilanu yetu.” Ne baguyambilenge banutu re: “Sweeganu yetu.”

³¹ Vingere, batu ga bavage mane gu mwiri wumonyu, ake gu mwiri wuyumugu baguvage nde tsenyi?»

³² Bayende ne miboongi mibeyi ne Sesu mu wuboke yawu yitsige gimoosi.

³³ Ve pule yawu ve mbure yilugu re yivaanze, migole bagomine Sesu mu kurusu. Bagomine gaandi ne miboongi mibeyi. Wumoosi tselu yi mabagele mandi, wune tselu yi magyetu.

³⁴ Sesu ayambile re: «Tate, siingile yawu kokolu mumbare baseyabe magonevage yawu.» Migole bavage yikanugu mugabene bidwaari byandi yawu ne yawu.

³⁵ Batu ba buloongu babile ke vane nubeminenge. Bivuunde bi Basifu basevenge Sesu nuyambilenge re: «Yandi ayobulenge bambaatsi, sa ayobuli yabene, ga nungyenze yandi re Wusoolu ne Nzambi.»

³⁶ Migole gaandi ne yawu basevenge Sesu, bagogule ve mbarandi ne baveege yandi malamu ma nganyi.

³⁷ Ne bayambilenge re: «Ga yire fumu Basifu sa yobuli yibene!»

³⁸ Mireendu mimi mibile miteendu ve kurusu ve yulu muru wandi re: «Wuwu re Maate ma Basifu.»

³⁹ Muboongi wumoosi wugomunu naandi ve kurusu aseengenge Sesu re: «Yisare Wusoolu ne Nzambya? Yobuge yibene yike yobule ne yetu.»

⁴⁰ Te wune aseembe mbaatsi nuyambile re: «Yisaandi ne wome wu Nzambi, yu wugonekilusu munoongu wumoosi nandya?

⁴¹ Gu managu dine mbele. Dirungule wukilusu, mumbare dibuke maambu mabive. Te yandi asavage dyaambu dibive nisi dimoosi.»

⁴² Kere ve yulu vane, ayambile Sesu re: «Yiyalibene me vekeruge yu gu Bufumu bwagu.»

⁴³ Sesu ayagule yandi re: «Nungyenze mayambile yu re, nemunyi wuwu, yigubile nami gu yitsige gi polu gu yulu.»

Difu di Sesu

⁴⁴ Mudikyesi dikabili dyumbi mu yulu myuru, nyangu yitsime diviseme disunde mu tseengi yotsu kwanga ne mu magwere mareru matsisige.

⁴⁵ Dyumbi ditsime mu tseengi yotsu. Duumbu dibile dilelugu gu Ndagu Nzambi dikakugu ve ganegare.

⁴⁶ Sesu abwamugu pepe re: «Tate, mayakise yu dinyunyi dyami mu makake magu.» Ve mane yandi wuyambile nane, afu.

⁴⁷ Yivuunde gi kame migole mi Rome ne wulabe matsevyoge, ayambile re: «Dinyi gu yu Nzambi! Nungyenze mutu wuwu abeetsi wusuungeme.»

⁴⁸ Piti yotsu yidugesene vane, balabe mootsu matsevyoge ne bagabugu ne wudumenge batulu ne munyoongu.

⁴⁹ Batu bootsu babayabenge Sesu ne bagyetu babalaandenge yandi baande gu Galilé, bateleme gu vale kere bebeminenge mootsu mavyogenge.

Susefu asunze Sesu gu ngile

⁵⁰ Vane, vebile mutu dine dyandi Susefu, mwisi Arimaté divule di Basifu. Yandi abile gu dikabu di bivuunde bi migage mi dibuundu. Dibagele dyene abile wumunyi ne wusuungeme.

⁵¹ Avingilenge Bufumu bu Nzambi. Susefu asesiinge bumbaanze butabule bine bivuunde ne maambu mavage yawu.

⁵² Ayende gu Pilate mutombe nyuru Sesu.

⁵³ Kere vane aburule nyuru Sesu nusunze yo gu ngile yimoone yiganene veru mutu yibuku gu dimanyi di yilale.

⁵⁴ Bile re wisi wu guumbwa bivaave bi wisi wulooge.

⁵⁵ Bagyetu babalaandenge Sesu baande gu Galilé bayende gu Susefu. Babeminenge ngile mu wulabe nakesunzu nyuru Sesu.

⁵⁶ Kere vane bagyetu bagabugu gu bambuge bawu mu wuguumbe maatsi ne miyoombu mi tsulu yiyinyi bi fuumbi. Ve yulu vane balooge nave teendu dyo mu migage, mu wisi wulooge.