Luke 22 - Sangu: Isangu (snq) NT

Paangu mu wuboke Sesu

¹ Diyayi di mape magarufuge dibile keke bebele. Ne dyo dikatsitsu re Pake.

² Bivuunde bi baveegitsi ba malagu ne bateenditsi ba migage babenenge disuge di wubokise Sesu, te balabe wome batu.

³ Ne vane Sate anyingene gugare murime wu Suda wukatsitsu re Iskaryote, wubile gugare digumi ne babeyi di bayikitsi ba Sesu.

⁴ Ayende gu yulusunu ne bivuunde bi baveegitsi ba malagu ne bi bakyelitsi ba Ndagu Nzambi, mu wubene disuge di wugabe Sesu.

⁵ Bivuunde balabe wunyi ne bapute paangu mu wuveege Suda badole.

⁶ Suda asiinge ne abene dikyesi diyelimine mugabe Sesu gugayabise piti.

Sesu alaambise yilaambu gi Pake

⁷ Wisi wu diyayi dikayu mape magarufuge ne dikaboku mwaane yindombe mu yilaambu gi Pake wupule.

⁸ Sesu asindige Pyere ne Sa nuyambile re: «Yendanu gu laambile yetu yilaambu gi diyaye di Pake.»

⁹ Yawu batombe Sesu re: «Yetu diyelaambe gyo nde gunyi?»

¹⁰ Ayagule yawu re: «Vekepule yenu gu divule, digubengunu ne dibagele ne tsuve maambe gu yulu muru. Laandanu yandi nguu ne gu ndagu yikenyingene yandi.

¹¹ Yambilanu nge ndagwene re: “Muloonzi agonetombe yu re: Itsige gikeyi mane bayikitsi bami yilaambu gi Pake ginde gunyi?”

¹² Dibagele dyene aguloonze yenu yirini giginene gi ndagu ndeki, gine bivaave byootsu biduge. Guuna re gukelaambe yenu gyo.»

¹³ Ne vane bayende. Badagise maambu mootsu nayambulu yawu ne Sesu ne balaambe yilaambu gi Pake.

Yilaambu gi Fumu

¹⁴ Ve pule digwere diwuyi, Sesu ne bayikitsi baandi batsagele ve take.

¹⁵ Sesu ayambile yawu re: «Neginene labe maguge, mabile ne nzale yiyinene muyi yilaambu gi Pake gigi nenu.

¹⁶ Te mayambile yenu nungyenze, masakebeyi yilaambu gyene kwanga ne mu wisi wu Nzambi yabene aguveege gyo gu Bufumu bwaandi.»

¹⁷ Kere vane bayikitsi baveege Sesu ibuungu gi malamu. Aboonge gyo ne agabuse dinyi gu Nzambi, kere ayambile yawu re: «Boonganu ibuungu gi malamu gigi gabenanu.

¹⁸ Te mayambile yenu nungyenze, masakebenu malamu maame kwanga ne vekeruge Bufumu bu Nzambi.»

¹⁹ Kere vane aboonge dipe. Ve mane yandi wugabuse dinyi gu Nzambi, atabule dipe ne agabile bayikitsi nuyambile re: «Dipe didi re nyurwani yikeveegu mu yenu. Yangenganu dyo mu wutasilenge me.»

²⁰ Ve mane yawu wuyi, Sesu aboonge ibuungu gi malamu, ayambile re: «Malamu maame re yinoongu gimoone ve ganegare Nzambi ne batu baandi mumbare maluungu mami magutsole mu yenu.

²¹ Te yabanu re, mutu wukegabe me agoneyi nami vave.

²² Nzambi amaneyambile re: Mwaane mutu agufu. Te mulogu gu mutu wukegabe yandi!»

²³ Ne vane bayikitsi babaande tombene yawu ne yawu re: «Wukerungule wuvage dine dyaambu ve pwase manenu nde nyi?»

Wuvyogilile buvuunde nde nyi?

²⁴ Kere vane bayikitsi babile ne musosu wumunene mu wuyabe ve ganegarawu nyi wuvyogilile buvuunde.

²⁵ Sesu ayambile yawu re: «Bamaate ba buloongu baroonde wutsare batu bagutsi dirumu dyawu, ne bange dinyaange bakaroondi wutsitsungu re batu babanyi.

²⁶ Yenu diyavage ga yawu. Te wuvyogilile buvuunde abili ga mwaane ngyebe, ne wugonerume abili ga musalitsi.

²⁷ Vavene, wuvyogilile buvuunde nde wugoneyi vore nde musalitsi wugonebage kure? Nde wugoneyi. Nisi nave me muloonzi wenu, mayi ve ganegarenu ga musalitsi.

²⁸ Yenu ditsetsagelenge nami vetselabenge me maguge.

²⁹ Re dibaandu nave veegu me Bufumu ne Tate ne me gaandi maveege yenu bwo.

³⁰ Ne vane yenu diguyi ne wunu nami gu Bufumu bwami, yenu digutsagele mu bakwaange mu wusosise digumi ne bibaandu bibeyi bi baane ba Israel.»

Pyere alubusu

³¹ Sesu atsitse Simu Pyere nuyambile yandi re: «Simu, Simu, yiraambile! Sate atsetombe Nzambi dinyaange mu wutsukimise yu ne maambu ma page, navekatsukumusu bambi mu bipupu.

³² Te matsesaambile mu yu mure yikeretsyemuse gitu gyagu. Te vekegabuge yu gu me, gwaarise baane ba Tayagu.»

³³ Pyere ayagule re: «Fumu, make nguu muyende gu tsugu nagu ne mu wufu nagu.»

³⁴ Sesu akalule re: «Pyere, koku ne ginekore nemunyi, yigurune me nyoongu yireru.»

Badole ne peengi ne diyenge

³⁵ Kere vane Sesu ayambile bayikitsi re: «Ve masindigenge yenu guga nisi badole, guga nisi peengi, guga nisi mataambi, yenu dibunungu yivaava?» Bayagule re: «Disebunungu yivaave.»

³⁶ Sesu ayambile yawu re: «Te ne mapape gu sakebebile nane mumbare wune badole aboongi tsyo, munoongu wumoosi ga wukebile ne peengi. Wusane dinyenge asuumbisi yigubuku gyandi, badole tsikedile yandi asuumbi diyenge.

³⁷ Mayambile yenu, bweedi re mootsu mateendu gu mugaande wu Nzambi mu me, malabeni: “Batu batale yandi gu Gugare miboongi.” Nungyenze mayambile yenu, bweedi mootsu mateendu mu me, marugili me. Nungyenze ne mootsu mateendu mu me makelabene.»

³⁸ Bayikitsi bayambile Sesu re: «Fumu, mayenge mabeyi momame.» Sesu ayagule yawu re: «Bivane.»

Disaambulu gu mukoongu wu ba Olive

³⁹ Ne vane, Sesu apule ne ayende ga navaga yandi ne kale gu mukoongu wu ba Olive. Bayikitsi baandi balaande yandi.

⁴⁰ Ve pule yawu ve mbure yibile Sesu, ayambile yawu re: «Saambilanu mure yenu dikerelage gu dimaangu.»

⁴¹ Sesu aburugu ve bayikitsi baandi ne ayende ve gigili. Asume makotulu re asaambile.

⁴² Ayambile re: «Tate, ga yiroonde burulile me ibuungu gi maguge gigi! Nisi nane, yiyavage naroonde me, te vage naroonde yu.» [

⁴³ Ne vane kime moosi yi yulu yitutugile yandi mu wugwaarise yandi.

⁴⁴ Sesu agaangu ne wome wu mbili ne asaambile Nzambi ne ngudi. Dirugeme dyandi ditsolenge ve mutambe ga mabere ma maluungu.]

⁴⁵ Ve mane Sesu wusaambile, arambugu, agabugu gu bayikitsi. Adagise yawu byolu bi munyoongu.

⁴⁶ Ayambile yawu re: «Mugi yenu diyi byolu? Rambuganu, saambilanu mure yenu dikerelage gu dimaangu.»

Sesu agaangu

⁴⁷ Ve yambilenge Sesu nane, piti yi batu yitsange. Kime moosi ve ganegare digumi ne babeyi, wukatsitsu re Suda, abile ve wusu piti. Agogule ve mbare Sesu mu wusaambene naandi.

⁴⁸ Sesu ayambile yandi re: «Suda, re mu wusaambene, yikegabe Mwaane mutwa!»

⁴⁹ Bayikitsi ba Sesu balabenge mavyogenge. Batombe yandi re: «Fumu, yetu didiimbi ne diyenga?»

⁵⁰ Wumoosi ve pwase bakime ba Sesu apuse diyenge dyandi adiimbe musalitsi wu yivuunde gi baveegitsi ba malagu ne atabule dyaru dyandi di mabagele.

⁵¹ Te Sesu ayambile re: «Sisanu! Diyavage nane.» Agaange dyaru di musalitsi ne abeeluse yandi.

⁵² Ne vane Sesu ayambile ne bivuunde bi baveegitsi ba malagu, ne bivuunde babakyelenge ndagu disaambulu, ne bivuunde bi dibuundu babayitse gaange yandi re: «Yenu dimitse ne mayenge ne batuungu were dimende gu wugaange muboongi!

⁵³ Batsufu tsyotsu matsetsagelenge nenu gu Ndagu Nzambi ne yenu disabene wugaange me. Te ne mapape re digwere dyenu. Didi re dikyesi dikedyanze ngudi yi maambu ma diviseme.»

Pyere arune Sesu

⁵⁴ Ne vane, bagaange Sesu ne bayende naandi ne banyingise yandi gu ndagu yi yivuunde gi baveegitsi ba malagu. Pyere akungeme ne alaandenge yawu ayi gu vale.

⁵⁵ Babaange mubige ve ganegare dikaange. Batu batsagele ve tuungu mbaawu ne Pyere atsagele nawu.

⁵⁶ Musalitsi wumoosi wu mugyetu wulabe Pyere matsagele ve tuungu mubige. Abemine yandi yiswiisu ne ayambile re: «Ne dibagale didi abile ne Sesu!»

⁵⁷ Te Pyere ayagule mugyetu wene re: «Maseyabe yandi!»

⁵⁸ Ma makyesi mavyoge, mutu wumosi abelabe Pyere ne ayambile re: «Ne yu, yi gugare bayikitsi ba Sesu!» Te Pyere agabusile dibagele dyene re: «Ee, sa me!»

⁵⁹ Digwere ne wuvyoge, mutu wumosi asigimise nuyambile re: «Nungyenze wuwu abile ne Sesu mumbare yandi ayi mwisi Galilé.»

⁶⁰ Te Pyere ayagule re: «Maseyabe digoneroonde yambile yu.» Mu dikyesi diyambilenge yandi, koku yikore.

⁶¹ Fumu agyelugu ne wubemine Pyere yiswiisu. Ne vane Pyere abangule mabigu mayambulu yandi ne Fumu re: «Ne munyi koku neginekore, yigurune me marune mareru.»

⁶² Pyere avate gu dikaange ne wulile mbili.

Sesu asosusu

⁶³ Batu babakyelenge Sesu badetenge yandi ne badiimbenge yandi.

⁶⁴ Yawu badibige wusu wandi ne batombenge yandi re: «Wumediimbe yu nde nyi? Soke!»

⁶⁵ Ve yulu vane batu baseengenge yandi ne mbili mabigu ma deti.

Sesu ve wusu bivuunde bi Basifu

⁶⁶ Ve gi wisi, bivuunde bi Basifu ne bivuunde bi baveegitsi ba malagu ne bateenditsi ba migage, badugesene, barugise Sesu ve wuswawu.

⁶⁷ Babaande wusosise yandi ne wutombe yandi re: «Yambile yetu, yire Wusoolu ne Nzambya?» Sesu ayagule yawu re: «Ga mayambile yenu disakesiinge re nungyenze.

⁶⁸ Maredume yenu nzidu, yenu disakeyagule me.

⁶⁹ Te ne mapape, Mwaane mutu agubile matsagele ve mabagele ma Nzambi yine ngudi yivyogilile.»

⁷⁰ Ne vane bootsu bayambile yandi re: «Kagu yinde Mwaane Nzambya?» Ayagule yawu re: «Yenu bene re badimayambile: re me.»

⁷¹ Ne vane bayambelenenge yawu ne yawu re: «Yetu disagendi ne nzale bimweenyi! Ditsemane yulu yetu bene mabigu matsevate gu mune wandi!»