Luke 21 - Sangu: Isangu (snq) NT

Mukwiili mugyetu wu disaandi

¹ Wisi wumoosi, Sesu abile gu dikaange di Ndagu Nzambi, amonigenge nave sunzenge bikiti badole gu byeve bi manzolu gu Ndagu Nzambi.

² Alabe keke ne mukwiili mugyetu wu disaandi asunze fure beyi tsigane tsoongu yingyenze.

³ Sesu ayambile re: «Nungyenze mayambile yenu, mukwiili wu disaandi wuwu atseveege badole wuvyogilile batu bootsu.

⁴ Mumbare bane batseveege ke badole tsisabile yawu ne nzale. Te yandi gugare busaandi bwaandi, atseveege nzi yotsu yitsesaale naandi mu wuyi.»

Sesu alubuse mu dyaambu di Ndagu Nzambi yikepanzu

⁵ Kere vane batu bayambilenge mu dyaambu di Ndagu Nzambi re: «Labanu buvwaandi bu Ndagu Nzambi yiyi na noku yo ne muboti mamanyi, ne biruungu bimosi biveege batu badole gu Nzambi.»

⁶ Te Sesu ayagule yawu re: «Nisi nagonelabe yenu byootsu bibi, wisi ne mweendu byootsu bigupanzige, gusakesaale dimanyi nisi dimoosi ve yulu dine.»

Biliimbe bikelabene bebele ne disukusulu di buloongu

⁷ Batu bene babetombe Sesu re: «Muloonzi, maambu mene magulabene nde dikyesi dinyi? Ake diguyabe dyo nde tsenyi?»

⁸ Sesu ayagule yawu re: «Diraambile, batu bakeredungimise yenu. Nisi nzoku batu baguruge mu dine dyami, baguyambilenge re: “Mare wusoolu ne Nzambi!” ne: “Dikyesi dikeke bebele!” Te diyasiinge makeyambilenge batu bene.

⁹ Vakeyulu yenu bayambile mu dyaambu di mitsiingu ne mu maambu ma dimbuunge, diyayulu wome. Maambu mene bweedi marenenelabene, te sakenenebile disukusulu di buloongu.»

¹⁰ Kere vane Sesu akoonde re: «Batseengi ne batseengi bagulwaanenge, bafumu bagulwaanenge yawu ne yawu.

¹¹ Mutambe wuguregeme mbili. Nzale ne bivuunge bigudugulu mbili miseengi. Gugulabene maambu ma biviinge ne biliimbe bibinene bikeburugu gu yulu. Ne vane batu bagugaangu ne wome wu mbili.

Maambu makerugile bayikitsi ba Sesu

¹² Maambu mene negiwunenelabene yenu digugaangu, ne digutsogusu. Yenu diguyakusu mu bandagu ba masaambulu mu wusosusu. Digunyingusu gu tsugu, digubagu ve wusu bamaate ne ve wusu bivuunde bi miseengi, mu dine dyami.

¹³ Vane kebile re dikyesi dikeyambile yenu bumweenyi bwami mu maambu mootsu matselabe yenu.

¹⁴ Yabanu re vekeyenda yenu ve wusu bivovi, diyabile ne kyere mu mikalu mikeyagula yenu mukare manyuru menu.

¹⁵ Mabene maguveege yenu buyedi ne mabigu masakerungule wugigulu vore wuyagulu ne mutu nisi wumoosi ve ganegare bakolitsi benu.

¹⁶ Batayi benu ne bangwenu ne baane bangwenu ba babagele ne ba bagyetu ne bakiinde benu ne bambaatsi benu bagugabe yenu, bagubokise bambili ve ganegarenu.

¹⁷ Yenu digukolu ne batu bootsu mu dyaambu di dine dyami.

¹⁸ Te gusaandi dinange nisi dimoosi gu myuru myenu dikelage.

¹⁹ Gwaaranu: nane re nakeyobule yenu myonyu myenu.

Mutsuundu wu Serusalem

²⁰ Vekelabe yenu mabaadi ma migole bamatseenge Serusalem, yabanu re, divule disaketsiinge nupanzu.

²¹ Mu dikyesi dyene babakebile gu Sudé barine mu wuyende gu wusweeme gu mikoongu, babakebile gugare Serusalem babuli divule dyene, babakebile gu banuungi bayabegabugu gu divule dyene.

²² Nane re nakekilise Nzambi yitsuku gyandi, mu wusupule mootsu mateendu mu mabigu mandi.

²³ Maguge gu bagyetu babakebile ne mimi ne gu yawu babakenwiisenge mu batsufu tsyene! Nungyenze, Nzambi agutsogise bisi Serusalem, kabwandi yigubile mu yitsuku gyene.

²⁴ Bane baguboku ne mayenge, bamosi bagubagwa mu batseengi tsimosi ne wusunzwa mu batsugu. Bakolitsi ba Nzambi bagupanze Serusalem kwanga ne vekevu dikyesi disiingusu yawu ne Nzambi.»

Vekeruge Mwaane mutu

²⁵ Sesu abekoonde yambile re: «Maambu ma biviinge magulabene gugare dyumbi, gugare tsuungi ne gugare banyetse. Mu mutambe, batu ba mu batseengi bagulabe wome wu mbili, mu divuve didinene di mingibe mi mubu.

²⁶ Batu bagufu ne wome, mutaase maambu makarugi gu mutambe, mumbare Nzambi agutsukimise bungudu bu yulu.

²⁷ Ve yulu maambu mene mootsu, bagulabe Mwaane mutu agwiitse gu Gugare yipume, ne mbili bungudu bwaandi ne bunduumbe bwaandi.

²⁸ Vekebaande labe yenu maambu mene, sunzanu mirime, gwaaranu mumbare Nzambi asaketsiinge ne wuyobule yenu.»

Bufumu bu Nzambi bukeke bebele

²⁹ Kere Sesu atwile bayikitsi baandi noongu yiyi: «Beminanu munzangele ne miri mine myootsu.

³⁰ Vekalabi yenu magayi mawu makebaande wubeende, yabanu re mutubu wukeke bebele.

³¹ Munoongu wumoosi, vekelabe yenu maambu mene yabane re Bufumu bu Nzambi bukelabene.

³² Mayambile yenu nungyenze batu ba nemunyi wuwu basakenenefu bootsu gugalabe maambu mene.

³³ Yulu ne tsi biguvyoge, te mabigu mami masakevyoge.

Bweedi mu wuraambile

³⁴ Diraambile! Diyavyose dikyesi dyenu ne wuvage mayayi, diyavyose dikyesi dyenu ne wunwange malamu ne wulange, vore ne wubile ne munyoongu mu monyu, mbe yenu disakeyabe wisi wukeruge Mwaane mutu.

³⁵ Nakakobi yibere tsundugu gu disiinge, dikebile wisi wene re nane gu batu ba buloongu.

³⁶ Yenu diyalaame byolu saambilenganu ne yikodi. Ne vane yenu digudile ngudi yi wugwaarile mu mootsu makeruge. Yenu dikeluunzu ne Mwaane mutu.»

³⁷ Bawisi bootsu Sesu aloonzenge ne nyangu gu Ndagu Nzambi. Kere ne tsisige, ayendenge gu wulaame gu mukoongu wu miri mi ba olive.

³⁸ Batu bootsu barugenge ne yipali gu Ndagu Nzambi mu yulu naloonzenge Sesu.