Luke 20 - Sangu: Isangu (snq) NT

Dinyaange di Sesu

¹ Wisi wumoosi, Sesu aloonzenge batu gu Ndagu Nzambi mu dyaambu di musamu wumunyi. Bivuunde bi baveegitsi ba malagu ne bateenditsi ba migage ne bivuunde bi Basifu batsoombugu.

² Batombe Sesu re: «Yambile yetu, yigonevage maambu mane nde mu dinyaange de nyi, nyi wuveege yu dinyaange dyene?»

³ Ayagule yawu re: «Ne me gaandi makedume yenu nzidu. Yambilanu me:

⁴ wusindige Sa mu wubatise nde nyi? Nde Nzambi vore nde batu?»

⁵ Bataasenge yawu ne yawu re: «Ga diyambile re: “Nde Nzambi”, agutsukige yetu re: “Mugi yenu disebile ne gitu mu yandi?”

⁶ Te ga diyagule re: “Nde batu,” babasindige yandi, diguboku ne mamanyi ne batu bootsu, mumbare bayatsi bweedi re Sa abile mubigitsi.»

⁷ Ne vane bayagule Sesu re: «Diseyabe wu sindige Sa.»

⁸ Sesu ayambile yawu re: «Ne me gaandi masakeyambile yenu wuveege me dinyaange di wuvage maambu mene.»

Noongu yi basalitsi bababi gu nuungi miluunde

⁹ Kere vane Sesu abekoonde yambile batu bootsu noongu yiyi: «Dibagele dimoosi avare nuungi yi miluunde mikakuunzu malamu. Aveege yo bakyelitsi ne ayende munyalu wu yitsiingu.

¹⁰ Ve pule dikyesi di wudoke miluunde, asindige musalitsi wumoosi gu bakyelitsi mure bakeveege yandi dyandi dikabu di miluunde mi nungyene. Te bakyelitsi badiimbe musalitsi nugabuse yandi makake mwaasi.

¹¹ Nge nuungi abesindige musalitsi wususu; ne bakyelitsi bene babediimbe yandi, baseenge yandi ne bagabuse yandi makake mwaasi.

¹² Abesindige wu mureru; ne yandi adukusu, apunzu ne bakyelitsi.

¹³ Ne vane nge nuungi ataase re: “Vave mavagi nde tsenyi? Makesindige mwaanami dibagele wu murime, gotsu bagugobise yandi.”

¹⁴ Te ve bakyelitsi ba nuungi balabe mwaane nge yo, bayambile yawu ne yawu re: “Labanu wuwu re wukesaale ne mikwanyi. Kagu dibokyanu yandi dikesaale ne myo.”

¹⁵ Ne vane badute yandi ne gu paange nuungi ne baboke yandi.» Sesu atombe yawu re: «Ake nge nuungi aguvage yawu nde tsenyi?»

¹⁶ Sesu numanetombe yawu nane, asupule re nge nuungi aguruge, aguboke bakyelitsi bene nuveege nuungyandi gu bakyelitsi bamosi. Ve yulu batu maambu mayambilenge Sesu, bavage re maambu ma munoongu wune maserungule labene.

¹⁷ Te Sesu nubemine yawu, ayambile re: «Ga yenu diyagule nane, ake divindugulu di maambu mateendu gu mugaande wu Nzambi re: “Dimanyi diveru ne baruungitsi, dyo re dimakalugu dikuti diwugwaarise ndagu, nde gi”?

¹⁸ Mutu wotsu wukelage ve yulu dimanyi dyene, agutsungugu, ne wotsu wukelagulu ne dyo agunyigugu.»

¹⁹ Bivuunde bibaveegitsi bamalagu ne bateenditsi ba migage babenenge wugaange Sesu mu dikyesi dyene mumbare bayabe re amevere noongwene re mu yawu. Te balabe wome wu batu bootsu bababile vane.

Lepu yi Sesar

²⁰ Ve yulu vane, bivuunde bi Basifu baleegenge Sesu. Mu wuraambe yandi, basindige batu babalabunungu re bayi basuungeme, mu wuyulu ga gugare makeyambilenge yandi gugubile maambu marekeme. Kere vane bakesaambe yandi gu migage ne gu yivuunde gi museengi.

²¹ Batu bene badume yandi nzidu re: «Muloonzi, diyatsi re yigoneyambile, nuloonze maambu masuungeme. Yisaandi ne dipasu, yigoneloonze yimwanze gi maambu magonerume Nzambi.

²² Kagu yambile yetu, mugage wu Muyise wugonesiingise, vo wubuse wuvaane lepu gu Sesar?»

²³ Te Sesu ayabe re bamaraambe yandi. Kere vane, ayambile yawu re:

²⁴ «Ritsiganu me dole moosi. Baritsige yandi. Kere ayubule yawu re: mu dole yiyi, yidimu ne nduge nde binyi?» Bayagule re: «Bi Sesar.»

²⁵ Kere ayambile yawu re: «Kagu gabusanu gu Sesar bi Sesar ne gu Nzambi bi Nzambi.»

²⁶ Baserungule dagise mbele mu mabigu mayambilenge yandi ve wusu batu. Te bagibeme mbili mu munoongu wu maambu mayagulenge yandi ne baruumbe.

Nyivu yi basadusi mu dyaambu di bufwangugulu bu bafuumbi

²⁷ Ne vane, dikabu di Basadusi bagogule ve wusu Sesu. Basadusi bakataasi re babafu basakefwangugu. Dikabu di batu bene batombe yandi re:

²⁸ «Muloonzi, Muyise ateendile yetu mu mugage re: “Ga dibagele abile ne mwaane ngwandi wu dibagele ne mugatsi wu gabure baane, yanufu, mwaane ngwandi wu dibagele arungule wuyoonge mukwiili mure bakeburile mufwitsi mbubi ne mukaandi.”

²⁹ Noonge nuyelige, gurebile baane banguyi tsaambu bababagele. Wu mareege areyonge mugatsi, arefu gugabure baane.

³⁰ Wu mubeyi areyonge mukwiili, arefu gugabure baane.

³¹ Wu mureru areyonge mukwiili, ne yandi, arefu, gugabure baane. Bile re munoongu wumoosi gu yawu bootsu ba tsaambu, bayoonge mukwiili, ne bafu, gugasiise baane.

³² Ve yulu vane, mugyetu ne yandi gaandi afu.

³³ Ake vekefwangugu babafu, wukebile mulumi mugyetu wene nde nyi, mumbare bootsu ba tsaambu babile balumi baandi?»

³⁴ Sesu ayagule yawu re: «Babagele ne bagyetu ba tseengi yiyi bakayongeni;

³⁵ Te bootsu ne babagele ne bagyetu babakedagusu bayelimine ne Nzambi, mu wunyingene gu tseengi yimone yikarugi ne bagufwangugu gu difu, basakebeyongene.

³⁶ Vane basakebefu, mumbare bayi munoongu wumoosi ga bakime ba Nzambi ba yulu. Bayi baane ba Nzambi mumbare Nzambi atsefwangule yawu.

³⁷ Muyise aloonze ne velee re babafu bagufwangugu. Ve nyigule yandi bumweenyi bu dikwake dilulenge, atsitse Fumu re: “Nzambi yi Abaraam, Nzambi yi Isaak ne Nzambi yi Sakob.”»

³⁸ Sesu akoonde yambile re: «Nzambi sa Nzambi yi babafu, te nde Nzambi yi batu babamonyu, mumbare bootsu bayi monyu ke mu yandi.»

³⁹ Dikabu di bateenditsi ba migage bayambile Sesu re: «Muloonzi, yitseyambile ke bweedi.»

⁴⁰ Ne vane, baseberungule dume Sesu banzidu bamosi.

Wusoolu ne Nzambi nde mwaane Davida?

⁴¹ Sesu ayambile yawu re: «Tsenyi batu barungule yambile re Wusoolu ne Nzambi nde mwaane David?

⁴² Nga David yabene ayambile gu Mugaande wu miimbu re: “Fumu Nzambi atseyambile Fumwami re: Ruge tsitsageli ve mabagele mami,

⁴³ Kwanga ne ve makesunze bakolitsi bagu gutsi mataambi magu.”

⁴⁴ David akatsitsi Wusoolu ne Nzambi re Fumu, ake tsenyi aguberungule bile mwaanandi?»

Sesu alubuse batu mu bitsagilitsi bi basupulitsi ba migage

⁴⁵ Sesu ayambile ne bayikitsi baandi ve wusu batu bootsu babayulungu nayambilenge yandi re:

⁴⁶ «Diraambile! Diyavage munoongu wumoosi ga bateenditsi ba migage! Bakaroondi wunange ne biliinge bibinene. Bakaroondi wuyubulu ne digobe mu bitsige bi mbili batu. Bakasoli bikudu bimareege mu bandagu tsi masaambulu ne bitsige bimareege mu mayayi.

⁴⁷ Bakaboongili bakwiili bivaave byawu byootsu. Bakavagi masaambulu mamale mure batu bakeyabe re bayi babanyi. Mu maambu mene, Nzambi agukilise yawu wuvyogilile bamosi.»