Luke 19 - Sangu: Isangu (snq) NT

Sesu yane Sasé

¹ Sesu apule gu Seriko, asabugenge divule.

² Ne vane, vebile mutu dine dyandi Sasé. Abile yivuunde gi bayakitsi ba lepu ne abile yikiti.

³ Abenenge wulabe nyi wubile Sesu. Te ve bile yandi ne yitele gi gigufi aserungule, mumbare gubile piti yirage.

⁴ Aregile bambaangu gu mawusu ne abare gu mwiri wu nduge re, sikomore mu wulabe Sesu wukevyoge vane.

⁵ Ve pule Sesu ve yitsige gyena, asiimbule miisu nuyambile naandi re: «Sasé, leenge wusuunde ne munyi wuwu magulame gu ndagwagu!»

⁶ Sasé asunde nyavu nuyake Sesu ne yinyunge.

⁷ Bootsu babalabe dyo, ba gyelenge yandi re: «Mutu wuwu amende laame gu ndagu yi mutu nge mabi!»

⁸ Ve pule yawu gu ndagu, Sasé ateleme ve wusu Fumu ne ayambile yandi re: «Fumu magupase busine bwami ve time muveege masaandi ne ga maboongile mutu badole tsi vyogilile, magugabusile yandi makabu mamane vuvyogilile.»

⁹ Kere vane Sesu ayambile yandi re: «Ne munyi Nzambi ameyobule batu ba ndagu yiyi, mumbare ne yu Sasé, yinde gu yitsuku gi Abaraam!

¹⁰ Re mu dyo, Mwaane mutu aruge mubene ne muyobule bababile batsyemugu.»

Musamu wu basalitsi bareru

¹¹ Sesu ne batu babayulungu maambu mayambilenge yandi bayendenge, nguu ne vepule yawu bebele ne Serusalem. Batu bataasenge mubu re Bufumu bu Nzambi bugulabene pasi dikyesi.

¹² Ne vane, Sesu anyigule yawu noongu yiyi: «Mutu wumoosi wu munduumbe ayende gu tseengi yi vale gu veegu dinyaange di wubile maate, kere aregabugu.

¹³ Negi mweendu, atsitse digumi di basalitsi baandi. Aveege mutu mutu dikabu di ngyenze dibadole. Ayambile yawu re: “Vaganu mukite mu funyule badole bene kwanga ne vakeruge me.”

¹⁴ Te batu ba tseengyandi bakolenge yandi; gu nzimandi basindige bakime mu yambile yandi re: “Yetu diseroonde re dibili gutsi dinyaange dyandi.”

¹⁵ Te nisi nane baveege yandi dinyaange dyene ne agabugu gu tseengyandi. Atsitsise basalitsi babaveegu badole naandi muyabe nzi yidile yawu.

¹⁶ Wu mareege aruge ne ayambile re: “Muloonzi, ve yulu dikabu dibadole tsiyiveege me, matsefunyule digumi di makabu.”

¹⁷ Maate ayambile yandi re: “Bweedi, yinde musalitsi wumunyi. Yibetsi wumunyi mu bivaave bi pesu, re mu dyo boonge dinyaange di wukume mu digumi di mavule.”

¹⁸ Musalitsi wu mubeyi aruge ne ayambile re: “Muloonzi, ve yulu dikabu diyiveege me matsefunyule makabu maranu.”

¹⁹ Maate ayambile ne wune re: “Yu, boonge dinyaange di wukume mu mavule maranu.”

²⁰ Musalitsi wumosi aruge ne ayambile re: “Muloonzi, labe dikabu diyiveege me, masweege dyo mu didite di muswari.

²¹ Mabile ne wome wagu mumbare yinde mutu wu page: Yikaboongi badole bagakyele yu ne yikabuki bigavare yu.”

²² Maate ayagule yandi re: “Yinde musalitsi wu mubi, magusosise yu mu mabigu matsetube yibene. Yiyabenge re mayi mutu wu page, makaboongi bigakyele me ne makabuki bigavare me.

²³ Ake mugi yiseswege dikabu dyene gu dimanyi dikafunyuli badole mure ve keruge me makeboonge dyo ne bagundige?”

²⁴ Kere vane maate ayambile bababile vane re: “Duumbanu yandi dikabu di badole di naandi ne veeganu dyo gu wune digumi.”

²⁵ Yawu bayambile yandi re: “Muloonzi, nga wune akeke ne digumi di makabu ma badole!”

²⁶ Maate ayagule yawu re: “Masigimise yenu dyo re, bagukoonde wotsu wune gyo; te gu wusaandi ne gyo aguduumbu nisi ma nzi yigonetase yandi re ane yo.

²⁷ Te gu yawu bakolitsi bami, babasaroonde re mabili maate mawu, ruganu nawu gunu ne bokanu yawu ve miisu mami.”»

Sesu atsoombugu gu Serusalem

²⁸ Ve mane Sesu wuyambile nane, ayende ve wusu piti mu wumake gu Serusalem.

²⁹ Sesu agogule bebele ne divule di Betefage ne di Betani, tselu yi mukoongu wu miri mi ba olive. Asindige bayikitsi babeyi.

³⁰ Ayambile yawu re: «Yendanu gu diimbu di ve wuswenu. Veke pule yenu gune, digudagise yiboodu gituungulu gi ganene tsagululu. Nyangulanu gyo ne baganu gyo gunu.

³¹ Ga mutu atombe yenu re: “Mugi yenu digonenyangule gyo?”, yambilanu yandi re: “Fumu anenzale gyo.”»

³² Bakime bayende ne badagise maambu mootsu ke nave yambile Sesu.

³³ Ve nyangulenge yawu yibodu, benge gyo batombe yawu re: «Mugi yenu digonenyangule yiboodu gine?»

³⁴ Bayagule re: «Fumu anenzale gyo.»

³⁵ Kere vane bayende ne yiboodu gu Sesu. Bayale bidwaari byawu mu gyo ne banakige Sesu.

³⁶ Ve yendenge Sesu, batu bayalilenge yandi bidwaari byawu mu nzile, ayendenge mu yulu byo.

³⁷ Abile keke bebele ne Serusalem, kyesi yi diviindumunu di mukoongu wu miri mi ba olive. Ne vane, piti yotsu yi bayikitsi baandi babile ne yinyunge ne bagitse Nzambi pepe mu maambu mootsu mabiviinge malabe yawu.

³⁸ Bayambilenge re: «Nzambi aveegi myule gu Fumu yikarugi mu dine dyandi! Polu yibili gu yulu ne bunduumbe bubili gu Nzambi Puungu!»

³⁹ Dikabu di bafwarisi bababile gugare piti bayambile Sesu re: «Muloonzi, rume bayikitsi bagu baruumbi.»

⁴⁰ Sesu ayagule yawu re: «Mayambile yenu ga baruumbe, nisi mamanyi magubwamugu!»

Sesu agonelile mu dyaambu di Serusalem

⁴¹ Ve pule Sesu ve tsoombu Serusalem alabe divule ne alile mu dyo.

⁴² Ayambile re: «Serusalem, yisayabe tsenyi yirungule wudile polu ne munyi! Te vave, maambu mene makemasweegu yisakebelabe mo!

⁴³ Yabe re, gu yu, wisi ne mweendu bakolitsi bagu baguruunge yibage mu wuraambe yu, bagutseenge yu, bagubamige yu tselu ne tselu.

⁴⁴ Bagugudise yine batu bagu bootsu, basake siise nisi dimanyi dimoosi va yulu dimosi, mumbare yiseditige dikyesi di Nzambi aruge mu wuvagile yu dinyi.»

Sesu gu Ndagu Nzambi

⁴⁵ Sesu anyingene gu Ndagu Nzambi ne apuunze babasuumbisenge bivaave guune.

⁴⁶ Ayambile yawu re: «Diteendu gu maambu ma Nzambi re: “Ndagwami yigubilenge nde Ndagu disaambulu.” Te yenu dimakaluse yo yisweemulu gi bayibitsi!»

⁴⁷ Sesu aloonzenge tsufu tsyotsu gu Ndagu Nzambi. Bivuunde bi basaambilitsi ba malagu, bateenditsi ba migage ne bivuunde bi diimbu babenenge wubokise yandi.

⁴⁸ Te basedile disuge mumbare batu bootsu bavere maru mawu muyulu maambu mootsu ma yambilenge Sesu.