Luke 18 - Sangu: Isangu (snq) NT

Noongu mukwiili ne yivovi gigibi

¹ Sesu atwile yawu noongu muloonze re bweedi musaambilenge ne yikodi guga nzugu.

² Ayambile yawu re: «Gu divule dimoosi gubile yivovi aseyulungu Nzambi wome ne asegobisenge pasi mutu.

³ Gu bile gaandi gu divule dyene mukwiili wu mugyetu wu yendenge makyesi mootsu gulabe yivovi mu yambile yandi re: “Luunze me ve wusu mukolitsi wami.”

⁴ Makyesi ma mbili yivovi asesiingenge wuvage dyaambu ditombenge mukwiili wene. Kere wisi wumoosi yivovi ayambile mu yabene re: “Nungyenze masakalabi Nzambi wome ne wugobisi pasi mutu.

⁵ Te mukwiili wuwu agonegominise me muru makyesi mootsu, kagu maluunzi yandi.”»

⁶ Ve mane Fumu wuyambile nane, akoonde re: «Sa yulwanu nagoneyambile yivovi gigibi gigi!

⁷ Reembuse yivovi gigibi ayambile nane, keke ne Nzambya! Aguluunze batu baandi babagonetsitse yandi ne nyangu ne dibati. Asaketsiinge muyamune yawu.

⁸ Mayambile yenu re aguleenze luunze yawu. Te vekeberuge Mwaane mutu, agudagise gitu mu tsi ya?»

Noongu yi mufwarisi ne muyakitsi lepu

⁹ Sesu abetu noongu yiyi gu batu babataasenge re bayi basuungeme ve wusu Nzambi ne wuvoongulenge bambaatsi:

¹⁰ «Babagele babeyi bayende gu ndagu Nzambi gusaambile; wumoosi bile mufwarisi, wune muyakitsi lepu.

¹¹ Mufwarisi ateleme ne asaambilenge gu murime wandi re: “O Nzambi, magabuse dinyi gu yu mumbare masaandi ne mabi ga batu bamosi bange yibe. Masakavagi butswari, masaandi wubive. Magabuse dinyi gu yu mumbare masaandi nisi ga muyakitsi wu lepu wuwu.

¹² Makamini kugi tsufu beyi mu tsonu. Makaveegi yu gimoosi mu digumi mu byootsu bikadili me.”

¹³ Muyakitsi lepu ateleme ve tuungu. Aserungule nisi wusiimbule miisu gu yulu, te adiimbe tulu nuvonde kokolu re: “O Nzambi labe me dingyebe, me mutu wumubi.”»

¹⁴ Sesu abeyambile yawu re: «Nungyenze mutu wuwu agabugu gu ndagwandi wusuungeme, te sa mufwarisi. Noongwene yigwendigile re: wotsu wukemakise manyuru mandi agugulumusu ne wotsu wukegulumuge agumakusu.»

Bufumu bu Nzambi nde bu batu baba ga baane babakyeki

¹⁵ Wisi wumosi, batu babagile Sesu keke ne baane babakyeki mure akesunzile yawu makake nuveege yawu myule. Ve labe bayikitsi nane, baseembe bakiinde ba baane.

¹⁶ Te Sesu arume bakiinde mugogule ne baane nuyambile re: «Sisanu baane bayitsi gu me, diyakare yawu mumbare Bufumu bu Nzambi nde bu batu baba ga yawu.

¹⁷ Mayambile yenu nungyenze: wotsu wusakesiinge Bufumu bu Nzambi ne murime wandi wotsu ga mwaane wu mukyeki, asakerungule wunyingene gu bwo.»

Dibagele di yikiti

¹⁸ Ne vane, yivuunde gimoosi gi Musifu atombe Sesu re: «Muloonzi wu munyi, mavagi nde gi mudile monyu wu mubu ne mubu?»

¹⁹ Sesu ayambile yandi re: «Mugi yigonetsitse me re, wu munyi? Gusaandi mutu wu munyi veengu ke Nzambi ya piinze.

²⁰ Yiyatsi birumu bi Nzambi bikaloonzi re: “Yiyavage butswari, yiyaboke mutu, yiyayibe, yiyafurigile mutu dyaambu, gobise tayagu ne ngwagu.”»

²¹ Dibagele ayagule re: «Makagobisi birumu byene byootsu baande ve bungyebe bwami.»

²² Ve mane yandi wuyulu mikalu myene, Sesu ayambile yandi re: «Yimebesaale ne dyaambu dimoosi di wuvage: Suumbise byootsu bi nagu, ne gabile badole bakedile yu gu masaandi, ne vane yigudile busine gu yulu. Kere vane ruge, laande me.»

²³ Te ve mutu wene ayulu mabigu mene, abile ne rungile mumbare abile ne mbili bukiti.

²⁴ Sesu nulabe re amenyongeme, ayambile re: «Ke page gu pagese mu nyingene gu mune wu tsoongi.

²⁵ Te page yivyogilile gu yikiti munyingene gu Bufumu bu Nzambi!»

²⁶ Babayulungu mayambilenge Sesu bakalule re: «Gabile re nane, ake wukeyobulu nde nyi?»

²⁷ Sesu ayagule re: «Maambu makaragulu batu wugage, Nzambi asakaragulu wuvage mo.»

²⁸ Ne vane Pyere ayambile re: «Nga yimelabe namasiise yetu manyi metu mootsu mu laande yu.»

²⁹ Sesu ayagule yawu re: «Mayambile yenu nungyenze, ga mutu asiise ndagwandi ne mugatsyandi, agasiise baane bangwandi ne bakiinde baandi vo baane baandi mu dyaambu di Bufumu bu Nzambi,

³⁰ mutu wene agudile bivyogilile mbili gu tsi yiyi ne mu dikyesi dikayitsi, agudile monyu wu mubu ne mubu gu mbuge Nzambi.»

Sesu agoneyambile mu dyaambu di difu ne di bufwangugulu bwandi

³¹ Ve yulu vane, Sesu aboonge digumi ne bayikitsi babeyi ne ayambile yawu re: «Yabanu re dikemake gu Serusalem, mootsu mateende babigitsi mu dyaambu di Mwaane mutu makelabene.

³² Aguyakusu mu myogu mi batu bababi. Yawu baguseve yandi, bagusenge yandi ne bagutulile yandi makyengi.

³³ Bagudiimbe yandi banganzi ne bagumuboke. Kere mu wisi wu mureru agufwangugu.»

³⁴ Te bayikitsi basenyigugulu maambu mayambilenge Sesu, divindugulu di maambu mene dibile disweegu. Baseyabe mayambilenge yandi.

Sesu abeeluse nge pafu gu Seriko

³⁵ Ve pulenge Sesu ve tsoombu Seriko, vane vebile nge pafu matsagele ve tuungu nzile nurimenge bivaave gu bavyosi.

³⁶ Nge pafu ayulu divuve di piti yivyogenge ne atombe batu re: «Digonevyoge di nde gi?»

³⁷ Batu bayagule yandi re: «Nde Sesu mwisi Nasarete agonevyoge.»

³⁸ Ne vane ayame mundunge: «Sesu, Mwaane David, labe me dingyebe!»

³⁹ Babayendenge mawusu baseembe yandi mure akeruumbe te akoondenge ke wuyame pepe re: «Mwaane David, labe me dingyebe!»

⁴⁰ Sesu asikeme ne arume batu mubage yandi ve mbarandi. Ve bile nge pafu ve mbarandi, Sesu atombe yandi re:

⁴¹ «Yiroonde nde gi? Mavagili yu nde gi?» Nge pafu ayagule yandi re: «Fumu maroonde wulabe ga ve kale!»

⁴² Sesu ayagule yandi re: «Miisu magu mabalugi! Gitu gyagu gimayobule yu!»

⁴³ Vane ne vane nge pafu abaande wulabe ga ve kale. Alaandenge Sesu nugitsenge Nzambi re: «Myule gu Nzambi!» Piti yotsu yilabe dyo ne yo gaandi yigitse Nzambi.