Luke 17 - Sangu: Isangu (snq) NT

Dibi ne kokolu

¹ Sesu ayambile bayikitsi baandi re: «Makyesi mootsu gugubilenge maambu makelagisenge batu mu mabi. Te maguge gu yandi wukelagise mbaatsi mu mo.

² Mutu wene bweedi adwiisu dimanyi didinene mu digore, nuveru gu mubu mure akerelagise mutu wuganene bile ne gitu gingyenze.

³ Kagu raambilanu! Mwaane tayagu ga avagile yu dyaambu didibi, seembe yandi. Ga asiinge mbelandi, siingile yandi kokolu.

⁴ Ga avagile yu dibi makyesi tsaambu mu wisi ne ga aruge makyesi tsaambu mu wisi muvonde yu kokolu, yisiingile yandi kokolu.»

Gitu

⁵ Bakime bayambile Fumu re: «Koonde yetu gitu.»

⁶ Fumu ayagule yawu re: «Yenu ga dibile ne gitu gigikyeki munoongu wumoosi ga mubi wu dilusi, yenu digurungule yambile ne mwiri wuwu re: “Tsulugu ne yende sumeme gugare mubu”, ne wo wuguyululu yenu.

Yisalu gi musalitsi

⁷ Noonge nuyelige: wumoosi ve ganegarenu arebile ne musalitsi wukadyanzi gu banuungi vore wukakyeli biboodu. Veketutugu yandi gu banuungi, aguyambile nde re ruge nyavu muyi ve taka?

⁸ Sanane, aguyambile musalitsi nde re: “Laambile me yilaambu gyami, kere yikeviinze bidwaari mu sunzile me kure. Vekemane me wuyi ne wunu, ve yulu vane, yikeyi ne wunu ve dyagu dikyesi.”

⁹ Basakagabusi dinyi gu musalitsi mumbare atsedyanze ke natserumu yandi.

¹⁰ Munoongu wumoosi ne yenu ga dimadyanze byootsu bitserumu yenu ne Nzambi, yambilanu re: “Yetu ke basalitsi bagane tsoongu ditsedyanze ke yisalu gyetu.”»

Sesu abeeluse digumi di batu bange makyedi

¹¹ Sesu ayende tselu yi Serusalem. Avyoge ve pwase divule di Samari ne Galilé.

¹² Ve nyingene yandi gu diimbu dimoosi, digumi di batu bange makyedi baruge mu beengunu naandi. Babile vale ne Sesu.

¹³ Babwamugu re: «Sesu, Muloonzi, labe yetu dingyebe!»

¹⁴ Sesu nulabe yawu, ayambile re: «Yendanu muritsige manyuru menu gu baveegitsi ba malagu.» Ve yendenge yawu, babeelugu.

¹⁵ Ve labe wumoosi re amebeelugu, agabugu mu mataambi nugitse Nzambi pepe.

¹⁶ Ve pule yandi ve wusu Sesu, asume makotulu, mbalenge mu mutambe nugabusile yandi dinyi. Mutu wene bile mwisi Samari.

¹⁷ Ne vane, Sesu ayambile re: «Nga batu bootsu ba digumi batsebeelugu, ake yiwe gi bane batu bande gunyi?

¹⁸ Gusaandi mutu wutsetaase wugabugu mu gabusile Nzambi dinyi, veengu ke mweenyi wuwu.»

¹⁹ Kere vane Sesu ayambile yandi re: «Teleme, yendenge, gitu gyagu gitseyobule yu.»

Mwiitsu wu Bufumu bu Nzambi

²⁰ Bafwarisi bayubule Sesu dikyesi dikeruge Bufumu bu Nzambi. Ayagule yawu re: «Bufumu bu Nzambi busakeruge ga yivaave gikalabeni ne miisu.

²¹ Gusakebile wisi wuke yambulu yenu re: “Bufumu bu Nzambi bwobu.” Vore: “Bwobune gunaa.” Ne vane yabanu re Bufumu bu Nzambi bukeke ve ganegarenu.»

²² Kere Sesu ayambile bayikitsi re: «Gugubile dikyesi dikeroonde yenu wulabe Mwaane mutu nisi ke wisi wumoosi, te yenu disakelabe yandi.

²³ Ne vane, yenu diguyambulu re: “Ranaa, vore rawu!” Te yenu diyayende, diyababise yende guune.

²⁴ Yabanu re nakalabeni mukakedi gu yulu mu wutsoombuse yiveele gyandi tsoombu ne tsoombu, ne Mwaane mutu agulabunu munoongu wumoosi mu wisi wandi.

²⁵ Te wisi wene ne gi wupule, bweedi arenelabe maguge mambili nubusu ne batu ba nemunyi.

²⁶ Maambu mavyoge mu dikyesi di Nowé magubile munoongu wumoosi mu wisi wukeruge Mwaane mutu.

²⁷ Batu bayangenge ne banwangenge, bayoongenenge ne bayoongisenge baane bawu, kwanga ne mu wisi wu Nowé anyingene gu mbuungu; ne vane, nyidu yiyinene yigudise yawu bootsu.

²⁸ Maambu maguvyogenge ga navyogenge mo mu dikyesi di Lote. Batu bayangenge ne banwangenge, basuumbenge ne basuumbisenge, bavarenge ne baruungenge.

²⁹ Te wisi wuburugu Lote gu Sodome, Nzambi alaagise mamanyi ma mbaawu ga fule, ne batu bootsu bagude.

³⁰ Nane re nakevagenge batu maambu kwanga ne mu wisi wukeruge Mwaane mutu.

³¹ Mu wisi wene, mutu wukebile gu yulu mwaanze ndagwandi ayasunde muboonge bivaave byandi, ne mutu wukebile gu banuungi ayagabugu gu ndagwandi.

³² Bangulanu dyaambu divyoge mu mugatsi Lote!

³³ Wotsu wukebene kyele monyu wandi mu tsi yi, asakedile monyu wu mubu ne mubu. Te wotsu wuketsyemuse monyu wandi mu tsi yi mu me, agudile monyu wu ngyenze.

³⁴ Mayambile yenu, mu dibati dyene, batu babeyi babakebile taangi moosi. Wumoosi aguboongu, wune agusiisu.

³⁵ Bagyetu babeyi bagurokenge baputu. Wumoosi aguboongu, wuna agusiisu.

³⁶ Babagele babeyi bagubile gu nuungi. Wumoosi aguboongu, wune agusiisu.»

³⁷ Ne vane, bayikitsi batombe Sesu re: «Maambu mene maguvyoge nde gunyi?» Ayagule yawu re: «Ve yitsige gikabili fuumbi, vane gaandi re vakadugesene banyuunge.»