Luke 15 - Sangu: Isangu (snq) NT

Tabe moosi yitsyemugu yimalabane

¹ Bayakitsi ba lepu ne batu bange mabi bagogule ve mbare Sesu muyulu maambu maloonzenge yandi.

² Bafwarisi ne bateenditsi ba migage bagyelenge yandi re: «Awuwu mutu ande tsenyi agonenoonge ne batu bange mabi ne wuyi nawu!»

³ Te Sesu atwile yawu noongu re:

⁴ «Mutu wumoosi ve ganegarenu arebile ne kame bindombe, ga gimoosi gitsyemugu, nungyenze agusiise magumi yiwe ne bindombe yiwe gu nuungi muyende bene yindombe gitsetsyemugu kwanga ne vekedagise yandi gyo.

⁵ Veke dagise yandi gyo akalabi mbili yinyunge ne wupape gyo gu yulu yitsutsu nugabugu gu diimbu.

⁶ Ne agutsitse bambaatsi baandi ne batu ba mu batuungu re: “Ruganu dilabi yinyunge mumbare yindombe gyami gibetsi gitsyemugu gimalabene!”

⁷ Re munoongu wumoàosi ga mutu nge mabi wumasiinge Sesu nukalule bitsagilitsi, bakime ba Nzambi ba yulu bakalabi yinyunge gimbili wuvyogilile magumi yiwe ne batu yiwe babamanesiinge Sesu, babasage ne nzale wukalule buyedi.

Fure moosi yitsyemugu yimalabane

⁸ Beyulwanu: mugyetu wumoosi arebile ne digumi di bafure, moosi yiretsyemugu, asakebaangise page nugombule ndagu nukuunze bene furene kwanga ne vakedagise yandi yo?

⁹ Ga alabe yo, akatsitsi bambaatsi baandi ne babadukelene naandi nuyambile yawu re: “Ruganu dilabi yinyunge mumbare mamadagise furami yibetsi yitsyemugu!”

¹⁰ Re nane, mayambile yenu re bakime ba yulu ba Nzambi bakabili ne yinyunge ga mutu wumoosi nge mabi amakalule buyedi.»

Mwaane wutsyemugu wumelabene

¹¹ Sesu abekoonde yambile re: «Dibagele dimoosi abile ne baane babeyi ba babagele.

¹² Ngyebe ayambile yandi re: “Tate, veege me myami mikwanyi. Tayi agabile yawu manyi mandi.”

¹³ Ma batsufu tsivyoge, ngyebe asuumbise byootsu biveegu yandi ne ayende gu tseengi yi vale. Guna, avagenge maambu magyayugu ne badole tsyotsu tsibile naandi tsivu.

¹⁴ Ve mane yandi badole tsyotsu nugabe, nzale yiyinene yidugulu gu tseengyene. Abaande wukambulu mu maambu mootsu.

¹⁵ Ayende mu dyanzile mutu wumoosi gu tseengyene. Mutu wene asindige yandi mukyele bangulu ve yitsige giyiswa yawu.

¹⁶ Mwaane wene abilenge ne nzale wuyi nisi kure yiyangenge bangulu, te aseveegu ne mutu nisi wumoosi.

¹⁷ Kere vane ataase re: “Gu mbuge tate badyanzitsi bootsu bane kure yivyogilile, te me gugu manafu ne banzale.

¹⁸ Makegabugu gu mbuge tate muyambile yandi re: Tate, matsevage dibi ve wusu Nzambi ne ve wuswagu.

¹⁹ Masaandi du wuyelimine mutsitsungu re mwaanagu. Boonge me ga mudyanzitsi wagu.”

²⁰ Ne vane, ateleme mugabugu gu mbuge tayandi. Ve bile yandi kike vale ne ndagu, tayandi alabilile yandi, amulabe dingyebe dimbili. Ayende bambaangu mubengusunu yandi. Asaambene naandi.

²¹ Kere mwaane ayambile re: “Tate, matsevage dibi ve wusu Nzambi ne ve wuswagu. Masaandi du wuyelimine mutsitsungu re mwaanagu.”

²² Te tayi ayambile badyanzitsi baandi re: “Babisanu wubage kape yimoone yivyogilile nyeve ne dwiisanu yandi yo. Dwiisanu yandi muluunge mu muleembu ne mataambi mu byoru.

²³ Baganu yiboodu gi muvaangu, bokanu gyo, laambanu, diyangyanu ne yinyunge,

²⁴ mumbare mwaanami wuwu wubetsi ga mutu wufu amarambugu, abetsi wutsyemugu, amalabene. Re dibaandu dilabyanu yinyunge.” Ne vane babaande diyaye.

²⁵ Mu dikyesi dyene mwaane wu yivuunde abile ke gu banuungi, ve tutuge yandi, bebele ne ndagu ayulu divuve di bangoofi ne miginu.

²⁶ Atsitse mudyanzitsi wumoosi mutombe yandi dyaambu digonevyoge.

²⁷ Wune agabusile yandi re: “Nde mwaane ngwagu amaruge re tayagu atsebokise yiboodu gi muvaangu mumbare yandi atsegabugu ne polu.”

²⁸ Ne vane, mwaane yivuunde ayulu kabu, abuse wunyingene gu ndagu. Tayandi avate muleembe yandi munyingene.

²⁹ Te mwaane agabusile tayandi re: “Labe bilime bibimbili matsedyanzile yu gugagigule birumu byagu, ne yisamaveege me nisi mwaane tabe mu wuyi ne yinyunge mane bambaatsi bami.

³⁰ Te ve miitse mwaanagu wuwu, wumane manyi magu mootsu nubunge ne bange yilaambe ne butswari, yimebokisile yandi yiboodu gi muvaangu!”

³¹ Tayi amugabusile re: “Mwaanami, yiyi nami makyesi mootsu ne byootsu bi nami ke byagu.

³² Te bweedi muvage diyayi, mulabe wunyi mumbare mwaane ngwagu wuwu wubetsi ga mutu wufu amarambugu, abetsi wutsyemugu amalabene!”»