Luke 12 - Sangu: Isangu (snq) NT

Sesu alubuse bayikitsi baandi mu wufure wu bafwarisi

¹ Mu dikyesi dyene, mbili batu bagukegene ve mbare Sesu, batsarenenge yawu ne yawu mumbare piti yibile yirage. Sesu abaande wuyambile ne bayikitsi baandi re: «Raambilanu mu wufure wu bafwarisi. Wufure wawu wunde ga mukyemu wukarandisi mbumbi.

² Mootsu masweme magututugu, ne mootsu magudiswele maguyabunu.

³ Re dibaandu, mootsu makeyambilenge yenu ne dibati maguyulunu ne batu bootsu ne nyangu, ne mootsu makeyambilenge yenu gu bafuundu gu yirini gi tsibugu, maguyambulu pepe mu myaanze mi bandagu.

Wubile ne gitu mu Nzambi

⁴ Bambaatsi bami, mayambile yenu re: diyalabe wome gu babakaboki nyuru, te ve yulu vane baseberungule wuvage dyaambu dimosi.

⁵ Makeloonze yenu mutu wu wulabe wome: labanu wome ke Nzambi wune dinyaange diwuvere yenu gu mbaawu yigatsime vekefu yenu. Nungyenze mayambile yenu, wune re wu wulabe wome.

⁶ Basakasuumbisi masaangu maranu mu ma dole beya? Te Nzambi asakalibeni nisi dimoosi.

⁷ Nisi banange benu tsyotsu tsiketsitalu. Kagu diyalabe wome: monyu wenu wutsevyogilile mbili masaangu.

Wusiinge vore wurune Sesu

⁸ Mayambile yenu re: wotsu wukesiinge me ve wusu batu re mayi muyikitsi wandi, me Mwaane mutu magusiinge yandi ve wusu bakime ba yulu ba Nzambi re ayi muyikitsi wami.

⁹ Te wotsu wukerune me ve wusu batu, me Mwaane mutu magurune yandi ve wusu bakime ba Nzambi.

¹⁰ Wotsu wukeyambile dyaambu dibive mu Mwaane mutu, agusiingulu kokolu, te wotsu wukeseenge Dinyunyi Disuungeme asakesiingulu kokolu.

¹¹ Vekeyendenge yawu nenu ve wusu bivuunde bibandagu tsi masaambulu, ne bange dinyaange, diyayulu wome mu mabigu makeyagulenge yenu mukare manyuru menu.

¹² Diyalabe page mumbare Dinyunyi Disuungeme aguloonzenge yenu mu dikyesi dyene makeyagulenge yenu.»

Manyi ma buloongu

¹³ Mutu wumoosi gugare piti ayambile Sesu re: «Muloonzi, rume mwaane maame agabi mikwanyi misilu yetu ne tayetu.»

¹⁴ Sesu ayagule yandi re: «Mbaatsyami, wutsesoole me mubile mbaanze ve ganegarenu, mugabile yenu mikwanyi nde nyi?»

¹⁵ Kere vane ayambile ne bootsu re: «Raambilanu! Diyabile ne diroonde dibusine, mumbare monyu wu mutu wusaandi mu busine bwandi, nisi abetsi ne mbili manyi.»

¹⁶ Kere vane Sesu atwile yawu noongu re: «Dibagele dimoosi abile yisine, ne banuungi baandi baveege mbili kure.

¹⁷ Ataasenge gu murime wandi re: “Vave makevage nde tsenyi? Masaandi ne bitsige bi wuguumbe kurami yotsu.”

¹⁸ Kere vane abekoonde re: “Mayatsi nakevage me: magunene panze biswegu byami bibikyeki, nuberuunge biswegu bibinene, ne vane maguswege kurami yotsu ne manyi mami mamosi.

¹⁹ Kere vane, maguyambile ne mabene re: Mbaatsi! Yine mbili kure mu mbili bilime, yiyilooge, yi, nu, taambe ne monyu.”

²⁰ Te Nzambi ayambile naandi re: “Yidungi! Ne dibati didi yikefu nde wufu. Ake byootsu bitsegukige yu bine, bikesaale nde ne nyi?”»

²¹ Sesu abeyambile re: «Nane re nakebile mutu wukagukigi bukiti bu yabene, te asaandi yikiti ve miisu ma Nzambi.»

Bilanu ne gitu mu Nzambi

²² Sesu ayambile bayikitsi baandi re: «Re dibaandu mayambile yenu, diyakayigene mu dyaambu di kure yinenu ne nzale mudile monyu, nisi mu dyaambu di bidwaari bi manyuru menu,

²³ mumbare monyu wutsevyogilile kure, ne nyuru yitsevyogilile bidwaari.

²⁴ Beminanu banyonyi: basakavari, basakabuki, basaandi ne biswegu, te Nzambi akabunguli yawu! Yenu ditsevyogilile banyonyi!

²⁵ Nyi ve ganegarenu mu mikayu myandi arungule wukoonde ma yitsiingu pesu mu monyu wandi?

²⁶ Ake yenu ga disarungule wuvage maambu ma pesu, mugi yenu dine mikayu mu maambu mamosi?

²⁷ Moniganu munoongu nakabeendi bangaange mu banuungi: basakadyanzi, basakagomi bidwaari. Te mayambile yenu re: nisi Salumu, mu bukiti bwandi bwotsu, asebile ne bidwaari bivyogilile wunyeve wu ngaange moosi ve ganegare bangaange bene.

²⁸ Reembuse bisinge bibanuungi bivave nemunyi, ngwaali bigutsulu nuveru gu mbaawu, re Nzambi akadwiisi byo; keke ne yenu batu babagane gitu gi ngyenze asakebuse wudwiise yenu.

²⁹ Kagu sa bweedi mubile ne mikayu mubu ne mubu mu dyaambu di wuyi ne wunu.

³⁰ Batu babaseyabe Nzambi re babakabeni bine byootsu makyesi mootsu. Te yenu, dine Tayenu wusetsiimbu binenu ne nzale.

³¹ Regilanu kinde wubene Bufumu bu Nzambi, kere vane Nzambi aguveege yenu bivyogilile.

Bukiti bu gu yulu

³² Digaande di pesu, diyalabe wome, mumbare Tayenu atselabe wunyi muveege yenu Bufumu.

³³ Suumbisanu manyi menu, ne veeganu badole gu masaandi. Bilanu ne bakobe tsigabungene, guumbanu bukiti bwenu gu yulu, gu saketsyemugu bwo: bayibitsi basakedagise bwo, nisi batselele mubunge bwo.

³⁴ Nungyenze, ve busine bwenu, vane gaandi re vekebile murime wenu.»

Wubile wutsonzeme mu wuyake Mwaane mutu

³⁵ Sesu abekoonde re: «Diyabile ne nzugu, bilanu batsonzeme mudyanze makyesi mootsu ne tuunganu mitsigi mu maluungu, kyelanu bapage benu tsibaangu.

³⁶ Bilanu ga basalitsi babagoneviingile bugabugulu bu fumwawu wuyende gu diyayi di dyoonge, mutsibulile yandi gyabutsu vekedumise yandi.

³⁷ Myule gu basalitsi, babakedagusu ne Fumwawu bamoge! Mayambile yenu nungyenze: agutuunge mutsigi mu diluungu dyandi, nutsigise yawu ve take ne aguruge muveege yawu kure.

³⁸ Ga aruge ve murime dibati, vore ve dikyesi dimawusu, ne aredagise yawu bamoge, myule gu yawu!

³⁹ Yabanu bweedi re: mbe fumu ndagu akayabi digwere dikarugi muyibitsi, mbe aserungule wusiinge re muyibitsi apanguli ndagwandi mu wunyingene.

⁴⁰ Bilanu batsonzeme ne yenu gaandi, mumbare Mwaane mutu agwiitse mu digwere digayabe yenu.»

Musalitsi wumunyi ne wu mubi

⁴¹ Kere vane Pyere atombe Sesu re: «Fumu, yigonevere noongu yine ke mu yetu piinze vore nde mu batu bootsu?»

⁴² Fumu ayagule yandi re: «Ake musalitsi wumunyi ne wune buyedi nde nyi? Re yandi wu muloonzi ayambile re: “Maveege yu yisalu gigi; veege kure gu basalitsi bami mu dikyesi diyelimine.”

⁴³ Musalitsi wene agulabe wunyi ga muloonzi wandi adagise yandi agonevage mudyanzu wene.

⁴⁴ Nungyenze mayambile yenu, muloonzi aguveege yandi dinyaange diwukyele manyi mandi mootsu.

⁴⁵ Noonge nuyelige: ga musalitsi ayambile re: “Muloonzi wami asakelenge wuruge”, ne ga abaande wudiimbe basalitsi babagyetu ne babagele, ne ga ayi ne wunu, ne wulaange,

⁴⁶ ga avage nane, muloonzi agwiitse wisi wumoosi, mu digwere digayabe yandi; agukilise yandi navegonekilusu babagane gitu mu Nzambi.

⁴⁷ Musalitsi wuyatsi makaroondi muloonzi wandi, ga asabile wutsonzeme ne wuvage mo, agukilusu mbili.

⁴⁸ Te musalitsi wuseyabe makaroondi muloonzi wandi ne ga asarungule wuvage mo, agukilusu pesu. Ga mutu aveegu mbili bivaave, agutombu mbili. Ga mutu aveegu mbili bivaave bi wukyele agubetombu bivyogilile.

Sesu aruge ne dipasu

⁴⁹ Matseruge ne mbaawu mu tsi yi ne magoneroonde keke re yibaangu!

⁵⁰ Ne mapape makeboonge bateme yi maguge ne murime wami wusaandi wusunde kwanga ne vekesupugu dyaambu dyene!

⁵¹ Yenu digonetaase nde re maruge nde mubage polu mu tsi ya? Gusaandi, mayambile yenu re nde dipasu.

⁵² Baande ne mapape dipasu digubile va ganegare yitsuku gine batu baranu. Bareru bagukole babeyi, ne babeyi bagukole bareru.

⁵³ Tayi agukole mwaanandi wu dibagele, ne mwaane agukole tayi, nguyi agukole mwaanandi wu mugyetu, ne mwaane agukole ngwandi, nguyi mulumi agukole mugatsi mwaane, ne mugatsi mwaane agukole nguyi mulumi.»

Wuditige biliimbe bi makyesi

⁵⁴ Sesu abekoonde yambile ne piti re: «Vekalabi yenu yipume gipiinde gu yulu kube yimagyetu, mbaangu mbaangu yenu dikayambili re: “Fule yikenoge”, ne yo nunoge.

⁵⁵ Vekavugi divuge kube yi mabagele, yenu direyambile re: “Gugubile gyusule”, ne gyo gineruge.

⁵⁶ Batu bane deti be! Yenu diyatsi ke wuditige biliimbe bi tsi ne bi yulu, ake mugi yenu disegoneditige maambu ma dikyesi didi?

Swekiganu maambu menu ngyenze ne ginene yende gu mutsuundu

⁵⁷ Mugi yenu bene disakatsuundi maambu, mu wusuungige bweedi?

⁵⁸ Ga yibile ne dyaambu ne mutu, ne yenu dineyende ve wusu mbaanze, maange wuyulusunu naandi veki yenu mu nzile. Mure akerebage yu ve wusu misaambu, ne misaambu akerebage yu gu mugole, ne mugole akereyenze yu gu tsugu.

⁵⁹ Mayambile yu re: yisakevate guune kwanga ne vekemane yu wuvaane badole tsyotsu tsikanwani yu.»