Luke 10 - Sangu: Isangu (snq) NT

Yisalu gi magumi tsaambu ma bayikitsi ne bayikitsi babeyi

¹ Ve yulu vane Fumu asoole magumi tsaambu mamosi ma bayikitsi ne bayikitsi babeyi. Aregisile yawu babeyi babeyi ve wuswandi gugare mavule mootsu ne mu bitsige byootsu bikeyendenge yabene.

² Ayambile yawu re: «Kure yinde mbili gu nuungi te basalitsi basaandi mbili. Kagu saambilanu mure nge nuungyene akoondi wusindige basalitsi gu nuungyandi.

³ Yendanu, makesindige yenu ga baane ba mandombe bagane ngudi ve ganegare batu baba ga bimbungu.

⁴ Diyaboonge nisi badole, nisi peengi, nisi mataambi, diyasikeme mu manene muyubule mutu.

⁵ Vekenyingene yenu gugare ndagu, regilanu kinde wuyambile re: “Polu yibili gu ndagu yiyi.”

⁶ Ga gubile mutu wune polu gu ndagwene, polwenu yisaali naandi, ga sanana polwenu yigabugi nenu.

⁷ Ga bange ndagu basiingise yenu munyingene, bilanu gu ndagwene. Yanganu ne nwanganu bikeveegu yenu mumbare musalitsi ane dinyaange mudile futwandi. Diya nyingene mu pasi bandagu.

⁸ Veketsoombugungu yenu gu divule dimoosi, ne ga bisi divule dyene basaangile yenu, yanganu bikeveegwa yenu.

⁹ Beelusanu babeetsi ba divule dyene ne yambilanu yawu re: “Bufumu bu Nzambi bumagogule gu yenu.”

¹⁰ Te vekenyingena yenu gu divule disakesaangulwa yenu, yendanu mu bitsige bi mbili batu ne yambilanu gu bootsu re:

¹¹ “Yetu dikekurumuse difufundu di divule dyenu ditsetareme mu byoru byetu. Te yabanu re: Bufumu bu Nzambi bumagogule gu yenu.”

¹² Mayambile yenu: Mu wisi wu mutsuundu bisi divule dyene bagukilusu wuvyogilile bisi Sodome!»

Mavule makebuse wusiinge

¹³ «Mulogu gu yenu bisi divule di Korasin, mulogu gu yenu bisi divule di Betesayida! Mbe bisi Tire ne bisi Sidon balabe bimwiile na labe yenu, mbe bakalule buyedi kale mudwaare basaku ne muyole dibuufu mu manyuru mawu, muritsige re batsekalule bitsagilitsi.

¹⁴ Re dibaandu mu wisi wu mutsuundu, wukilusu wenu wuguvyogilile wu Tire ne Sidon.

¹⁵ Ne yenu bisi Kapernawum, digonetaase nde re Nzambi aguluunze yenu gu yulwa? Gusaandi, agugulumuse yenu gu buloongu bu babafu.»

¹⁶ Sesu abekoonde yambile bayikitsi baandi re: «Wotsu wukeyulu ne wusiinge mabigu menu, amayululu me; wotsu wukebuse mabigu menu amabuse me; wotsu wukebuse me amabuse ne wusindige me.»

Bugabugulu bu magumi tsaambu ne bayikitsi babeyi

¹⁷ Ve gabugu magumi tsaambu ma bayikitsi ne bayikitsi babeyi babile ne yinyunge ne bayambile Sesu re: «Fumu, mu dine dyagu nisi manyunyi mamabi magonegobise yetu.»

¹⁸ Sesu ayagule yawu re: «Nungyenze, malabe Sate alage gu tsi ga mukakedi.

¹⁹ Yulwanu: matseveege yenu dinyaange di wutsaare banyoge ne bangiinge ne wunyige ngudi yotsu yi mukolitsi, ne gusaandi yivaave gikevagile yenu dyaambu dibive.

²⁰ Te nisi nane, yenu diyalabe yinyunge mumbare manyunyi mamabi magonegobise yenu, te labanu yinyunge nde mumbare Nzambi amateende banduge benu mu mugaande wandi gu yulu.»

Sesu ayabise tayandi gu bileengi

²¹ Mu dikyesi dyene Dinyunyi Disuungeme dibase Sesu ne yinyunge ne ayambile re: «Tate, Fumu yulu ne tsi, magitse yu mumbare yiswege maambu mene gu babagonetaase re bavyogilile buyedi, yiyabise mo gu bileengi. Nungyenze Tate yiroonde re dibili nane.»

²² Kere vane Sesu ayambile gu bababile vane re: «Tayami aveege me byootsu. Gusaandi mutu nisi wumoosi wuyatsi Mwaane, veengu ne Tayi, gusaandi mutu nisi wumoosi wuyatsi Tayi veengu ne Mwaane. Te Mwaane aroonde wuyabise Tayi gu bootsu mure ne yawu bakeyabe yandi.»

²³ Ve yulu vane Sesu agyelugu gu bayikitsi baandi, ayambile ke ne yawu piinze re: «Yenu dine yinyunge mulabe magonelabe yenu!

²⁴ Nungyenze mayambile yenu re: mbili babigitsi ne bafumu baroonde wulabe magonelabe yenu, te baselabe mo. Baroonde wuyulu magoneyulu yenu te baseyulu mo!»

Noongu yi mwisi Samari wumunyi

²⁵ Ne vane musupulitsi wumoosi wu migage mi Muyise aruge ne ditaase di wumaange Sesu, ne ayubule yandi re: «Muloonzi, mavagi nde tsenyi mudile monyu wu mubu ne mubu?»

²⁶ Sesu atombe yandi re: «Bateende nde tsenyi mu mugage wu Nzambi? Yikarangi nde gi mu wo?»

²⁷ Dibagele ayagule re: «“Bweedi muroonde Fumwagu Nzambi ne murime wagu wotsu, ne dinyunyi dyagu dyotsu, ne ngudyagu yotsu, ne buyedi bwagu bwotsu. Bweedi gaandi muroonde pasi mutu nakaroondi yu yibene.”»

²⁸ Sesu akalulile yandi re: «Yitseyagule ke bweedi. Vagenge nane makyesi mootsu yikedile monyu wu mubu ne mubu.»

²⁹ Te musupulitsi wu migage aroonde wuyabise batu re nzidwandi yibetsi yisuungeme. Abekoonde wutombe Sesu re: «Ake pasi mutu wukeroonde me nde nyi?»

³⁰ Sesu ayagule yandi re: «Gubile dibagele dimoosi aburugu gu Serusalem musunde gu Seriko. Miboongi migaange yandi. Baduumbe byootsu bibile naandi, barambe yandi kube, basiise yandi gugare nyambu ne bayende.

³¹ Musaambilitsi malagu avyoge nzilene; abeengunu yikume ne dyaambu dyene. Ve laba yandi dibagele dyene, agoonge nzile.

³² Nisi mutu wumoosi wu yibaandu gi Levi apule vane ne yandi agoonge nzile.

³³ Te mwisi Samari wumoosi ayende munyalu. Yanupule ve mbare dibagele dyene, murime wandi wubase ne dingyebe.

³⁴ Kere agogule neve yandi, ayitile maatsi ne malamu mu wubuge bapure baandi ne akate tsyo ne bireende bibatsaande kere vane anakige yandi ve yulu yiboodu gyandi, ayende naandi gu ndagu yi ruungulu beenyi, ne ayamune yandi.

³⁵ Ne ngwaali yine, apuse badole, aveege tsyo gu nge ndagu ne ayambile yandi re: “Yamune mutu wuwu. Tsitsi badole gatsisabile ngu, vekitse me, magugabusile yu tsyotsu tsikegabe yu mu yandi.”»

³⁶ Sesu abekoonde wutombe musupulitsi wu migage re: «Ve pwase batu bene bareru, nde nyi wubile mbaatsi mutu wurambu kube ne miboongi?»

³⁷ Musupulitsi wu migage agabusile yandi re: «Nde wuyamune mutu wene.» Sesu ayambile naandi re: «Yende, yevagi ne yu munoongu wumoosi!»

Sesu gu mbuge Marte ne Mari

³⁸ Ve yendenge Sesu mu nzile ne bayikitsi baandi, bapule ve diimbu dimoosi. Vane vebile mugyetu ndugandi Marte ayake Sesu gu ndagwandi.

³⁹ Abile ne mwaane ngwandi, ndugandi Mari. Mari abile matsagele ve tsi ve wusu Fumu ne ayulungu maambu maloonzenge Sesu.

⁴⁰ Marte abile ne mbili bisalu ne akayigenenge. Aruge ve mbare Sesu, ayambile yandi re: «Fumu, mwaane maame agonesiise mapiinze mudyanze bisalu byootsu, yisegonelabe page mu dyaambu dyena? Kagu yambile yandi arugi gu yamune me.»

⁴¹ Fumu ayagule yandi re: «Marte, Marte, yigonekayigene ne yine mataase mu mbili maambu,

⁴² te guke dyaambu dimoosi dingyenze. Mari atsesoole dikabu didinyi ne gusaandi mutu wukerungule wuduumbe ya dyo.»