Luke 1 - Sangu: Isangu (snq) NT

¹ Yivuunde Tofile, mbili batu bayelige wuteende maambu mavyoge ve ganegaretu.

² Banyigule mo nave yulu yawu ne bimweenyi bibile ve dibaandu di maambu mene, babamakalugu miloonzi mi maambu ma Nzambi.

³ Ve yulu wuditige maambu mene mootsu baande ve dibaandu, ne me gaandi matsetaase re bweedi muteendile yu musamu wene mu mangike mangike Tofile.

⁴ Mure yikeyabe yimwanze gyotsu gi maambu mene.

Diburu di Sa Batise

⁵ Gubile muveegitsi malagu mu dikyesi dikumenge Irode gu tseengi yi Sudé, dine dyandi Sakari, abile gu dikabu di Abya. Mugatsyandi dine dyandi Disabeti, abile ndaandi yi Aron.

⁶ Sakari ne mugatsi babile basuungeme ve wusu Nzambi, bakyelenge migyele myootsu ne birumu bi Fumu guga sumune.

⁷ Te basebile ne mwaane, mumbare Disabeti abile yigumbe. Yawu bootsu babile keke binunu.

⁸ Wisi wumoosi, Sakari adyanzenge yisalu gyandi gi muveegitsi malagu ve wusu Nzambi, mumbare bile re dikyesi di dikabu dyandi mudyanze, ne vane guvyoge dyaambu.

⁹ Bavage yikanugu, navevaga yawu ne kale ne yikanugu gyene gisoole re Sakari mu wunyingene guyoke miyoombu gu Ndagu Nzambi.

¹⁰ Ve yoka Sakari miyoombu batu bootsu babile gu kane nusaambile.

¹¹ Ne vane, kime yi Nzambi asupugile Sakari, nuteleme gu tselu yi mabagele, ve yitsige gi yokungu miyoombu.

¹² Sakari nulabe yandi, aparemugu, ne agaangu ne wome.

¹³ Te kime yi Nzambi ayambile yandi re: «Sakari yiyalabe wome, mumbare Nzambi atseyulu disaambulu dyagu.» Mugatsyagu Disabeti aguburile yu mwaane dibagele, ne yiguluge yandi re: «Sa.»

¹⁴ Yigulabe wunyi wu mbili mu yandi ne batu bambili bagusaangile diburu dyandi.

¹⁵ Ne yandi agubile mutu wungyenze ve wusu Fumu. Asakenu malamu, nisi ma kale ne agubile wubasu ne Dinyunyi Disuungeme baande gu difumu di ngwandi.

¹⁶ Agugabuse mbili baane ba Israel gu Nzambyawu.

¹⁷ Agwitse ga kime yi Nzambi ne dinyunyi ne ngudi yi mubigitsi Ili, munoongise batayi ne baane bawu ne mukaluse mirime mi bange manzange, mu yululu batu basuungeme, akegukigile Nzambi dikabu di batu babakaroondi maambu mandi.

¹⁸ Sakari ayambile kime Nzambi re: «Maguyabe dyaambu dyene nde tsenyi? Mane mugatsi dimanune.»

¹⁹ Kime Nzambi ayagule yandi re: «Mare Gabryel, makatelimi ve wusu Nzambi, mamasindugu muyambile, nuloonze yu tsaangu yiyinyi.

²⁰ Kagu yigubile yibubu, yisakebeyambile kwanga ne mu wisi wukesupugu maambu mene. Mumbare yisane gitu mu maambu mami makelabene mu dikyesi dyene.»

²¹ Batu babile ne kyere mumbare Sakari avure tsiinge gu yirini giyokungu miyoombu.

²² Te ve vate yandi, aseberungule wuyambile nawu. Yawu bayulusu re atselabe yimage. Akalugu yibubu, ayambilenge nawu keke ne biliimbe.

²³ Ve mane Sakari wudyaanze, agabugu gu ndagwandi.

²⁴ Ve yulu vane mugatsyandi Disabeti abege dimi, migweli miranu asepulenge gu kane abilenge ke gutsi ndagu. Ataasenge gu murime wandi re:

²⁵ «Labe di Nzambi atsevagile me, mabetsya ne tsonyi ve miisu ma batu bami mumbare maseburenge, te Nzambi atselabe me ngyebe muburule me yo.»

Tsaangu yi diburu di Sesu

²⁶ Mu mugweli wu musamunu, Nzambi asindige kimandi Gabryel gu divule di Galilé gu Nasarete.

²⁷ Gu nuumbe mugyetu yiganeneyabe babagale yibaande Susefu muyonge. Yandi abile ndaandi yi maate David, dine dyandi Mari.

²⁸ Kimene yinyingene gu mbuge Mari muyambile re: «Bile ne yinyunge! Fumu Nzambi ameritsige yu gyese gyandi giginene, yandi ayi nagu.»

²⁹ Mu munoongu nyivwene, Mari ayulu page ne abene wunyigugulu.

³⁰ Kime ayambile yandi re: «Mari yiyalabe wome, mumbare yitsedile myule ve wusu Nzambi.

³¹ Ne mapape yigubege dimi, yigubure mwaane dibagele ne yiguluge yandi re Sesu.

³² Agutsitsungu re Mwaane Nzambi Puungu. Fumu Nzambi agubyatse yandi nave byatsu kagaandi David.

³³ Te agukume mubu ne mubu mu yitsuku gi Israel, ne dinyaange dyandi disakevu.»

³⁴ Mari ayambile kime Nzambi re: «Ake dyo diguvyogile nde tsenyi mumbare masameyabe babagele?»

³⁵ Kime ayagule yandi re: «Dinyunyi Disuungeme digusundigile yu, ne ngudi yi Nzambi Puungu yigufuge yu ne yiluunze gyandi, re dibaandu mwaane wukeburu agubile wuyelimine agutsitsungu re: Mwaane Nzambi.

³⁶ Labe, Disabeti kiindagu ne yandi agoneviinge mwaane, ake ne migweli misamunu.

³⁷ Mumbare gusaandi dyaambu dikelembugunu ne Nzambi.»

³⁸ Vane Mari ayagule re: «Mande musalitsi wu Fumu, dyo divyogi natseyambile yu.» Ne kime Nzambi yigabugu.

Mari anyalise Disabeti

³⁹ Ve vyoge batsufu, Mari ayende nyavu guyelabe Disabeti gu divule di mukoongu wu museengi wu Sudé.

⁴⁰ Anyingene gu ndagu Sakari ne ayubule Disabeti.

⁴¹ Ve siimbule Mari myogu gu Disabeti, mwaane wupupe gu difumu dyandi. Disabeti abasu ne Dinyunyi Disuungeme.

⁴² Ne ayame mundunge wumunene ne ayambile re: «Nzambi atseluunze yu.» Nuvyogilile bagyetu bootsu ne myule myandi miyi ve yulu mwaane wukebure yu!

⁴³ Mande nyi mure nguyi Fumwami ayitsi gu mbugami?

⁴⁴ Mumbare yimelabe ve yitseyubule me, mwaane wutsebase ne yinyunge gugare difumu dyami.

⁴⁵ Yine yinyunge mumbare yibile ne gitu re Fumu agudugise mayambile yandi.

Diimbu di Mari

⁴⁶ Kere vane Mari ayambile re: «Magitse wunene wu Fumwami.

⁴⁷ Malabe wunyi wu mbili mumbare Nzambi atseyobule me.

⁴⁸ Ne atselabe me ngyebe, me musalitsi wandi wugane tsoongu, labe, baande nemunyi wuwu batu bootsu bagutsitsenge me re wuveegu myule.

⁴⁹ Mumbare Nzambi wuvyogilile ngudi atsevagile me maambu mamanene. Dine dyandi Wureele.

⁵⁰ Dingyebe dyandi diyi mubu ne mubu gu bootsu babakagobisi yandi.

⁵¹ Akavagi maambu mamanene ke ne googu wandi wune ngudi. Avavise bababile ne mataase mamabi mu mirime.

⁵² Asekule bafumu mu bakwange bawu, atelige batu babasigeme.

⁵³ Aveege mbili manyi gu bababile ne nzale, ne agabuse bikiti makake mwaasi.

⁵⁴ Aruge muyamune Israel, musalitsi wandi: Aselibene wuritsige diroonde dyandi,

⁵⁵ gu Abaraam ne bandaandi baandi mu yivigu gitabule yandi ne batayi betu.»

⁵⁶ Mari amane migweli mireru gu mbuge Disabeti, kere vane agabugu gu diimbu dyandi.

Diburu di Sa Mubatisitsi

⁵⁷ Dikyesi di Disabeti mudile mwaanandi, dipule. Abure mwaane dibagele.

⁵⁸ Bambaatsi ne bakiinde baandi bayulu tsaangu yi Fumu aritsige diroonde dyandi mu yandi, ne yawu balabe yinyunge naandi mu tsaangwene.

⁵⁹ Ve vyose mwaane tsufu tsaambu, mu wu poombu, bayende naandi mugyerise, baroonde wuluge yandi nduge yi tayandi Sakari.

⁶⁰ Te ngwandi ayambile re: «Gusaandi, agutsitsungu nde re Sa.»

⁶¹ Bayubule yandi re: «Nga gugare yitsuku gyagu gusaandi mutu wune dine dyene!»

⁶² Ne yawu bayubule nyivu gu Sakari ne biliimbe muyabe dine di mwaane.

⁶³ Sakari avonde yiteendulu, ateende re: «Ndugandi nde Sa.» Batu bootsu bagibeme.

⁶⁴ Mbaangu mbaangu Nzambi asiingise Sakari mu beyambile, abwamugu nuyimbile Nzambi.

⁶⁵ Vane ne vane batu bootsu babatsagelenge ve mbare Disabeti bagaangu ne wome, ne gu museengi wu Sudé batu banyigulenenge yawu ne yawu re maambu mamanene mamalabene. Ne yawu babayulungu mo, bataasenge, nuyambile re: «Ne mwaane wene wu mukyeki, wugubile nde tsenyi?»

Diimbu di Sakari

⁶⁶ Bootsu babayulungu maambu mene bakyela mo mu mirime myawu, nuyambile re: «A wuwu mwaane wugubile nde tsenyi?» Dikake di Fumu dibile mu yandi.

⁶⁷ Kere Sakari tayandi abile wubasu ne Dinyunyi Disuungeme ne abige maambu re:

⁶⁸ «Digitsi Fumu Nzambi yi baane ba Israel, mumbare atselabe ngyebe, nuyobule yitsuku gyandi.

⁶⁹ Asindigile yetu muyobulitsi wune ngudi gu dibure di David musalitsi wandi.

⁷⁰ Nane re na yambile yandi dyo kale mu mine mi babigitsi baandi basuungeme re:

⁷¹ Maguyobule yenu mu bakolitsi benu, ne mu ngudi yi babakalabi yenu ngusu.

⁷² Re nane, Nzambi aritsige diroonde dyandi gu batayi betu.

⁷³ Ne abangule yivigu gyandi gitabule yandi ne tayetu Abaraam,

⁷⁴ muvage re ve dikemane yobulu mu dikake di bakolitsi betu, dikesalile yandi guga kyere.

⁷⁵ Nuyende ve wuswandi gugare wuyelimine, ne wusuungeme bawisi bootsu ba monyu wetu.

⁷⁶ Ne yu mwaane wumukyeki, yigutsitsungu re mubigitsi wu Nzambi Puungu mumbare yiguyendenge va wusu Fumu mu balile yandi nzile.

⁷⁷ Muveege batu baandi buyedi muyabe re bamadile monyu, ne musiingulu kokolu mu mabi mawu.

⁷⁸ Nyiinge ke mu dingyebe di Nzambyetu. Anaritsige yiveele gyandi gigu yulu.

⁷⁹ Mutsoombuse bootsu babamatsagele gutsi diviseme, ne gutsi posi yi difu, ne wuyendise matage metu gu nzile yi polu.»

Bubangugulu bu Sa

⁸⁰ Te mwaane abangugunge ne dinyunyi dyandi diboonga ngudi, ne atsagelenge ke gu bitsiige bi yigaangi kwanga ne mu wisi wu supugu yandi muloonze batu ba Israel.