Bisalu bi Bakime 9 - Sangu: Isangu (snq) NT

Sesu atsitse Sol

¹ Mu dikyesi dyene, Sol ataasenge ke wutsogise ne wubokise balaanditsi ba Fumu. Ayende gulabe yivuunde gi baveegitsi ba malagu.

² Atombe yandi migaande mi wusiingise yandi munyingene mu bandagu ba masaambulu tsi gu Damas, mure ga adagise batu, babagele vo bagyetu, balaande nzile Fumu, akegaange yawu muyende nawu gu Serusalem.

³ Sol abile mu nzile yi Damas. Bebele ne divule dyene, vane ne vane, yiveele gikademenge giburugu gu yulu, ne gitseenge yandi.

⁴ Aberuge ve tsi, ne ayulu duufi diyambile yandi re: «Sol, Sol, mugi yigonetsogise me?»

⁵ Atombe re: «Yinde nyi Fumu?» Kere duufi diyagule re: «Mare Sesu, wu yigonetsogise.

⁶ Te teleme, yende gu divule, gune yiguyambulu dikevage yu.»

⁷ Batu babanyale ne Sol basikeme, bagibeme guga dibigu; bayulungu duufi, te baselabe mutu.

⁸ Sol ateleme ne abalule misu, te aseberungule wulabe bivaave. Agaangulu mu googu muyende naandi gu Damas.

⁹ Avyose tsufu yireru ne pafu guga yi guga nu.

¹⁰ Gubile gu Damas mulaanditsi wu Sesu wulugu re Ananyas. Fumu atsoombugile yandi gu Gugare yivivulu ne ayambile yandi re: «Ananyas!» Ayagule re: «Marawu Fumu.»

¹¹ Fumu ayambile yandi re: «Yende nyavu gu mumbambe Wumabagele, ne gu ndagu Suda, yubule mutu wu mwisi divule di Tarse wukatsitsu re Sol. Agonesaambile ne mapape,

¹² ne gu Gugare yivivulu, atselabe mutu dine dyandi Ananyas anyingene ne asunzile yandi makake mure miisu mandi makebalugu.»

¹³ Ananyas ayagule re: «Fumu, mbili batu batseyambile me mu mutu wene, batsenyigule me ne maambu mootsu mamabi matsevagenge yandi mu batu bagu Serusalem.

¹⁴ Ne mana amitse gunu ne dinyaange diveegu yandi ne bivuunde bi baveegitsi bamalagu mugaange bootsu babakasaambili mu dine dyagu.»

¹⁵ Te Fumu ayagule yandi re: «Yende, mumbare matsesoole yandi mu dyanzile me: Aguyabise dine dyami gu batu ba beenyi ne gu bamaate bawu, kere ne gu bisi Israel.

¹⁶ Mabene maguritsige yandi maguge mootsu makelabe yandi mu me.»

¹⁷ Ve yulu vane Ananyas ayende. Anyingene gu ndagu, asunzile Sol makake nuyambile yandi re: «Sol, mwaane maame, Fumu Sesu wutsetutugile yu mu nzile yitsyendenge yu, atsesindige me mure miisu magu makebalugu ne mure yikebile wubasu ne Dinyunyi Disuungeme.»

¹⁸ Vane ne vane, bile were ga bakagele tsibaandugenge gu miisu ma Sol ne mo mabalugu. Ateleme ne abatusu,

¹⁹ kere ayi ne adile ngudi. Sol avyose ma batsufu ne balaanditsi bababile gu Damas.

Sol aloonze Musamu Wumunyi gu Damas

²⁰ Mbaangu mbaangu abaande wuloonze musamu wumunyi gu bandagu tsi masaambulu, nuyambile re Sesu nde Mwaane Nzambi.

²¹ Bootsu babayulungu na yambilenge yandi bagibeme ne batombenge re: «Mutu wuwu sare wutsetsogisenge batu babatsesaambilenge mu dine di Sesu gu Serusalema? Asaruge ga ne dikanyi mugaange yawu ne mu gabuse yawu gu bivuunde bibaveegitsi ba malagwa?»

²² Te Sol agwaase wuloonze ne ngudi. Mabigu mayambilenge yandi maritsigenge re nungyenze Sesu re Wusoolu ne Nzambi. Basifu babatsagelenge gu Damas basebedile mukalu.

²³ Ve vyoge pesu dikyesi, Basifu bakate fuundu mubokise Sol,

²⁴ Te alubusu mu paangu yikate yawu. Bakyelenge binyingululu bi divule ne nyangu ne dibati, mure akeboku.

²⁵ Ne vane balaanditsi ba Sol bayende naandi ne dibati mulabuse yandi tselu yine yi murumbe wu divule nusuundise yandi gugare gyeve.

Sol gu Serusalem

²⁶ Ve pule yandi gu Serusalem, Sol amaange wuyende gunyingene gugare dikabu di balaanditsi ba Sesu; te bootsu balabe wome, mumbare basebile ne gitu re nunzyenze Sol mulaanditsi.

²⁷ Kere Barnabase aboonge yandi, ayende naandi gu bakime. Asupule yawu nave labe Sol Fumu mu nzile ne nave yambulu yandi ne Fumu. Anyigule yawu keke nave loonzenge Sol ne murime wumoosi mu dine di Sesu gu Damas.

²⁸ Baande dikyesi dyene, Sol abile nawu, ayendenge ne agabugenge gu Serusalem, ne aloonzenge ne murime wumoosi mu dine di Sesu.

²⁹ Ayambilenge nene Basifu ba diloongu di Greke ne atsuundenge nawu, te yawu babenenge wubokise yandi.

³⁰ Ve yulu babasiinge Nzambi dyo, bayende ne Sol gu Sesaré, gu yawu bayenze yandi gu Tarse.

³¹ Mu dikyesi dyene, dibuundu dibile ne polu gu Sudé yotsu, gu Galilé ne gu Samari. Dyo dinegenge ne polu, digobisenge Fumu, dibuundu difunyugenge mu ngudi yi Dinyunyi Disuungeme.

Ené abeelugu mu bukate bwaandi

³² Pyere wunyalenge gu tseengi yotsu, wisi wumoosi ayende gu batu babasiinge Nzambi babatsagelenge gu Lida.

³³ Adagise dibagele ditsitsungu re Ené, abile malaambeme ve taangi bilime poombu mumbare abile yikate.

³⁴ Pyere ayambile yandi re: «Ené, mu Sesu Wusoolu ne Nzambi, yimebeelugu! Teleme furige pubagu.» Vane ne vane Ené ateleme.

³⁵ Bootsu babatsagelenge gu Lida ne gu kumu yi Saron balabe yandi ne basiinge Fumu.

Dorkas afwangulu ne Pyere

³⁶ Gubile gu Safa mulaanditsi wu mugyetu wutsitsungu re Tabita. Dine dyene gu Greke re Dorkas divindugulu re tsesi. Makyesi mootsu avagenge manyi ne ayamunenge masaandi.

³⁷ Mu dikyesi dyene, agaangu ne wubeele, ne afu. Ve mane wubwilusu nyurwandi, basunze yo gu yirini gi yulu, gi ndagu.

³⁸ Balaanditsi bagu Safa bayulu re Pyere abile gu Lida, vasebile vale ne Safa. Basindigile yandi babagele babeyi ne tsaangu yiyi: «Kokolu tsyagu, ruge nyavu gu yetu.»

³⁹ Pyere ayende nawu. Ve pule yandi, bayende naandi gu yirini gi yulu gi ndagu. Bakwiili bootsu bagogule va mbarandi ne wulile; baritsigenge yandi bidwaari ne bigubuku birarigenge Tabita ve bilenge yandi kike monyu.

⁴⁰ Pyere avatise batu bootsu, asume magonungu mutsi kere asaambile. Ve yulu vane, agyeluge gu tselu yi fuumbi ne ayambile re: «Tabita, teleme!» Abalule miisu, ve labe yandi Pyere, atsagele.

⁴¹ Pyere agaangile yandi mu googu ne atelige yandi. Kere vane atsitse babasiinge Nzambi ne bakwiili, aritsige yawu yandi, monyu.

⁴² Dyaambu dyene diyabunu gu divule dyotsu di Safa, ne mbili batu basiinge Fumu.

⁴³ Pyere avyose mbili batsufu gu divule di Safa gu ndagu Simu wukuunzenge bivaave ne bibaande bi banyame.