Bisalu bi Bakime 8 - Sangu: Isangu (snq) NT

¹ Sol ne yandi asiinge re Ityene aboku. Wisi wene babaande wutsogise dibuundu di Serusalem time mbili. Bootsu babasiinge Nzambi, veengu ne bakime, bapanzige mu miseengi mi Sudé ne mi Samari.

Sol atsogise dibuundu

² Batu babaroonda Nzambi bayende gu wutsyige Ityene ne bavure wulile mu difu dyandi.

³ Gu Sol, abenenge ke wupanze dibuundu, ayendenge gu bandagu bootsu, agaangenge babasiinge Nzambi, babagele ne bagyetu ne anyingise yawu gu tsugu.

Filip agoneloonze Musamu Wumunyi gu Samari

⁴ Batu babapanzu bayendenge bitsige byootsu nuloonze Musamu Wumunyi wu Sesu.

⁵ Filip ayende gu divule di Samari ne aloonze mu dyaambu di Wusoolu ne Nzambi.

⁶ Piti yotsu yibile ne sige mu musamu wu Filip ve yulungu yo ne ve labenge yo bimwiile bivangenge yandi.

⁷ Manyunyi mamabi mavatenge mu mbili babeetsi nuyase pepe. Kere mbili bikate ne bange wutsokugu ne yawu babeeluge.

⁸ Ne vane yinyunge gibile giginene gu divule dyene.

⁹ Nane dibagele dimoosi dilugungu re Simu akyegulu gu divule dyene. Avagenge maambu ma bulosi ne piti yotsu yi Samari yibile ke digibe. Ataasenge re ande yinonu.

¹⁰ Bootsu ne ngyebe ne yivuunde, babile ne sige mu wuyulu, nulabe mavagenge yandi. Bayambilenge re: «Mutu wuwu nde ngudi Nzambi, yikatsitsu re: “ngudi yiyinene.”»

¹¹ Babile ne sige mumbare bile ametsiinge nuvage maambu mene ma bulosi.

¹² Te ve vage yawu gitu mu Musamu Wumunyi wuloonze Filip mu dyaambu di Bufumu bu Nzambi ne mu dine di Sesu Wusoolu, ne babagele ne bagyetu babatusu.

¹³ Simu yabene asiinge Nzambi, abatusu. Abilenge keke ve mbare Filip, agibeme mu bimwiile bibinene ne bimage bi labenge yandi.

¹⁴ Ve yulu bakime bababile gu Serusalem re bisi Samari batsesiinge musamu wu Nzambi, basindigile yawu Pyere ne Sa.

¹⁵ Ve tsoombugu yawu gu Samari, basaambile mu babasiinge Nzambi mure bakesundulu ne Dinyunyi Disuungeme.

¹⁶ Avane, mbe Dinyunyi Disuungeme disamasunde mu mutu nisi wu moosi; badile ke wubatusu mu dine di Fumu Sesu.

¹⁷ Ve yulu vane, Pyere ne Sa basunzile yawu makake ne Dinyunyi Disuungeme disundile yawu.

¹⁸ Ve labe Simu re Dinyunyi Disuungeme digonesunde mu babasiinge Nzambi ke musunzulu makake ne bakime, aveege yawu badole

¹⁹ nuyambile re: «Veeganu ne me dinyaange didine, mure batu bootsu ba makesunzilenge makake bakedile Dinyunyi Disuungeme.»

²⁰ Te Pyere ayagule yandi re: «Ne yu ne badole bagu dinyamegene, mumbare yitsetaase re bikaveegi Nzambi nzolu, yirungulu wusuumbu ne badole!

²¹ Yisane dikabu, nisi mukwanyi gu dyaambu didi mumbare murime wagu wusaandi wuyelimine ve wusu Nzambi.

²² Kagu burule mataase magu mamabi ne saambile Fumu, ga aroonde wusiingile yu kokolu mu munoongu dine ditaase.

²³ Magonelabe re yine nzuungi yivyogilile, ne yinde muvige dibi.»

²⁴ Kere Simu ayambile Pyere ne Sa re: «Saambilanu Fumu yenu bene mu me, mure midigu mitsetube yenu mikererugile me.»

²⁵ Ve mane yawu wuvage bumweenyi, nuloonze maambu ma Fumu, kime tsyotsu tsi beyi tsigabugu gu Serusalem. Mu nzile bayambilenge Musamu wu Munyi mu mbili miimbu ma Samari.

Filip ne munduumbe wu Ityopi

²⁶ Kime Fumu ayambile Filip re: «Teleme, yende gu nzile yikasundi gu Serusalem nguu ne gu Gaza. Nzilene yisakavyogi mbili batu.»

²⁷ Filip aleenge mweendu, mu nzilene, abeengunu ne dibagele, munduumbe wumunene mwisi Ityopi, wukyelenge manyi ma Kandase maate ma Ityopi. Dibagele dyene aburugungu gu Serusalem gubile yandi gu wusaambile Nzambi.

²⁸ Agabugenge gu mbugandi, abile matsagele gugare yiyendulu gyandi nurange mugaande wu mubigitsi Isayi.

²⁹ Dinyunyi Disuungeme diyambile Filip re: «Yende gudagise dibagele didi.»

³⁰ Filip ayende mbaangu, ayulu na rangenge mwisi Ityopi mugaande wu mubigitsi Isayi. Atombe yandi re: «Yigoneditige magonerange yu mana?»

³¹ Dibagele ayagule re: «Maditige mo nde tsenyi ga mesadile mutu wusupule me mo?» Atsitse Filip mupeke mu yiyendulu gyandi ne mutsagele va mbarandi.

³² Mireendu mirangenge yandi re mimi: «Abile ga tabe yigonebegu ve mbure yikaboku biboodu, nakabili mwaane tabe yibubu ve wusu wugonetsake yandi. Asetube dibigu.

³³ Aleenzu ne asebile ne mutu wu kambugile yandi. Wukeyambile mu bandalule baandi nde nyi? Mumbare batsetabule monyu wandi mu mutambe.»

³⁴ Munduumbe atombe Filip re: «Kokolu, yambile me, mubigitsi agoneyambile nane nde mu nyi? Nde mu yabene vo nde mu mutu wumosi?»

³⁵ Ne vane, Filip ayagule, abaande ne mabigu mame magu migaande mi Reel, aloonze yandi musamu wumunyi wu Sesu.

³⁶ Ve yendenge yawu, bapule ve mbure yibile maambe. Kere vane munduumbe ayambile re: «Maambe momame; kagu yirungule wubatusu, sare nana?» [

³⁷ Filip ayambile yandi re: «Ga yibile ne gitu gu murime wagu wotsu, yirungule wubatusu.» Dibagele ayagule re: «Mane gitu re Sesu Wusoolu nde Mwaane Nzambi.»]

³⁸ Kere asikige yiyendulu. Filip asunde naandi gugare maambe ne abatusu.

³⁹ Ve vate yawu gu maambe, vane ne vane, Dinyunyi di Fumu diyende ne Filip. Munduumbe asebelabe yandi, te atole nzile ne yinyunge.

⁴⁰ Filip atutuge kende gu Asote, kere avyoge mu mavule mavule nuloonzenge Musamu Wumunyi, kwanga ne ve pule yandi gu Sesaré.