Bisalu bi Bakime 7 - Sangu: Isangu (snq) NT

Musamu wu Ityene

¹ Yivuunde gi baveegitsi ba malagu atombe yandi re: «Magoneyambulu mu yu ne batu babe ke ma nungyenza?»

² Ityene ayagule re: «Baane ba maame ne bivuunde, yulwanu me. Nzambi bunduumbe atutugile mukoku wetu Abaraam ve bile yandi gu Mesopotami ne gineyende gu wupake gu Garan.

³ Ayambile yandi re: “Burugu gu tseengyagu, siise yitsuku gyagu ne yende gu tseengi yi maguloonge yu.”

⁴ Ve yulu vane Abaraam aburugu gu tseengi yi bisi Kaldé gu kuumbe gu Garan. Kere ve fu tayandi, Nzambi avyose yandi gu tseengyene yigonetsagele yenu nemunyi.

⁵ Nane Nzambi aseveege Abaraam nisi yibuge nisi ma yiswemulu gi nyangu; te agane wuveege yandi tseengi, bandalule baandi ne yawu gaandi bagupake gu yo gu nzimandi. Nane mu dikyesi dyene, Abaraam asebile ne mwaane.

⁶ Nzambi ayambile yandi re: “Yinzime gyagu gigupake gu tseengi yi gayabe yawu, gukekalugu yawu bavige ne bagutsogusu mu kame tsiyine tsi bilime.

⁷ Te magusosise yitsuku gikekaluse yawu bavige. Kere vane baguburugu vane ne bagubondimine me ve mbure yiyi.”

⁸ Ve yulu vane Nzambi atuunge yivigu yane Abaraam, yiliimbe gi gyo wugyere. Re mu dyo Abaraam agyere mwaanandi Isaak ve dugise yandi tsufu poombu. Munoongu wumoosi Isaak agyere mwaanandi Sakob, ne Sakob agyere baane baandi ba digumi ne babeyi, mikoku myetu mi mareege.

⁹ Mikoku myene milabe mwaane ngwawu Susefu ngusu. Basuumbise yandi mu bile muvige gu Isipte. Te Nzambi abile naandi.

¹⁰ Ayobule yandi mu maguge mandi mootsu. Aritsige yandi diroonde dyandi aveege yandi buyedi ne gyese va wusu Farao, maate me Isipte. Farao aveege Susefu dinyaange di wurume bivaave bi tseengi yi Isipte ne bi ndagwandi yotsu.

¹¹ Ne vane, nzale yinene yidugulu Isipte gyotsu ne tseengi yi Kanaan. Mikoku myetu mitsoge mbili ne misebedile bi wuyi.

¹² Ve yulu Sakob re guyi bi wuyi gu Isipte, mu nyoongu yimareege asiindige mikoku myetu.

¹³ Mu nyoongu yi mubeyi yisiindugu yawu ne Sakob, Susefu ayabene ne baane ba ngwandi, vane Farao ayulu gaandi re gine re yitsuku gi Susefu.

¹⁴ Ve yulu vane, Susefu asindige baane bangwandi muyende guboonge tayandi Sakob ne bakiinde baandi bootsu, ditalu bile re magumi tsaambu ne batu baranu.

¹⁵ Kere vane Sakob ayende gu wukuumbe gu Isipte kwanga ne ve difu dyandi, ne mikoku myetu keke.

¹⁶ Babege bafuumbi ne banangule bo nguu ne gu Sisem gu veru yawu gu ngile yisuumbe Abaraam ne badole ne baane ba Amor, gu Sisem.

¹⁷ Ve gogule dikyesi digane Nzambi mu wusuupule ndagi yivage yandi gu Abaraam, yitsuku gyetu givure wufunyugu gu Isipte.

¹⁸ Kere vane maate mamoone maseyabe Susefu, akumenge gu Isipte.

¹⁹ Maate mene adyobenge yitsuku gyetu, nutsogisenge mikoku myetu, nusuke yawu musaambule baane bawu bafuuge mure bakefu.

²⁰ Mu dikyesi dyene Muyise aburu, abile yivwaandi gi mwaane, wuroondu ne Nzambi. Abungulu migweli mireru gugare ndagu tayandi.

²¹ Ve saambulu yandi, mwaane Farao wu mugyetu ayake yandi ne abungule yandi ga mwaane wu yabene

²² Nane re nave neenzu Muyise maambu mootsu mabuyedi ma bisi Isipte ne akalugu mutu wune buyiimbu mu maambu mayambilenge yandi ne mavagenge yandi.

²³ Ve bile yandi ne magumi mamane ma bilime, Muyise adile ditaase di wuyende gu yitsuku gyandi, bisi Israel.

²⁴ Alabe mwisi Isipte agonetsogise mwisi Israel; Muyise abile tselu yi mutu wutsogusungu. Mu bene wuviinde mwisi Isipte, aboke yandi.

²⁵ Muyise atasenge nde re, baane ba ngwandi bisi Israel baguyulusu re Nzambi asindige yandi nde muyobule yawu. Te baseyulusu.

²⁶ Ne ngwaali yine, Muyise abeengunu ne bisi Israel babeyi balwaane ne aroonde wunoongise yawu. Ayambile yawu re: “Bambaatsi bami, yenu nde baane ba nguyi; mugi yenu digonetsogesene?”

²⁷ Te wutsogisenge mbatsyandi apunze Muyise nuyambile naandi re: “Wutsesunze yu ga yivuunde ne yivovi ve ganegaretu nde nyi?

²⁸ Yigoneroonde wuboke me natseboke yu mwisi Isipte masiga?”

²⁹ Ve yulu yandi nane, Muyise ariine ne ayende gupake gu tseengi yi Madyan. Guune, abure baane babeyi ba babagele.

³⁰ Ve vyoge magumi mamane ma bilime, gugare kumu bebele ne mukoongu wu Sinayi kime yiyulu yitutugile Muyise gugare miludi gu dikwake di ne mbaawu.

³¹ Muyise agibeme mu biviinge bilabe yandi. Te agogule mukuunze monige. Avane re ve yulu yandi duufi di Fumu di yambile re:

³² “Mare Nzambi yi bakaage bagu, Nzambi yi Abaraam, Nzambi yi Isaak ne Nzambi yi Sakob.” Muyise nuregeme ne wome, asebepuke wumonige.

³³ Avane Fumu ayambile yandi re: “Burule mataambi magu mumbare mbure yiyu yine yinde yisuungu.

³⁴ Matselabe nagonetsogusu yitsuku gyami gu tseengi yi Isipte, matseyulu mikayu myandi re mamitse gu yobule gyo. Makesindige yu gu Isipte, sa yendingi.”

³⁵ Muyise wene re wubusu ne bisi Israel nuyambile yandi re: “Wutsesunze yu ga yivuunde ne yivovi nde nyi?” Mu kime yi tutugile Muyise ve dikwake, Nzambi asindige yandi mubile yivuunde ne muyobulitsi.

³⁶ Muyise re wupuse baane ba Israel gu Isipte nuvage maambu mabiviinge ne bimwiile gu tseengyene, gu mubu wu beenge ne gu kumu mu magumi mamane ma bilime.

³⁷ Muyise wene re wubeyambile baane ba Israel re: “Ve pwasi baane bangwenu, Nzambi agusoole mubigitsi ga me.”

³⁸ Ve bile yitsuku gi Israel gigukegane gu kumu, Muyise abile vane, yandi re wubile yikambi ve pwase mikoku myetu ne kime yulu yiyambila naandi gu mukoongu Sinayi. Muyise adile mabigu ma monyu ma Nzambi muloonze yetu mo.

³⁹ Mikoku myetu baseroonde wugobise yandi; babuse yandi babilenge ke ne nzale wugabugu gu Isipte.

⁴⁰ Bayambile Aron re: “Kuunzile yetu banzambi tsikeyendenge ve wuswetu mumbare yetu diseyabe dyaambu ditsedile Muyise, yandi wutsepuse yetu gu Isipte.”

⁴¹ Ne vane, bakuunze mwaane pagese ne baveege dilagu gu yikooku gyene, bavage diyayi ne yinyunge nusaangile yikooku gikuunze yawu bene.

⁴² Te Nzambi aduke yawu nzime, asiise yawu musaambile banyetsi, tsungi, ne dyumbi natendu dyo gu mugaande wu babigitsi re: “Yitsuku gi Israel, mu magumi mamane ma bilime gu yigaangi, yenu ditseveegenge biboodu ne malagu mamosi nde gu ma?

⁴³ Gusaandi, yenu ditsepape yigolini gi nzambi yilugu re Molok. Yenu ditsepape yigolini gi dinyetsi di nzambyenu Refan. Re bikooku bitsekuunze yenu bene mubondimine byo. Re dibaandu maguyenze yenu gu tseengi yivyogilile Babilone vale.”

⁴⁴ Gu kumu, mikoku myetu babile ne tsapele yikyelungu migaande mi yivigu. Giruungu munoongu wumoosi na Nzambi arume Muyise. Ayambile yandi mu wuruunge ke mu yibagunu gilabe yandi.

⁴⁵ Ve yulu vane, tsapelene yiveegu mikoku myetu mu dikyesi dyawu. Yawu ne Sosuwé bakalimine tseengi yi bitsuku bipunze Nzambi ve wuswawu. Bayende ne tsapelene gu tsengyene, ne yo yisaale kwanga ne ve dikyesi di David.

⁴⁶ David adile gyese va wusu Nzambi, avane atombe yandi musiingise re aruungi ndagu Nzambi yi Sakob yikesaambilenge yitsuku gi Israel.

⁴⁷ Te Salumu re wuruunge ndagu.

⁴⁸ Te Nzambi Puungu asakatsageli mu bandagu baruungu ne makake ma batu. Nagone yambile mubigitsi re:

⁴⁹ “Fumu yare, yulu re kwangami, Mutambe yitsarulu gyami gi mataambi. Munoongu wu ndagu yi yenu dikerungule wuruungileme nde wunyi? Mbure nde yinyi yikerungule me wulooge?

⁵⁰ Bine byootsu masekunze ga ne makake mamya?”

⁵¹ Yenu badine nziinde, ne murime ne maru bikebitsibeme mu bambile ba Nzambi, yenu badisegonelooge wubuse Dinyunyi Disuungeme! Yenu dike ga mikoku myenu!

⁵² Mubigitsi wugatsogusu ne mikoku myenu de wunyi? Baboke bababige mu dyaambu dimwiitsu wu mutu wumoosi Wusuungeme; vave yenu dimegabe keke yandi, nuboke.

⁵³ Mu bakime ba yulu, Nzambi aveege yenu birumu byandi, yenu disegobise byo!»

Ityene aboku

⁵⁴ Bivuunde bibivulu ve yulu yawu mabigu mene ne bagwerisa minu ne kabu mu Ityene.

⁵⁵ Te yandi, gugare Dinyunyi Disuungeme, amoniga gu yulu; alabe bunduumbe bu Nzambi ne Sesu mutele ve mabagele ma Nzambi.

⁵⁶ Ayambile re: «Yulwanu, magonelabe yulu mwaasi ne Mwaane mutu mutele ve mabagele ma Nzambi.»

⁵⁷ Bayame mindunge gu ga yulu ne bavange maru mawu. Yawu bootsu bayiteme ve yulwandi,

⁵⁸ badutumune yandi ne bavatise yandi gu divule banoonge yandi mamanyi re akefu. Basiise bidwaari byawu ve wusu mufudu dibagele wutsitswa re Sol, mu wukyele.

⁵⁹ Ve noongwa yandi mamanyi, Ityene asambile re: «Fumu Sesu, boonge dinyunyi dyami.»

⁶⁰ Kere vane asume magonungu mu tsi, anebwamuge pepe: «Fumu, yaveege yawu mbele yi dibi dyene!» Ve mane yandi wuyambile nane, afu.