Bisalu bi Bakime 6 - Sangu: Isangu (snq) NT

Batu tsaambu basoolu mu wuyamune bakime

¹ Mu dikyesi dyene, nane ditalu di balaanditsi ba Sesu difune, babasiinge Nzambi ba diloongu di greke bakayigenenge mu babayambilenge ibré. Bayambilenge re: «Bawisi bootsu mu dikyesi dikagabu biyi, bakwiili ba tselwetu bakalibunu.»

² Re mu dyo digumi ne kime beyi bavage yibeengunu ne bootsu babasiinge Nzambi, bayambile re: «Sa bweedi mu yetu, musiise wuloonze mabigu ma Nzambi mugabe biyi.

³ Re disine, baane ba tayi, soolanu ve ganegarenu batu tsaambu babane bitsagilitsi bibinyi, ba babasu ne Dinyunyi Disuungeme ne buyedi, kere yetu dikesiingige yawu mufune wuvage yisalu gyene.

⁴ Kere vane yetu dikesiingenenge nuvyose dikyesi dyetu musaambile ne muvage yisalu gi wuloonze maambu ma Nzambi.»

⁵ Dibuundu dyotsu disiinge ditaase dyene. Ne vane, basoole Ityene, dibagele dibase ne gitu ne Dinyunyi Disuungeme, kere ne Filip ne Prokore ne Nikanor ne Timu ne Parmenas ne Nikolas mwisi divule di Antyose, wusiinge wusaambile Nzambi Basifu.

⁶ Ne vane baritsigu gu bakime, basunzile yawu makake mu yulu myuru myawu, kere basaambile mu yawu.

⁷ Musamu wu Nzambi wugwaase wutsamuge. Ditalu di babasiinge Nzambi difune mbili gu Serusalem yotsu, ne nzoku baveegitsi ba malagu bavage gitu mu Sesu.

Ityene agaangu

⁸ Ityene wubasu ne myangu ne gyese gi Nzambi avagenge maambu ma biviinge ne bimwiile bibinene gugare yitsuku.

⁹ Basifu bamosi baseroondenge mavagenge Ityene. Bile re Basifu ba Sirene ne ba Alekesandi babasaambilenge gu ndagu disaambulu yitsitwa re, Bavige bayobulu, kere ne Basifu ba Silisi ne ba museengi wu Asi. Yawu bootsu batswake ne Ityene.

¹⁰ Te basedile mukalu mumbare Ityene ayambilenge ne buyedi buveegwa yandi ne Dinyunyi Disuungeme.

¹¹ Ne vane, basive batu gu diswele muyambile re: «Yetu ditseyulu natseseenga yandi Muyise ne Nzambi mu mabigu matsetubenge yandi.»

¹² Batuumbule batu ne bivuunde bi Basifu ne bivuunde bi bateenditsi ba migage. Kere vane yawu bayiteme mu Ityene, bagaange yandi ne babege yandi ve wusu bivuunde bi Basifu, bivuunde bi baveegitsi ba malagu ne bivuunde bi bateenditsi ba migage.

¹³ Babege gaandi ne bimweenyi bi bifutsi biyambile re: «Mutu wuwu asegonesiise wuyambile maambu mabive mu ndagu yi reel yi Nzambyetu ne mu mugage wu Muyise.

¹⁴ Yetu ditseyulu natseyambilenge yandi re Sesu yiyi yi mwisi Nasarete agupanze Ndagu Nzambi ne agukaluse maambu maloonzu yetu ne Muyise.»

¹⁵ Bivuunde byootsu bibile matsagele vane, bamonige Ityene ne nzuu ne balabe re mbalengandi yibile ne yibagunu gi mbalenge yi kime yulu.