Bisalu bi Bakime 4 - Sangu: Isangu (snq) NT

Pyere ne Sa ve wusu bivuunde

¹ Pyere ne Sa bayambilenge kike ne piti, ve tsaange baveegitsi ba malagu ne yivuunde gi bakyelitsi ba Ndagu Nzambi ne basadusi.

² Babile ne kabu yobene mumbare kime beyi baloonze piti nuyambile yawu re, ve fwangugu Sesu, kagu ne bafuumbi barungule wufwangugu.

³ Bagaange yawu ne banyingise yawu gu tsugu ne dibati dyene mumbare wisi bile wumayide.

⁴ Nane, ve ganegare bootsu babayulu musamu wu bakime, mbili basiinge Nzambi ne dikabu difune, ditalu bile bebele ne toseni yiraanu tsi batu.

⁵ Ne ngwaali yine, bivuunde bi Basifu ne bivuunde bi baveegitsi ba malagu ne bateenditsi ba migage babeengunu gu Serusalem.

⁶ Gu bile Ane, yivuunde gi baveegitsi ba malagu, Kayif, Sa, Alekesande ne mbubi yotsu yi yivuunde gi baveegisi ba malagu.

⁷ Barugise bakime ve wuswawu ne batombe yawu re: «Yenu ditsebeeluse yikate nde mu dinyaange vo nde mu dine di nyi?»

⁸ Ne vane, Pyere wubasu ne Dinyunyi Disuungeme ayambile yawu re: «Bivuunde,

⁹ yetu digonedumu banzidu nemunyi mu dinyi ditsevagile yetu yikate. Digonetombu natsebeelugu mutu wuwu.

¹⁰ Vane, bweedi yenu diyabi dyo, yenu bootsu, ne yitsuku gyotsu gi Israel: Ga mutu wuwu ayi ve wuswenu ne buvinyi, nde mu dinyaange di dine di Sesu mwisi Nasarete Wusoolu ne Nzambi, wugomine yenu va kurusu, wuraambusu ne Nzambi ve ganegare bafuumbi.

¹¹ Seswene re: “Dikuti divere yenu baruungitsi re dyo dimakaluge dikuti di time.”

¹² Wuyobulu wukadilu ke mu yandi, mumbare gu buloongu bwotsu, Nzambi aseveege batu mutu wumosi wukerungule wuyobule manenu.»

¹³ Bivuunde byootsu bibile vane bigibeme mbili, mumbare balabenge re Pyere ne Sa bayambilenge guga wome ne bayabenge re yawu batu banane, baseneenge. Basetsiimbungu gaandi re Pyere ne Sa balaanditsi ba Sesu.

¹⁴ Te yawu balabe gaandi dibagele dibeeluge, mutele ve mbarawu ne basedile mukalu.

¹⁵ Bivuunde byootsu bavatise yawu gu yirini gi gukuunza yawu maambu ne basaale ne wuyambile yawu ne yawu.

¹⁶ Bayambilanenge re: «Dikevage batu babe nde tsenyi? Babatsevage yimwiile gi ga bapage, ne bisi Serusalem bootsu basetsiimbu; ne yetu disakerune.

¹⁷ Te sabweedi re tsaangu yi dyaambu didi yiyulunu ne mbili batu. Kagu dikali yawu bakere bekoonde wuyambile ne pasi mutu mu dine di Sesu, mbe bagukilusu.»

¹⁸ Ne vane, bivuunde babetsitse yawu ne bakale yawu re diyabepuke wuyambile vo wuloonze mu dine di Sesu.

¹⁹ Te Pyere ne Sa bayagule yawu re: «Pasanu mbaanze yenu bene, disuungeme mu ditaase di Nzambi nde wugobise yenu vo nde wugobise yandi?

²⁰ Gu yetu kyelu, disakerungule wuruumbe mu maambu maditselabe ne maditseyulu.»

²¹ Bivuunde bibekoonde wulubuse yawu kere banyangumuse yawu. Basedile disuge diwukilise yawu, mumbare batu bootsu bagitsa Nzambi mu mootsu malabene.

²² Dibagele dibeelugu mu yimwiile abile ne magumi mamane ma bilime ne batsube.

Disaambulu di babasiinge Nzambi

²³ Ve nyangumusu yawu, Pyere ne Sa bayende gu dikabu di bambaatsi bawu ne banyigule yawu mootsu mayambile bivuunde bi baveegitsi ba malagu ne bivuunde bi Basifu.

²⁴ Ve mane yawu wuyulu musamu wene, bootsu babasiinge Nzambi bapute ngoongi yi wusaambile. Banangule muufi re: «Nzambi Puungu, yire wusuunde yulu ne tsi ne mubu ne byootsu bi muune.

²⁵ Mu Dinyunyi Disuungeme, yire wuveege mukoku wetu David musalitsi wagu, mabigu maame: “Batu ba maloongu bayi ne kabu ne Nzambi, te nde mugi? Batu bakate bapaangu, te ke tsi nzolu!

²⁶ Bamaate ba tsi yi bayulusunu mu mulwaani, ne bivuunde bigukegane mukole Fumu Nzambi, ne mukole mutu wusoole yandi.”

²⁷ Dinde nungyenze, Irode ne Ponse Pilate bagukegene gu divule didi ne batu ba beenyi ne batu ba Israel. Bakole Sesu musalitsi wagu wu reel, wutsesoole yu.

²⁸ Vane bavage maambu mootsu mamane swekige yu ne googu wagu ne diroonde dyagu.

²⁹ Ne mapape Fumu Nzambi, labe navegoneyambile yawu re digutsogusu, ne yamune basalitsi bagu muloonze musamu wagu guga wome.

³⁰ Ritsige ngudyagu mure babeetsi babeelugi, bimwiile ne maambu ma biviinge bilabeni mu dine di Sesu musalitsi wagu wu reel.»

³¹ Ve mane yawu wusaambile, mbure yibile yawu yiregeme. Yawu bootsu babasu ne Dinyunyi Disuungeme ne baloonza musamu wu Nzambi guga wome.

Babasiinge Nzambi bapute manyi mawu

³² Dikabu di babasiinge Nzambi dibile dyawu dimoosi ne mu murime ne mu mataase. Mutu nisi wumoosi aseyambilenge re manyi mame nde mami, te ve ganegarawu byootsu bibile ke dipute.

³³ Bakime bavagenge bumweenyi bu bufwangugulu bu Fumu Sesu ne ngudi yivyogilile, ne Nzambi aveegenge yawu bootsu myule mivyogilile.

³⁴ Gusaandi mutu ve ganegarawu wubunungu pasi yivaave. Ne vane, bootsu bababilenge ne banuungi vore bandagu basuumbisenge, kere badole tsidila yawu babagenge

³⁵ ne baveega tsyo bakime; bagabila mu mutu mutu nzi yibile yandi ne nzale.

³⁶ Nane re navage dibagele dilugu re Susefu, wubile gu yibaandu gi Levi, aburu gu Sipre. Bakime baluge yandi re Barnabase, diyendigile re dibagele dikagwaarisi.

³⁷ Asuumbise nuungyandi, abege badole nusunze tsyo ve wusu bakime.