Bisalu bi Bakime 3 - Sangu: Isangu (snq) NT

Dibagele di yikate dibeeluge

¹ Wisi wumoosi, Pyere ne Sa bamake gu ndagu Nzambi musaambile mu magwere mareru matsisige.

² Vavene ve bile dibagele diburu yikate, apapungu ne batu bawisi bootsu. Asunzungu bebele ne gyabutsu gi Ndagu Nzambi, gi tsitsungu re Gyabutsu Giginyi, mure akerimenge ne babanyingenenge gu Ndagu Nzambi.

³ Ve labe yandi re Pyere ne Sa bakenyingene, arime badole.

⁴ Pyere ne Sa batsoke ya bangyenyi. Kere vane Pyere ayambile yandi re: «Monige yetu.»

⁵ Dibagele amonige yawu iswiisu, mumbare ataasenge re aguveegu yivaave nawu.

⁶ Ve yulu vane, Pyere ayambile yandi re: «Masaandi nisi ne badole, nisi ne lor, te makeveege yu gi nami: mu dine di Sesu Kristi Wusoolu ne Nzambi, mwisi Nasarete, teleme, yendenge!»

⁷ Kere Pyere agaangile yandi mu googu wu mabagele muyamune yandi wuteleme. Vane ne vane byoru ne bakyengingi bi yikate bigwaare;

⁸ mu dikabi dimoosi ateleme ne ayende. Anyingene yane bakime gu Ndagu Nzambi, ayendenge ne makabi nugitse Nzambi.

⁹ Piti yotsu yilabe nayenda yandi nugitse Nzambi.

¹⁰ Ve yabe yawu re yandi re wutserimenge matsagele ve Gyabutsu Giginyi gi Ndagu Nzambi, yawu bootsu bakambulu, bavure wugibeme mu dyaambu dilabene mu yandi.

Pyere ayambile ne piti gu Ndagu Nzambi

¹¹ Mutu wubeelugu aseroonde wuyagene ne Pyere yane Sa. Batu bootsu bagibeme ne bayitse mbaangu gu yawu ve mbure yibile makuti manoku yitsitsungu re Digale di Salumu.

¹² Ve labe Pyere nane, ayambile ne piti re: «Batu ba Israel, mugi yenu dimagibeme mu dyaambu dimavyoge vave? Mutu wuwu asateleme mu ngudi yi yetu bene konane mumbare diyibatareme ne Nzambi.

¹³ Nzambi yisaambile Abaraam ne Isaak ne Sakob, mikoku myetu, aritsige bunduumbe bu musalitsi wandi Sesu. Yenu bene digabe yandi gu bivuunde ne yenu dibuse yandi ve wusu Pilate, nane Pilate aroonde wunyangumuse yandi.

¹⁴ Te yenu dibuse yandi wusebile ne mabi, wubile Wusuungeme. Yenu diroonde ke re bayobuli nde muboongi.

¹⁵ Ne vane yenu dibokise wusuunde monyu. Te Nzambi afwangule yandi ve pwase bafuumbi ne manenu diyi bimweenyi.

¹⁶ Ngudi yi dine di Sesu re yitseveege myangu gu mutu wuyatsi yenu, nugonelabe yenu wuwu ne mu gitu gi naandi mu yandi. Gitu ginandi mu Sesu re gitsebeluse yawotsu nave gonelabe yenu bootsu.

¹⁷ Te vave, baane ba maame, masetsiimbu re yenu ne bivuunde byenu divage nane nde mumbare diseyaba yimwanze.

¹⁸ Te maambu mayambile Nzambi kale gu babigitsi bootsu matselabene; ayambile re Wusoolu naandi agutsoge.

¹⁹ Kagu kalulanu bitsagilitsi byenu ne gyeluganu gu Nzambi mure akebunzule mabi menu.

²⁰ Ga yenu divage mootsu mane, Nzambi aguveege yenu makyesi ma wulooge ne agusindigile yenu Sesu Wusoolu naandi kale mu yenu.

²¹ Mu dikyesi didi, Sesu agutsagele kike gu yulu kwanga ne vekeberingeme maambu mootsu, nave yambile Nzambi dyo kale gu babigitsi baandi bareele.

²² Muyise ayambile re: “Fumu Nzambyenu agusindigile yenu mubigitsi ga me, wukebile mutu wu yitsuku gyenu. Yenu diguyulungu mootsu ma yandi akeyambila yenu.

²³ Mutu wotsu wusakeyululu mubigitsi wene agupunzu gugare batu ba yibaandu gi Nzambi ne aguboku.”

²⁴ Babigitsi babayambile, baande Samyel ne babaruge va yulwandi, banyigule mutu mutu maambu ma batsufu tsitsi.

²⁵ Ndagi yilagene Nzambi gu babigitsi nde yenu. Ne yenu diyi gugare yivigu gituunge Nzambi ne mikoku myenu ve yambile yandi ne Abaraam re: “Gu bandalule bagu, maguveege myule gu bitsuku byootsu bi mutsi yi.”

²⁶ Ne vane, Nzambi asindige musalitsi wandi kinde mu yenu, muveege myule gu mutu mutu nugyeluse bitsagilitsi byenu bibive.»