Bisalu bi Bakime 28 - Sangu: Isangu (snq) NT

Pol gu niingi yi Malte

¹ Ve mane wuyobugu yetu, diyulu re Malte re dine di niingi.

² Bisi guune basaangile yetu time bweedi: ve nogenge fule gubile mosu, babaange mbaawu yiyinene ne bayake yetu bootsu va tuungu yo.

³ Pol atole bisotsu bi kanyi ne avere byo gu mbaawu. Te ne gyusule gi mbaawu, mbisi yivate gugare bisotsu ne yikage yandi mu dikake.

⁴ Ve labe bisi niingi mbisi yileleme mu dikake di Pol, bayambilenge yawu ne yawu re: «Mutu wuwu nungyenze kebile nde muboongi. Nisi natserunde yandi difu gu mubu, nzambyetu yi bumbaanze asasiinge re abili monyu.»

⁵ Nane Pol aseyulu pyavi: agubule ke dikake re nyoge yilage gu mbaawu.

⁶ Bisi niingi bataase ke re Pol agurande manyuru konane re agufu kisule. Bavure wuviingile, te balabe re Pol asadile dyaambu di bwaanzi, ne vane bakaluse mataase ne bayambile re: «Yandi nde nzambi!»

⁷ Bebele ne mburene, gubile ndagu yi kumeke yi mareege yi niingi. Dine dyandi Publyuse. Ayake yetu ne yinyunge gyotsu ne alatse yetu tsufu yireru gu ndagwandi.

⁸ Tayi Publyuse abile gu taangi, abile ne yidine ne muvaanzu wu maluungu. Pol ayende gu labe yandi, asaambile nusunzile yandi makake ne abeeluse yandi.

⁹ Kere vane, babeetsi bootsu ba niingi bayitse gu wulabe Pol ne yawu gaandi babeelugu.

¹⁰ Batu baritsige yetu mbili digobe. Ve pule dikyesi di mweendu, balagene netu ne byootsu bibile netu ne nzale mu munyalu.

Pol amepule gu Rome

¹¹ Ve vyoge migweli mireru, yetu diyende mu dibatu diburungu gu divule di Alekesandi. Dine di dyo re Kastor ne Poluks, dyo divyose dikyesi di mosu gu yiseni gi niingi.

¹² Dipule gudivule di Sirakuse ne divyose tsufu yireru.

¹³ Vavene dilaande yi tuungu, re dipule gu Regyo. Ne ngwaali yine, divuge di taandu diruge ne yetu dipule gu Putiyoli va vyoge tsufu beyi.

¹⁴ Gu divule dyene, yetu didagise bakeriti, batsitse yetu mu wuvyose tsonu moosi gu mbugawu. Nane re nayende yetu gu Rome.

¹⁵ Bakeriti ba Rome bayulu tsaangu yi mwiitsu wetu, ne baruge mu wubengusunu yetu, dikabu dimoosi diyende gu Dikase di Apiyus ne dina gu diimbu di Ndagu Yireru. Ve Pol alabe yawu, agabusile Nzambi dinyi, ne agwaare.

¹⁶ Ve pule yetu gu Rome, Pol asiingusu wubile gu ndagu yiyapiinze, ne mugole wumoosi wu wukyele yandi.

Pol agoneloonze musamu wumunyi gu Rome

¹⁷ Tsufu yireru ne wuvyoge, Pol atsitse bakumeke ba Basifu ba Rome gu mbugandi. Ve duge yawu, ayambile yawu re: «Baane ba tayi, masevage dyaambu dibive gu yitsuku gyetu, konane gu kotu yi mikoku myetu, ne mane masunzu gu tsugu gu Serusalem ne wugabu mu makake ma bisi Rome.

¹⁸ Yawu badume me banzidu ne baroonde wunyangumuse me, mumbare baselabe disine dingyenze diwukilise me ne difu.

¹⁹ Te bivuunde bi Basifu basesiinge, vane re ve tombe me wutsuundusu ne Sesar. Nane maseroonde wufurigile yitsuku gyami.

²⁰ Re dibaandu matseroonde wulabe yenu ne wuyambile nenu. Yenu diyatsi nyi wugoneviingulu ne yitsuku gi Israel, makatu ne bapaange babe re mu yandi.»

²¹ Bakumeke ba Basifu bayagule yandi re: «Yetu disadile mugaande nisi wumoosi wutsitse gu Sudé mu dyaambu dyagu, mwaane tayi nisi wumoosi asaburugu guune gu wunyigule yetu konane gu wuyambilile yu maambu mabive.

²² Te yetu digoneroonde re yisupuli yetu magonetaase yu, mumbare disetsiimbu re mu bambure tsyotsu batu bagoneyambilile yine dikabu dyagu ke maambu mabive.»

²³ Bakumeke ba Basifu ne Pol basoole wisi wubengunu, ne wisi wene baruge gu mbugandi. Diyakene didi, baruge mbili. Baande yipali nguu ne tsisige, Pol ayambile yawu mavindugulu, ne aloonze yawu ne mu dyaambu di Bufumu bu Nzambi. Ayambile yawu mu Sesu ne amaange wukaluse mataase mawu. Mu dyo araange mugage wu Muyise ne migaande mi babigitsi.

²⁴ Bane basiinge mayambilenge yandi, te bamosi babuse wusiinge.

²⁵ Mu dikyesi di mweendu, baseyulusunu yawu ne yawu. Pol ayambile yawu ke re: «Dinyunyi Disuungeme dibile ne miluunge ve yambile dyo mikoku myenu, gu mune wu mubigitsi Isayi! Ayambile re:

²⁶ “Yende gu labe yitsuku gigi, ne yambile gyo re: Yenu diguyulu bweedi, te yenu disakeditige; yenu digubemine bweedi, te yenu disakelabe.

²⁷ Nungyenze, yitsuku gigi gisegoneroonde wuyulu; batsevaange maru mawu, batsetsimise miisu mawu, Babile ne wome wulabe ne miisu mawu, wuyulu ne maru mawu, wuditige gu mirime myawu. Babile ne wome wugyelugu gu me. Re disine disarungule me wubeeluse yawu.”»

²⁸ Pol akoonde wuyambile re: «Kagu yabanu dyo, Nzambi asindige Musamu Wumunyi wu wuyobulu gu yawu babasaandi Basifu. Yawu baguyululu yandi!» [

²⁹ ]

³⁰ Pol abepake bilime bibeyi bifwiimbe gu ndagu yi futenge yandi badole. Ayakenge bootsu babayitsenge gulabe yandi.

³¹ Atsamune musamu wu Bufumu bu Nzambi ne aneenzenge mu dyaambu di Fumu Sesu Wusoolu ne Nzambi ne gitu gyotsu, guga mikobuku.