Bisalu bi Bakime 25 - Sangu: Isangu (snq) NT

Pol va wusu muverner Festus

¹ Tsufu yireru tsivyoge va mane wutsakugu Festus va kwaange gu museengi, ayende munyalu baande Sesaré nguu ne gu Serusalem.

² Vane, bivuunde bi baveegitsi ba malagu ne bakumeke ba Basifu baruge va wuswandi mu wufuunde Pol.

³ Batombe Festus re: «Dileende yu, tsitsise Pol gu Serusalem.» Nane ma dikabu di Basifu bamane wukate paangu yi wuboke yandi mu nzile.

⁴ Te Festus ayagule yawu re: «Pol ande gu tsugu gu Sesaré, ne mabene masaketsiinge ne wugabugu.

⁵ Bivuunde byenu biwoki nami gu Sesaré. Ga mutu wuwu atsevage dyaambu dibive, barugi gu wufurgile yandi.»

⁶ Festus avyose va pwase tsufu poombu ne digumi gu Serusalem, kere agabugu gu Sesaré. Ne ngwaali yine atsagele gu ndagu misaambu va kwaange buvovi ne arume re bayitsisi Pol.

⁷ Ve yitse yandi, Basifu babaruge gu Serusalem bakaande yandi ne bafurigile yandi mbili maambu mamanene magarungule yawu wusupule.

⁸ Pol akare manyuru mandi ne wuyambile re: «Masavage dyaambu dibive, nisi mu mugage wu Basifu, nisi mu Ndagu Nzambi, nisi mu Sesar.»

⁹ Festus wubene wuroondu ne Basifu atombe Pol re: «Yiroonde wumake gu Serusalema? Guune, yigutsuundusu ve wuswami mu dyaambu dyene.»

¹⁰ Pol ayagule re: «Mande ve wusu ndagu Sesar yikatabulu misosu ne vave re vaketsuundusu me. Masavage dyaambu dibive mu Basifu, yiyatsi dyo bweedi yibene.

¹¹ Ga nungyenze mane mbele, ga matsevage dyaambu dibive diwuyenze me gu difu, masakebuse wufu. Te gagusabile yimwaanze mu maambu magonefurugulu me, kagu gusaandi mutu wune dinyaange diwugabe me gu yawu. Matombe yu re matsundusu ne Sesar!»

¹² Festus ayambile ne babakaloongi yandi. Kere vane, ayambile Pol re: «Yitsetombe wutsuundusu ne Sesar, kagu yiguyende ve wusu Sesar.»

Pol ve wusu Agripa ne Berenis

¹³ Ve vyoge ma batsufu, maate Agripa ne Berenis, mwaane ngwandi wu mugyetu baruge gu Sesaré gu wuveege Festus mbolu.

¹⁴ Vavyose yawu ma batsufu vane, Festus anyigule maate dyaambu di Pol. Ayambile yandi re: «Gunu guyi mutu wusiise Feliks gu tsugu.

¹⁵ Ve yende me gu Serusalem, bivuunde bi baveegitsi ba malagu ne bakumeke ba Basifu, bafuunde yandi ne baroonde re maveegi yandi mbele.

¹⁶ Mayagule yawu re: “Bisi Rome basaandi ne yifu gi wugabe mutu wukafurugulu maambu gu misaambu guganene bengunu yandi ne babagonefurigile yandi maambu, mure akerungule wukare manyuru mandi mu maambu magonetarugulu yandi.”

¹⁷ Ne vane, yawu baruge gunu. Ne ngwaali yine, gugavyose dikyesi, matsagele ve kwaange yi buvovi ne marume re bayitsisi mutu wene.

¹⁸ Va ruge babatarigile yandi maambu, manyigule yawu masebile maambu mataasenge me.

¹⁹ Batswaakenge naandi ke mu maambu ma dibuundu dyawu ne mu mutu wu dine Sesu. Mutu wene afu, te Pol yare ake monyu.

²⁰ Mu yami kyelu, matsapulu mu wutabule dyaambu di munoongu wune. Re disine matombe Pol ga aroonde wuyende gu Serusalem mu wutsuundusu mu dyaambu dyene.

²¹ Te Pol aroonde ke re dyaambu dyandi ditsuundu ne Sesar. Kagu matserume re akyelu gu tsugu kwanga ne ve makesindige yandi gu Sesar.»

²² Agripa ayambile Festus re: «Ne me gaandi, maroonde wuyulu bweedi naveke yambile mutu wene.» Festus ayagule yandi re: «Yiguyulu yandi ngwaali.»

²³ Ne ngwaali yine, batu bavage diyayi diwusaangile Agripa ne Berenis varuge yawu. Banyingene gu yirini giginene gi bibeengunu, ne bivuunde bi migole, ne bakumeke ba divule. Mu dirumu di Festus, Pol abegu.

²⁴ Kere Festus ayambile re: «Maate Agripa ne yenu bootsu badi vave netu, moniganu mutu wuwu. Piti yotsu yi Basifu yitsitse gu wufuunde yandi gu me, gu Serusalem ne gunu, ne wubwamuge re: “Asaandi ne dinyaange diwubebile monyu!”

²⁵ Te me, matselabe re asavage dyaambu dikekilusu yandi ne difu. Te yabene atseleende re atsuundusu ke ne Sesar; natsetaase me wusindige mutu wuwu gu yandi.

²⁶ Vesaandi me ne dibigu dingyenze diwuteendile Sesar mu dyaambu di Pol, re disine matsebege yandi va wuswenu, pepe va wuswagu maate Agripa, mure vakemane yu wudume yandi banzidu, vane magudile dibigu diwuteende.

²⁷ Mumbare nde biviindige gu me, mu wusindige mwisi tsugu gu Rome, gugayabe disine ditseveegu yandi mbele.»