Bisalu bi Bakime 24 - Sangu: Isangu (snq) NT

Pol gu Sesaré ve wusu muverner Feliks

¹ Tsufu yiraanu ne wuvyoge, yivuunde gi baveegitsi ba malagu Ananyas aruge gu Sesaré ne ma dikabu di bivuunde bi fuundu ne mukambugilitsi wawu dine dyandi Tertulus. Baruge mu wufuunde Pol ve wusu muverner Feliks.

² Ve rugise yawu Pol, Tertulus abaande wuyambile maambu maame mu wufurigile yandi: «Muyumene Feliks, yetu digonetsagele ne polu disine yu ne mu maambu mamanyi matsevage yu mawukaluse tseengi yiyi.

³ Mu byootsu bigonedile yetu makyesi mootsu ne mu bitsige byootsu, digabusile yu dinyi didinene.

⁴ Te masakedaave, re disine kokolu vere maru gu yetu mu ma dikyesi.

⁵ Yetu ditselabe re mutu wuwu yinwaangu giginene. Agonetumbise diyunge ve ganegare Basifu ba buloongu bwotsu, yandi nubile yivuunde gi yivive gi bisi Nasarete.

⁶ Yandi amaange nisi wusumune migyele mi Ndagu Nzambi re disine yetu digaange yandi. [Ditseroonde wusosise yandi nakavagu gu mugage wetu,

⁷ te Lisyas yivuunde gi migole ayitse ne ngudi yiyinene ne apatule yandi mu makake meetu

⁸ ne arume yetu mu wubage dyambu dyene ve wuswuagu.] Ga yidume yandi banzidu, yigulabe yibene re mootsu maditsetarigile yandi ke manungyenze.

⁹ Bivuunde bi Basifu ne yawu basilile re time re nane.

Pol akare manyuru

¹⁰ Ne yiliimbe, muverener asingise Pol mu wuyambile. Pol anangule duufi: Mayatsi re mbili bilime yire yivovi gi tseengi yiyi. Kagu mu gitu gi nami mu yu, makekare manyuru mami ve wuswagu.

¹¹ Gusamevyoge nisi digumi ne tsufu beyi mamake gu Serusalem gu wubondimine Nzambi; yirungule wulabe dyo yibene.

¹² Masedagusu pasi mbure nisi, gu Ndaagu Nzambi, nisi gu bandagu tsi masaambulu, nisi gu divule re magonetswaake ne mutu vo wusive piti.

¹³ Batu babe basakerungule wuritsige yu maambu mootsu mayawu bafurigile me.

¹⁴ Te nungyenze mayatsi ve wuswagu re magonelaande nzile Fumu yigonetase yawu re nde nzile yiwufure. Te magonedyanzile Nzambi yi bakaage betu ne mane gitu mu maambu mootsu mateendu gu migaande mi mugage ne mi babigitsi.

¹⁵ Mane gitu gyene re Nzambi agufwangule batu babanyi ne bababi ne yawu bene gaandi bane gyo.

¹⁶ Re dibaandu magonerageme mubile ne yitsagilitsi giginyi giga togu ve wusu Nzambi ne ve wusu batu.

¹⁷ Mbili bilime bivyoge masebile gu Serusalem te maberuge mu wubagile yitsuku gyami badole ne muveege Nzambi manzolu.

¹⁸ Vane re ve yawu badagise me gu Ndagu Nzambi. Bile keke mamamane diyayi di wutsuke manyuru. Gusebile nisi piti, nisi diyunge.

¹⁹ Te ma dikabu di Basifu ba museengi wu Asi babile vane. Mbe yawu re babatseruge ve wuswagu mu wufurigile me, ga babile ne dyaambu di yawu bagoneseembe me.

²⁰ Konane batu babe bayambili dibumi ditube me, divegu me mbele ve begu me va wusu Fuundu yi bivovi.

²¹ Veengu rebile mu dibigu dimoosi di yambile me pepe mutele va wuswawu re: “Mane gitu re Nzambi agurambuse babafu. Magonetsuundusu va wusuwenu ke mu dibigu dimoosi dina?”»

²² Feliks ayabenge bweedi dyaambu di nzile Fumu, avitsule bumbaanze mu diyakene di nzime ne wuyambile Basifu re: «Magupase mbaanze dyaambu dyenu vekeruge Lisyas yivuunde gi migole.»

²³ Arume yivuunde gi kame migole re: «Kyele Pol gu tsugu te yiyakate yandi. Yiyakale bambaatsi baandi mu wuyamune yandi.»

Pol va wusu Feliks ne Drusiye

²⁴ Ma batsufu ne wuvyoge, Feliks aruge ne mugatsyandi Drisiye wubile Musifu. Atsitsise Pol, mu wuyulu makeyambile yandi mu dyaambu di gitu mu Sesu Wusoolu ne Nzambi.

²⁵ Pol gaandi asupule tsenyi mutu arungule wubege monyu wukagitsi Nzambi, ne tsenyi mutu arungule wugwaarise murime mu nzale maambu ma musonyi. Ayambile ne gaandi re Nzambi agutsuundise batu bootsu. Ne vane, Feliks agaangu ne wome ne ayambile Pol re: «Bili vane nemunyi! Vekebile me ne dikyesi, magubetsitse yu.»

²⁶ Ve yulu vane, Feliks avepisenge Pol mu wuyambile naandi, mumbare aroondenge re Pol aguveege yandi badole mure akevatusu gu tsugu.

²⁷ Bilime bibeyi bivyoge, kere Feliks akitusulu ne Porsyus Festus. Ve benenge yandi wuroondu ne Basifu, asiise Pol gu tsugu.