Bisalu bi Bakime 20 - Sangu: Isangu (snq) NT

Pol gu Masedwane ne gu Grese

¹ Ve vyoge dimbunge, Pol agukige bayikitsi, agwaarise yawu. Kere vane alagile yawu ne ayende gu Masedwane.

² Avyoge mu museengi wene ne agwaarise babasiinge Fumu gugare mbili bibeengunu. Kere vane ayende gu Grese.

³ Pol akuumbe guune migweli mireru. Mbe vake peke Pol mu dibatu mu wuyende gu Siri, ayulu re Basifu bagonekatile yandi paangu. Ne vane adile ditaase diwugabugu gu museengi wu Masedwane.

⁴ Batu babe re babayende naandi: Sopatros, mwaane Piruse mwisi Beré, Aristarke ne Sekunduse, bisi Tesalonike, Gayuse, mwisi Derbé, ne Timuti, Tisike ne Trofime bisi museengi wu Asi.

⁵ Yawu baregile, baviingile yetu gu Trowas.

⁶ Gu yetu, dinakeme mu dibatu gu yiseni gi Filipe, ve vyoge diyayi di mape maga putu ne yisemu. Tsufu yiraanu ne wuvyoge, didagise yawu gu Trowas gu mane yetu tsonu yi fwiimbe.

Pol gu Trowas

⁷ Mu wisi wu mareege wu tsonu, dibeengunu mu wugabene dipe. Pol mbe wumende ne ngwaali yine ayambile ne baane ba tayi. Adaavise musamu wandi nguu ne ve murime dibati.

⁸ Gu yirini gi yulu gi ndagu ndeki gubile yetu ne mukuti, gubile mbili bapage tsibaangu.

⁹ Vane ve bile mufudu dibagele wulugungu re Etike, matsagele ve tuungu pangele. Ve daavise Pol musamu wandi, Etike atobe gyolu, ne alage baande gu ndilu yi mureru yi ndagu ndeki kwanga ne gu tsi. Asiimbulu keke amafu.

¹⁰ Te ve sunde Pol, agudimine yandi, alele yandi ne wuyambile re: «Diyalabe page, ake monyu!»

¹¹ Kere vane Pol abemake, agabe dipe ne ayi. Abedaavise wuyambile nguu ne ve gi wisi, kere ayende.

¹² Ve yulu vane, babage mufudu dibagele monyu gu ndagwandi ne batu bootsu balabe wunyi.

Pol aburugu gu Troas mu wuyende gu Milete

¹³ Yetu disome mareege mu dibatu mu wuyende gu Asos gu dikekudule Pol, nayambile yabene, mumbare aroonde wuyende mu nzile yi tsi.

¹⁴ Ve yandi adagise yetu gu Asos, yetu dipekise yandi gu dibatu kere bootsu diyende gu Mitilene.

¹⁵ Vavene yetu dikoonde wuyende mu dibatu, dipule ne ngwaali yine, simu ne simu ne Kyo. Wune mosi dipule gu Samos, nzime ne wune disupugu gu Milete.

¹⁶ Pol aseroonde wusikeme ve Ifese, mure akerevyose dikyesi gu museengi wu Asi. Akube mu wupule gu Serusalem mu wisi wu Pentekote, ga diyelimine.

Pol alagile bivuunde bi dibuundu di Ifese

¹⁷ Gu Milete, Pol asindige kime gu Ifese mu wurugise bivuunde bi dibuundu.

¹⁸ Ve tsoombugu yawu gu mbugandi, ayambile yawu re: «Yenu diyatsi munoongu wutsetsagelenge me nenu makyesi mootsu, baande wisi wumareege wutsaange me gu museengi wu Asi.

¹⁹ Masalile Fumu ne digobe dyotsu, ne wulile ne wutsoge mu paangu yikatulu me ne Basifu.

²⁰ Mayambile yenu mootsu mabile nenu ne nzale, maseswege yenu yivaave. Ve wusu piti ne mu bandagu benu, manyigule yenu maambu ma Nzambi, maloonze yenu mo.

²¹ Matsitse Basifu ne yawu babasaandi Basifu mu wugyelugu gu Nzambi ne mu wusiinge Fumwetu Sesu.

²² Te ne mamape, makeyende gu Serusalem. Dinyunyi Disuungeme digonerume me mu wuvage dyo. Maseyabe dyaambu dikerugile me guune.

²³ Te mu mavule mootsu, Dinyunyi Disuungeme digonelubuse me re magutsoge ne magunyingene tsugu.

²⁴ Mu me, monyu wami wusaandi ne tsoongu. Te digoneroonde me ke wumanisile yisalu gyami ne wuvage byootsu birumu me ne Fumu Sesu: wuvage bumweenyi bu Musamu Wumunyi wu gyese gi Nzambi.

²⁵ Mavyoge va ganegarenu bootsu ne wuloonze Bufumu bu Nzambi, te ne mapape, mayatsi re yenu disakebelabe me.

²⁶ Re dibaandu, nemunyi maboonge yenu bimweenyi: Ga wumoosi ve ganegarenu aretsyemugu, masaandi mu dyo.

²⁷ Mumbare maloonze yenu maambu mootsu makate Nzambi, gugaswege yenu yivaave.

²⁸ Diyelile mu yenu bene ne mu digaande dyotsu diveegu yenu ne Dinyunyi Disuungeme mu wukyele. Bilanu bakyelitsi babanyi mu Dibuundu didile Nzambi mu difu di mwanandi.

²⁹ Mayatsi re, vakeyende me, gugubile batu bakenyingene veganegarenu ga bimbungu ne basakegoonge digaande.

³⁰ Nisi ve ganegarenu, batu baguloonzenge maambu ma wufure mure bayikitsi bakelaande yawu.

³¹ Kagu bilanu musigi! Ne bangulanu re: mu bilime bireru, ne dibati ne nyangu, mavure wuloonge mutu mutu va pwasenu ne matsange mu miisu.

³² Ne mapape, makeyakise yenu gu Nzambi ne mu mabigu mandi ma gyese gyandi. Mabigu mene mane dinyaange diwugwaarise gitu gyenu. Mu mo gaandi, Nzambi arungule wuveege mikwanyi misile yandi baandi.

³³ Masanyungile nisi badole, nisi lor, nisi bidwaari bi pasi mutu.

³⁴ Yenu bene diyatsi re matsedyanze ne makake mamabene mu wudile monyu wami ne myonyu mi babagonekiinge nami.

³⁵ Maritsigenge yenu makyesi mootsu re bweedi mudyanze munoongu wuwu, mu wuyamune masaandi. Bweedi mu wubangule mayambile Fumu Sesu yabene re: “Wunyi wuvyogilile nde mu wugabe saga mu wudile.”»

³⁶ Ve mane Pol wuyambile nane, asume magonungu mu tsi kere asaambile ne yawu bootsu.

³⁷ Ne vane, batu bootsu babwamugu ne wulile ne basaambene naandi.

³⁸ Babile bootsu ne rungile mumbare Pol ayambile yawu re basakebelabe yandi. Kere vane bayende gu wusunze yandi nguu ne gu dibatu.