Bisalu bi Bakime 19 - Sangu: Isangu (snq) NT

Pol gu Ifese

¹ Ve bile Apolos gu Korinte, Pol avyoge nzile mikoongu mi museengi wu Asi ne apule gu Ifese. Vane, adagise ma dikabu di balaanditsi,

² atombe yawu re: «Yenu didile Dinyunyi Disuungeme ve siinge yenu Fumwa?» Bayagule yandi re: «Yetu disamayulu nisi re guyi Dinyunyi Disuungeme.»

³ Pol atombe yawu re: «Bateme yidile yenu nde yi nyi?» Bayagule re: «Nde bateme yi Sa.»

⁴ Ne vane, Pol ayambile yawu re: «Sa abatisenge nde yawu babasiinge wukalule bitsagilitsi, ne ayambilenge batu mu wubile ne gitu mu mutu wukeruge ve nzimandi, divindugulu re, mu Sesu.»

⁵ Ve yulu mabigu mene, yawu babatusu mu dine di Fumu Sesu.

⁶ Pol asunzile yawu makake mu yulu myuru ne badile Dinyunyi Disuungeme. Ne vane babaande wuyambile maloongu mamosi ne babigenge.

⁷ Yawu babile gootsu digumi ne batu babeyi.

⁸ Kere vane Pol ayende gu ndagu Basifu yi disaambulu; guune, ayambilenge guga wome. Mu migweli mireru, aloonzenge mu dyaambu di Bufumu bu Nzambi, abene masuge mootsu re batu basiingi maloonzenge yandi.

⁹ Te ma dikabu di batu diseroonde wuyulu, dibuse wusiinge ne didetenge ve wusu piti bootsu babalaande nzile Fumu. Pol ayagene nawu ne ayende ne bayikitsi, re wisi wotsu aloonzenge yawu gu dikoole di mutu wulugu re Tiranose.

¹⁰ Dyo ditsiinge bilime bibeyi mure bootsu babatsagelenge gu museengi wu Asi, Basifu ne babasaandi Basifu, barunguli wuyulu musamu wu Fumu.

Baane ba Seva

¹¹ Nzambi aveege Pol dinyaange di wuvage bimwiile bi biviinge.

¹² Nisi va sunzungu bidwaari konane miswaari mi bembulunu ne nyuru Pol mu babeetsi, yawu babeelugu ne manyunyi mamabi mavate.

¹³ Gubile dikabu di Basifu diyende kane kane, diyelige wupunze manyunyi mabive ne wutubenge dine di Fumu Sesu. Bayambilenge re: «Marume yenu mu dine di Seswene yikaloonzi Pol, vatanu!»

¹⁴ Babavagenge mane bile re baane ba tsaambu ba Seva, dibagele di Musifu, yivuunde gi baveegitsi ba malagu.

¹⁵ Te wisi wumoosi, dinyunyi di bive diyagule yawu re: «Mayatsi Sesu, ne mayatsi wuyi Pol. Te yenu nde banyi?»

¹⁶ Kere mutu wubile ne dinyunyi di bive agaange yawu mumbare avyogilile yawu bootsu myaangu. Atsogise yawu, ne bavate gu ndagu bambaangu, mynyange, ne bapure.

¹⁷ Bisi Ifese bootsu, Basifu ne babasaandi Basifu, bayulu dyaambu dyene. Kyere Nzambi yidugulu yawu bootsu ne bayambile re: «Dine di Fumu Sesu diyi didinene!»

¹⁸ Mbili batu babasiinge Fumu, baruge mu wutube mabi mawu muufi gu yulu ve wusu piti.

¹⁹ Dikabu didinene di batu bababile ne mavaande, babage migaande myawu mi mavaande mu wuyoke ve wusu piti. Ditalu di badole disuumbu migaande myene, bile bebele ne digumi di toseni di bangyengi.

²⁰ Nane re natsamugu musamu wu Fumu, ne ngudi yotsu.

Dimbunge didinene gu Ifese

²¹ Ve vyoge maambu mene, Pol akate munyalu wuyende gu Serusalem, te aroonde wuvyoge kinde gu miseengi mi Masedwane ne Akayi. Ayambile re: «Va yulu wuburugu gu Serusalem, bweedi mareyende gaandi ne gu Rome.»

²² Asindige babeyi va pwase bayamunitsi baandi gu Masedwane, bile re Timuti ne Eraste, te yabene asaale ma pesu dikyesi gu Asi.

²³ Mu dikyesi dyene gubile dimbunge didinene, mu dyaambu di nzile Fumu.

²⁴ Demetruse mutulitsi akuunzenge ne badole, bandagu tsitsikyeki tsibagunu ndagu yi yinene yi nzambyawu Artemis, ne afutenge badyanzitsi baandi mbili badole.

²⁵ Adugise badyanzitsi ne bootsu babakadili monyu mu yisalu gyene. Ayambile yawu re: «Bambaatsi bami, yenu diyatsi re manenu digonedile monyu wumunyi re mu yisalu gigi.

²⁶ Te Pol agoneyambile re, banzambi bakuunzu ne batu sa banzambi. Mbili batu sake gu Ifese piinze, te nde ne ba gu museengi wotsu wu Asi bayulu yandi. Yenu ditseyulu bayambile mane mootsu ne yenu ditselabe.

²⁷ Sake yisalu gyetu gyo piinze gigukusugu wutsyemugu, te nde ne ndagu malagu yi Artemis yisakebeyulunu. Basakebeyambile re: “Artemis nde nzambi yiyinene!”, nane batu bootsu bakabondimini yandi gu museengi wu Asi ne mu mutambe wotsu.»

²⁸ Ve yulu batu mabigu mene, babase ne kabu, babwamugungu: «Nde nzambi yiyinene, Artemis yi Ifese!»

²⁹ Dimbunge didugulu divule dyotsu, batu bootsu bakuunge gu mbure yiyinene yikavagu bingane. Badutumune Gayuse ne Aristarke, bootsu babeyi bisi Masedwane bambaatsi ba minyalu ba Pol.

³⁰ Pol aroonde wulabene ve wusu piti te bayikitsi basesiingise yandi.

³¹ Ma dikabu di minduumbe migobe mi museengi wu Asi, bile bambaatsi ba Pol. Ne yawu gaandi basindigile yandi batu mu wuveege yandi ndoongyene re: «Yiyayende gu mbure yi yinene yikavagu bingane!»

³² Mu dikyesi dyene, gubile mbili divuve ne dimbunge gugare piti. Bane batu babwamugenge mu dibigu di siimbe, bane mu dibigu di bukayi ne nzoku batu baseyabenge nisi disine di dugesene yawu.

³³ Basifu basindige mutu wulugu re Alekesande gu muloonge mareege ne bane batu banyigule yandi maambu mavyogenge. Ne vane Alekesande asiimbule dikake, abenenge wuyambile ne piti.

³⁴ Te veyabe yawu re Alekesande nde Musifu, bootsu babwamugu ne duufi dimoosi, bebele ne magwere mabeyi: «Nde nzambi yiyinene, Artemis yi Ifese!»

³⁵ Ve disukusulu, yivuunde gi divule arungule wulelimise piti, ne ayambile re: «Bisi Ifese, batu bootsu bayatsi re divule di Ifese re dikakyeli ndagu yi yivuunde Artemis ne dimanyi dyandi disunde gu yulu.

³⁶ Gusaandi mutu wukerungule wugigule. Kagu lelemanu, diyavage maambu mbaangu mbaangu.

³⁷ Yenu ditsebage batu babe gunu, te basavage dyaambu dibive mu ndagu nzambi ne gaandi basaseenge nzambyetu.

³⁸ Ga Demetruse ne badyanzitsi baandi bagoneroonde wufurigile mutu dyaambu, guyi bivovi, ne guyi batsufu tsikabili ndagu misaambu mwaasi. Kagu bayendi gu bivovi!

³⁹ Te ga yenu dine dyaambu dimosi di wutombe, dike labe mane vakebeengunu bivuunde bisoolu mu wukyele divule.

⁴⁰ Ga dibilenge kevave diguveegu mbele mu dimbunge ditsevyoge nemunyi, mumbare gusaandi disine dingyenze dikesupule yetu dibaandu ditseduge piti yiyi.»

⁴¹ Ve mane wuyambile yivunde gi divule, ayenze piti.