Bisalu bi Bakime 17 - Sangu: Isangu (snq) NT

Pol ne Silas gu Tesalonike

¹ Pol ne Silas bavyoge gu Anfipolis, ne gu Apolini kere bapule gu Tesalonike. Guune, Basifu babile ne ndagu disaambulu.

² Pol anyingene gu yo navagenge yandi ne kale. Tsufu yireru tsilaandegane tsikaloogu, atsuundenge nawu mu dyaambu di Mireendu mi Nzambi,

³ asupulenge ne aloonzenge yawu re Wusoolu ne Nzambi atsoge, ne afwangugu va ganegare babafu. Ayambile yawu re: «Seswene yimagoneloonze yenu, yandi re Wusoolu ne Nzambi.»

⁴ Dikabu di Basifu basiinge maambu mene, ne baputegene ne Pol yane Silas. Nane re navage yinoombu gi Bagreke gibile ne kyere Nzambi Basifu, ne mbili bagyetu bababile ne manyaange.

⁵ Te Basifu bane ngusu baboonge ma bivasi ve Gugare piti, basive batu mubile batsugu batsugu mu wuvage dimbunge gu divule. Bayende gu ndagu Sason, babenenge Pol ne Silas mu wubage yawu ve wusu yitsuku.

⁶ Basedagise yawu, ne vane badutumune Sason ne ma dikabu di baane ba tayi va wusu misaambu ne wubwamugu re: «Batu babe batsetsukimise buloongu bwotsu, ne mane bamitse nguu ne gunu,

⁷ Sason atseyake yawu gu ndagwandi. Batu babe bootsu bagonevage maambu ma biviindige, magayelimine ne migage mi Sesar ne wuyambile re guke maate mamosi, Sesu.»

⁸ Piti ne bivovi bi divule balabe page mu mabigu mene.

⁹ Sason ne bamosi banyangumusu ke ve yulu wuveege bivovi yisuke.

Pol ne Silas gu Beré

¹⁰ Ve tsime wisi, baane ba tayi bababise wuyenze Pol ne Silas gu Beré. Ve pule yawu, banyingene gu ndagu disaambulu yi Basifu.

¹¹ Basifu bene babile ne gyenze mu Pol ne Silas vyogilile bisi Tesalonike, bayulu mabigu ma Nzambi, kere bamonigenge Mireendu, mu wulabe ga mayambulwa yawu ke mabigu ma yimwanze.

¹² Mbili batu ve ganegarawu basiinge Nzambi. Ve pwase Bagreke, bagyetu bane dinyaange, ne nzoku babagele ne yawu gaandi basiinge.

¹³ Te ve yulu Basifu ba Tesalonike re Pol agoneloonze musamu wu Nzambi keke gu Beré, baruge gu wusive piti mu wuvage dimbunge.

¹⁴ Ne vane baane ba tayi baleenge wuyenze Pol gu tselu yi mubu; te Silas yane Timuti basaale ke gu Beré.

¹⁵ Babayendenge ne Pol bapule naandi nguu ne gu Atene. Kere vane bagabugu gu Beré, ne bukime bu pol mu wuyambile Silas ne Timuti re bayitsi nyavu gu wudagise yandi.

Pol gu Atene

¹⁶ Pol avingilenge Silas ne Timuti gu Atene. Abile ne pyavi gu murime mumbare alabe re gu divule dyene, bavure saambile banzambi ba wufure.

¹⁷ Kagu ayambilenge gu ndagu disaambulu ne Basifu ne batu bamosi bababile ne kyere Nzambi, ne gaandi ayambilenge bawisi bootsu mu bitsige bi mbili batu, ne bavyosi.

¹⁸ Dikabu di batu ba epukiri ne stoyisi, babayike maambu ma buyedi ne ma bitsagilitsi baruge ne yawu gu wuyambile naandi. Bane batombe re: «Nge mbili divuve wuwu, agoneyambile nde gi?» Bamosi re: «Yiya nde re, muloonzi wu banzambi ba beenyi.» Nane, Pol aloonzenge musamu wumunyi wu Sesu ne dyambu di bufwangugulu.

¹⁹ Ne vane batsitse yandi, bayende naandi gu mukoongu Aeropas, ve wusu Fuundu yi misaambu mi divule, ne batombe yandi re: «Yirungule wusuupule yetu musamu wumoone wugoneloonze ywa?

²⁰ Mumbare yigonenygule yetu maambu mabiviinge. Kagu digoneroonde wuyabe divindugulu di maambu mene.»

²¹ Yabanu re bisi Atene bootsu ne beenyi babatsagelenge va ganegarawu bavyosenge dikyesi dyawu ke ne wunyigule vo ne wuyulu misamu mimoone.

²² Pol, mutele ve ganegare bivuunde bi divule ayambile re: «Bisi Atene, magonelabe re yenu dikabondimini mbili banzambi.

²³ Ve tsenaange me divule dyenu, matselabe bigolini bibinene bisuungu, ne matselabe nisi yitsige gikalaambu malagu ne mireendu mimi: “Gu nzambi yigayabunu.” Nzambyene yigonebondimine yenu, re yo yimitse me guloonze yenu.

²⁴ Nzambi wusuunde buloongu ne byootsu bi mune, yandi re Fumu yulu ne tsi, asakatsageli gugare bandagu ba malagu baruungu ne makake ma batu;

²⁵ asakadyanzulu ne makake ma batu were ande ne nzale pasi yivaave, yandi re nge wuveege bootsu monyu, iveefu ne bivaave byootsu.

²⁶ Mu mutu wumoosi, asuunde bitsuku byootsu mu wutsagele mu mutambe wootsu. Aswekigile yawu magwere ne wupase mindilu mi bitsige bikatsageli yawu.

²⁷ Nzambi avage nane mure batu bakebene yandi ne wupaperene, ganegotsu bagumudagise. Nungyenze Nzambi asaandi vale ne mutu mutu,

²⁸ mumbare: “Mu yandi dine monyu, dikakiingi, diyi monyu.” Bapovi benu bamosi bamane wuyambile dyo re: “Manenu gaandi dinde baane baandi.”

²⁹ Kagu ve manenu baane ba Nzambi, diseberungule wutaase re Nzambi abagunu ne igolini gi lor, gi badole vo ne dimanyi bipaku ne muneengi ne mataase ma batu tsiinge. Batu bapake bivaave byene mumbare baseyabe Nzambi.

³⁰ Te Nzambi asegonebemonige dikyesi dyene di budungi. Te vave, agoneloonze batu bootsu ba batseengi tsyotsu re bakaluli bitsagilitsi byawu.

³¹ Mumbare aswekige wisi wumoosi wuketsuundise yandi buloongu ne wupase mbaanze yisuungeme. Asoole mutu mu dyo, ne afwangule yandi. Bufwangugulu bwandi re yiliimbe giwuritsige gu bootsu re mutu wene re yivovi gisoole Nzambi.»

³² Ve yulu yawu Pol ayambile mu di bufwangugulu bu babafu, bane badetenge yandi, bamosi bayambilenge re: «Yetu digubeyulu magoneyambile yu diyakene di nzime.»

³³ Kere Pol asise yawu.

³⁴ Nane ma dikabu di batu batareme Pol, ne basiinge Nzambi: Ve pwasawu bile re Denis, mutu wu gugare Fuundu yi misaambu mi divule, ne mugyetu wulugu re Damaris, ne bamosi keke.