Bisalu bi Bakime 16 - Sangu: Isangu (snq) NT

Timuti ayende ne Pol ne Silas

¹ Pol apule gu Derbé, kere gu Listre. Guune gubile mutu wusiinge Sesu, dine dyandi Timuti; ngwandi bile Musifu te akalugu kereti, te tayandi Mugreke.

² Baane ba tayi ba gu Listre ne ba gu Ikonyume bavage bumweenyi bubunyi mu yandi.

³ Pol aroonde wuyende naandi mu minyalu myandi. Aboonge yandi, ne agyerise yandi, mu Basifu bababile gu miseengi myene, mumbare bootsu bayabenge re tayandi bile Mugreke.

⁴ Mu mavule mavyogenge yawu, Pol ne Silas banyigulenge gu baane ba tayi maambu mapute bakime ne bivuunde bi dibuundu gu Serusalem mure bakegobisenge mo.

⁵ Mabuundu magwaarenge ne gitu ne dikabu di batu babasiinge Nzambi difunenge bawisi bootsu.

Gu Troase, Pol alabe yivivulu

⁶ Pol ne Silas bayende gu miseengi mi Frigi ne Galati mumbare Dinyunyi Disuungeme disesiingise yawu mu wuyende gu Asi gu wuloonze mabigu ma Nzambi.

⁷ Ve bile yawu bebele ne Misi, babile ne nzale wuyende gu Bitini, te Dinyunyi di Sesu disesiingise yawu.

⁸ Re dibaandu basabuge Misi mu wuyende gu yiseni gi Trowas.

⁹ Ne dibati, Pol alabe gu yivivulu, dibagele di mwisi Masedwane mutele, ne aleende yandi re: «Ruge gu Masedwane, tsiyobuli yetu!»

¹⁰ Ve yulu yivivulu gilabe Pol, yetu diroonde wuyende nyavu gu Masedwane mumbare diyulusu re Nzambi yabene re wutsitse yetu guloonze Musamu Wumunyi guune.

Gu Filip, Lidi asiinge Fumu

¹¹ Yetu dinakeme mu dibatu gu Trowas, disuungeme tselu yi niingi yi Samotrase. Ne ngwaali yine dipule gu Neapolise.

¹² Kere diyende gu Filip, divule di yirini gi museengi wu Masedwane. Batu babatsagelenge gu divule dyene babilenge ne manyi ne manyaange ga bisi Rome. Yetu divyose mbili batsufu gu divule dyene.

¹³ Mu wisi wukaloogi Basifu, yetu divate mu wuyende bebele ne mwaambe wutaasenge yetu re Basifu bakadugeseni vane mu wusaambile. Vebile dikabu di bagyetu bagukegene vane. Yetu ditsagele ne diyambile nawu.

¹⁴ Gubile ve ganegarawu mugyetu wumoosi wutsitsungu re Lidi, aburu gu Tiyatire. Yandi abile musuumbisitsi wu batsaande tsi beenge tsi vyogilile wunyeve, ne abile ne kyere Nzambi Basifu. Ayulungu maambu mayambilenge Pol. Fumu atsibule murime wandi mure akesiinge mo.

¹⁵ Abatusu yane mbubyandi yotsu, kere vane atsitse yetu, ne wuyambile re: «Ga yenu ditaase re nungyenze matsesiinge Fumu, kagu ruganu gutsagele gu ndagwami!» Akokimise mure dikesiinge mbilandi.

Pol ne Silas gu tsugu gu Filip

¹⁶ Wisi wumoosi, yetu diyende gu yibeengunu gi disaambulu. Dibeengunu ne musalitsi wumoosi wu mugyetu. Yandi abile ne dinyunyi di bive di wusoke. Bafumu baandi badilenge mbili badole musoke wene.

¹⁷ Alaande yetu, yetu ne Pol, nubwamuge re: «Batu babe nde basalitsi ba Nzambi Puungu! Bamitse guloonze yenu nzile yi wuyobulu.»

¹⁸ Ayambile nane mbili batsufu. Ve yulu vane, Pol ayulu kabu, agyelugu kere ayambile ne dinyunyi re: «Mu dine di Sesu Wusoolu ne Nzambi, vate gugare mugyetu wuwu!» Vane ne vane, dinyunyi divate.

¹⁹ Ve labe bafumu baandi re muyiilu wawu wumavate, bagaange Pol ne Silas. Badutumune yawu ve ngangele ve wusu bivovi.

²⁰ Babage yawu gu bivovi bi bisi Rome nuyambile re: «Batu babe bagonevage dimbunge gugare divule dyetu. Yawu nde Basifu

²¹ ne bagoneloonze bitsagilitsi bigabile byetu, yetu bisi Rome, yetu disaandi ne dinyaange di wusiinge vo di wulaande byo.»

²² Piti yiyulu kabu mu Pol ne Silas. Ne vane, bivovi barume yawu musurule bidwaari ne badiimbusu ne migu.

²³ Ve mane diimbu yawu, baveru gu ndagu tsugu ne barume mukyelitsi mukyele yawu bweedi.

²⁴ Ve yulu mukyelitsi nane, asunze yawu gu yirini gi duke gi ndagu tsugu ne akobige yawu bakwetsingi mu byoru.

²⁵ Ve ganegare dibati, Pol ne Silas basaambilenge ne bayimbenge miimbu ma Nzambi. Bisi tsugu bamosi bayulungu.

²⁶ Vane ne vane, mutambe wuregeme mbili, bibage bi ndagu tsugu bitsukeme ne byabutsu bitsibuge ne bapaange tsi bisi tsugu tsyootsu tsinyangugu.

²⁷ Mukyelitsi aparumuge, ve labe yandi byabutsu bi ndagu tsugu mwaasi, apuse diyenge dyandi ne abene wuboke manyuru mandi, mumbare ataase ke re bisi tsugu bamariine.

²⁸ Te Pol abwamugu pepe re: «Yiyagolu wubunge manyuru magu! Yetu bootsu dike ve!»

²⁹ Mukyelitsi atombe bapage. Ayende bambaangu gugare yirini gi ndagu tsugu ne wuregeme, asume magonungu ve wusu Pol ne Silas.

³⁰ Ve yulu vane avatise yawu ne wutombe yawu re: «bafumu bami, mavagi nde tsenyi muyobulu?»

³¹ Pol ne Silas bayagule yandi re: «Bile ne gitu mu Fumu Sesu Wusoolu ne Nzambi, kere vane, ne yu ne yitsuku gyagu dikeyobulu.»

³² Baloonze yandi musamu wu Fumu, ne yandi ne bootsu babakatsageli gu ndagwandi.

³³ Mu digwere dyene di dibati, mukyelitsi ayende nawu mu wutsuke bapure bawu. Vane ne vane babatusu, ne yandi ne yitsuku gyandi gyotsu.

³⁴ Amake nawu gu ndagwandi, aveege yawu biyi. Alabe wunyi mumbare yane yitsuku gyandi basiinge Nzambi.

³⁵ Ve gi wisi, bivovi bi Rome basindige migole gu wuyambile mutu nge wukyele bisi tsugu re «avatisi Pol ne Silas!»

³⁶ Mukyelitsi ayende gu yambile Pol re: «Bivovi bamarume me re mavatisi yenu. Kagu vatanu yenu diyendingi ne polu.»

³⁷ Te Pol ayambile migole re: «Basasosise yetu ne batsefwiinze yetu ne migu ve miisu ma batu bootsu! Nane yetu dike bisi Rome! Ve yulu vane batsesunze yetu gu tsugu, ne mane bakeroonde wuvatise yetu diswela? Disakenoonge! Bayitsi yawu bene guvatise yetu!»

³⁸ Migole bayende nyigule mabigu mane mootsu gu bivovi bi Rome. Yawu bagaangu ne wome ve yulu yawu re Pol ne Silas ke bisi Rome.

³⁹ Bivovi biyitse gu wuleende yawu, bavatise yawu gu tsugu ne barume yawu mu wuburugu gu divule.

⁴⁰ Ve vate Pol ne Silas gu tsugu, bayende gu mbuge Lidi. Babeengunu ne baane ba tayi ba babagele ne ba bagyetu, baveege yawu bandoongi, kere bayende gu divule dimosi.