Bisalu bi Bakime 14 - Sangu: Isangu (snq) NT

Pol ne Barnabase gu Ikonyume

¹ Gu Ikonyume gu vyoge munoongu wumoosi ga gu Antyose: Pol ne Barnabase banyingene gu ndagu disaambulu yi Basifu. Yawu baloonze musamu wu Nzambi ne guune piti yiyinene yi Basifu ne babasaandi Basifu basiinge Nzambi.

² Te bane Basifu babasesiinge basive babasaandi Basifu mukole baane ba tayi bababagele ne babagyetu.

³ Nisi nane, Pol ne Barnabase bavyose mbili batsufu gu Ikonyume. Bayambilenge guga wome, babasu ne gitu mu Fumu. Fumu aveege yawu dinyaange diwuvage bimwiile ne bimage biritsigenge yimwanze gi maambu maloonzenge yawu mu gyese gi Nzambi.

⁴ Piti yi divule yibile dipasu: bane gu tselu yi Basifu, bamosi gu tselu yi bakime.

⁵ Basifu ne babasaandi Basifu ne bivuunde byawu, bapute fuundu mutsogise Pol ne Barnabase nuboke yawu ne mamanyi.

⁶ Ve yulu bakime nane, bariine ne gu Listre ne gu Derbé, mavule ma Likawoni ne ma mubebele.

⁷ Guune baloonze musamu wumunyi.

Pol ne Barnabase gu Listre

⁸ Gu Listre, gubile dibagele di yikate gi byoru bivole, ne ve buru yandi aserungule wuyende mutele.

⁹ Wisi wumoosi ayulungu ve loonzenge Pol. Pol amonige ya iswiisu, alabe re ane gitu gi wubeeluge.

¹⁰ Pol ayambile pepe re: «Raambuge, kuunze wuteleme ne byoru byagu!» Mu dikabi dimoosi ateleme, ayendenge.

¹¹ Ve labe piti mavage Pol, babwamugu mu diloongu dyawu re: «Banzambi bamakalugu batu ne bamasunde gu yetu!»

¹² Re baluge Barnabase re Suse, kere Pol re Ermese mumbare Pol re wuyambilenge.

¹³ Ve dinyingululu di divule gubile ndagu nzambi yi Suse. Muveegitsi malagu wu ndagu nzambyene abage ve wusu byabutsu, bapagese tsi balumi tsidwisu mingaangele mi bangaange. Aroonde yane piti wuvagile Barnabase ne Pol dilagu.

¹⁴ Te ve yulu kime tsyotsu tsibeyi dyaambu dyene, bakake bidwaari byawu ne bayende mbaangu gu dagise piti nuyame munduunge re:

¹⁵ «Wayanu, yenu digonevage nane nde mugi? Yetu dike batu ga yenu! Digonebegile yenu musamu wumunyi, nde mure dikesiise bikooku byene bigane tsoongu. Kagu gyeluganu gu Nzambi yi monyu, wusuunde yulu, ne tsi, ne mubu, ne byootsu bi muune.

¹⁶ Ve bila ve kale, asiise batu bootsu mu wupake naroondenge yawu.

¹⁷ Nane Nzambi asakaloogi wuritsige diroonde dyandi nuvaga manyi: gu yulu, akasindigili yenu bafule nubeendise bivaru mu dikyesi diyelimine. Akaveegi yenu kure ne akabasi mirime myenu ne yinyunge.»

¹⁸ Nisi nave bile dyo page, Pol ne Barnabase barungule wukale piti mu wuvagile yawu dilagu.

¹⁹ Basifu baburugenge gu Antyose yi Pisidi ne gu divule di Ikonyume, barimbule piti. Ne vane, banoonge Pol mamanyi, kere badutumune yandi ne bavatise yandi gu divule, bataasenge nde re atsefu.

²⁰ Te ve tseengu yandi ne balaanditsi ateleme ne anyingene gu divule. Ne ngwaali yine ayende yane Barnabase gu Derbé.

Pol ne Barnbase bagabugu gu Antyose yi Siri

²¹ Gu divule di Derbé, Pol ne Barnabase baloonze Musamu wu Munyi. Nzoku batu bakalugu balaanditsi. Kere vane bagabugu gu Listre ne gu Ikonyume ne gu Antyose yi Pisidi.

²² Bagwaarisenge mirime mi balaanditsi ne baloongenge yawu mubile ne gitu gigwaare. Bayambile yawu re: «Mu nyingene gu Bufumu bu Nzambi, yinene labe kinde mbili maguge.»

²³ Mu mabuundu mootsu, Pol ne Barnabase basoole bivuunde; ve mane yawu wusaambile ne wumine kugi, bayakise yawu gu Fumu yibile nawu ne gitu.

²⁴ Ve yulu vane, bavyoge di Pisidi ne bapule gu Panfili.

²⁵ Baloonze musamu wu Nzambi gu Persé kere bayende gu Atalya.

²⁶ Kere vane bapeke mu dibatu mugabugu gu Antyose yi Siri. Gu divule dyene re gu yakusu yawu mu gyese gi Nzambi mu yisalu gimavage yawu.

²⁷ Ve pule Pol ne Barnabase gu Antyose yi Siri, badugise batu ba dibuundu. Banyigule mootsu mavage Nzambi nawu ne bayambile yawu nave tsibule Nzambi nzile yi gitu gu batu babasaandi Basifu.

²⁸ Pol ne Barnabase batsiinge mbili ne balaanditsi gu Antyose.