Bisalu bi Bakime 13 - Sangu: Isangu (snq) NT

Barnabase ne Sol basoolu ne Dinyunyi Disuungeme

¹ Gu dibuundu di Antyose gu Siri, gubile babigitsi ne miloonzi: Barnabase, Simeo wutsitsungu re Wupiinde, Lisyus mwisi Sirene, Manayene mbaatsi yi bungyebe yi Irode Atipase wukumenge gu Galilé, ne Sol.

² Wisi wumoosi, ve saambilenge yawu ne wunumine kugi, ne vane, Dinyunyi Disuungeme diyambile yawu re: «Kungiganu Barnabase ne Sol mu wuvage yisalu gi makeveege yawu mu wuvage.»

³ Ve yulu wugwaarile nzale ne wusaambile, basunzile Barnabase ne Pol makake ne bayenze yawu.

Barnabase ne Sol gu Sipre

⁴ Barnabase ne Sol, ve sindugu yawu ne Dinyunyi Disuungeme mu wuvage yisalu gi Nzambi, basunde gu Selesi, bapeke mu dibatu muyende gu Sipre.

⁵ Ve pule yawu gu Salamine, baloonze musamu wu Nzambi mu bandagu tsi masaambulu tsi Basifu. Sa Mark abile muyamunitsi wawu.

⁶ Basabugu niingi yotsu nguu ne gu Pafos. Vane badagise Musifu dine dyandi Bar Sesu, wubile ngaange misoku ne mubigitsi wu wufure.

⁷ Atsagelenge ve mbare Sergyuse Poluse yivuunde gi niingi, dibagele dibile ne buyedi. Yandi re wutsitsise Barnabase ne Sol, mumbare abene wuyulu musamu wu Nzambi.

⁸ Te Elimase ngaange misoku aginzeme ve pwasawu mumbare aseroonde re Sergyuse Poluse asiingi mabigu ma Nzambi. Bisi diloongu di greke batsitsenge Bar Sesu re Elimase.

⁹ Ne vane, Sol wukatsitsu keke re Pol, wubasu ne Dinyunyi Disuungeme, amonige Elimase iswiisu,

¹⁰ ne ayambile yandi re: «Nyanyi yifutsi gi, yikadungimisi batu bootsu, mwaane mukolitsi, yisakaroondi maambu mootsu mamanyi! Diroonde di Fumu diyi disuungeme te yu yigonerekige dyo! Yisakesiisa!

¹¹ Ne mapape, yulu: Fumu agukilise yu, yigubile ne pafu ne yisakebelabe yiveele gi nyangu mu ma dikyesi.» Vane ne vane, miisu ma Elimase matsime ne abile keke gu diviseme: apaperenenge keke tselu tsyotsu mu bene mutu wumuyenze.

¹² Ve labe Yivuunde Sergyuse Poluse dyaambu divyoge, asiinge Nzambi, agibeme mu musamu wu Fumu wuyulu yandi.

Pol ne Barnabase gu Antyose gu tseengi yi Pisidi

¹³ Pol yane bambaatsi baandi bapeke mu dibatu gu Pafos muyende gu Persé gu tseengi yi Panfili. Vane re ve yagene Sa Mark nawu ne agabuge gu Serusalem.

¹⁴ Baburuge gu Persé mu tsi ne bapule gu Antyose gu tseengi yi Pisidi. Wisi wukaloogu, banyingene gu ndagu disaambulu yi Basifu ne batsagele.

¹⁵ Ve yulu wumane wurange migaande mi migage ne mi babigitsi, bivuunde bi ndagu disaambulu bayambile Pol ne Barnabase re: «Baane ba tayi, yenu ga dine dibigu di wugwaarise piti, sa yambilyanu.»

¹⁶ Pol ateleme, asiimbule googu ne ayambile re: «Batu ba Israel ne yenu bamosi badine kyere Nzambi, yulwanu!

¹⁷ Nzambi yi yitsuku gi Israel, asoole mikoku myetu ne afunise yitsuku gyene ve bile gyo gu bumweenyi gu Isipte, kere vane avatise gyo ne ngudyandi.

¹⁸ Akyele yawu mu magumi mamane ma bilime gu kumu.

¹⁹ Ve yulu vane agudise bitsuku tsaambu gu tseengi yi Kanaan ne aveege batseengi bene ga mukwanyi gu yitsuku gyetu.

²⁰ Maambu mene matsinge bebele ne kame tsiyine ne magumi maraanu ma bilime. Ve yulu vane, Nzambi aveege bivovi gu bakaage betu nguu ne mu dikyesi di mubigitsi Samyele.

²¹ Kere vane batombe maate, ne Nzambi aveege yawu Sawule, mwaane wu Kise, gu mbubi yi Besamin, wukume mu magumi mamane mabilime.

²² Ve burulu Sawule ve dinyaange, Nzambi aveege yawu David ga maate. Ayambile mu yandi re: “Matsedagise David mwaane Isayi: mutu wene akewuyelimine mu ditaase dyami, aguvage mootsu makeroonde me.”

²³ Gu dibure di David Nzambi asoole mutu wu wuyobule yitsuku gi Israel, nave gane yandi; mutu wene re Sesu.

²⁴ Sesu ne gineneruge, Sa aloonzenge musamu wulubuse batu ba Israel mu wukaluse bitsagilitsi byawu ne mu wubatusu.

²⁵ Ve mane Sa yisalu gyandi ayambile re: “Yenu dikataasi nde re, mande nyi? Masaandi wu yenu digonevingile. Te yulwanu: Agwitse ve yulwami, te masaandi nisi nguu mu wuburule mataambi mu byoru byandi.”

²⁶ Baane ba tayi, yenu dibure di Abaraam ne yenu bamosi badine kyere Nzambi, musamu wuyobulu wuwu wusindugu nde gu manenu.

²⁷ Re mu dyo, bisi Serusalem ne bivuunde byawu baseyabe wuyi Sesu, ne baseyulu bandoongi tsi babigitsi tsikarangu bawisi bootsu bakaloogu. Te ve veege yawu Sesu mbele, mabigu ma babigitsi masupugu.

²⁸ Nisi nasedile yawu polugulu yiwuveege yandi mbele yi difu, baleende Pilate re abokisi yandi.

²⁹ Ve mane yawu wusuupule maambu mootsu mateendu mu yandi, basundise yandi mu kurusu ne basunze yandi gu ngile.

³⁰ Te Nzambi afwangule yandi ve ganegare bafuumbi.

³¹ Mu mbili batsufu, Sesu atutugile yawu babakingenge naandi baande gu Galilé nguu ne gu Serusalem; yawu bane re babake bimweenyi byandi ne munyi ve wusu yitsuku gi Israel.

³² Yetu bene digonebagile yenu musamu wene wu munyi: wuganile Nzambi mikoku myetu.

³³ Asupule dyo mu yetu, baane bawu, nufwangule Sesu. Nave teendu dyo mu mugaande wu miimbu gu yibuku gi mubeyi re: “Yire mwaanami wu dibagele, ne munyi, mare tayagu.”

³⁴ Nzambi ayambile re afwangule yandi ve ganegare babafu mure akere begabugu gubole gu ngile. A yambile re: “Maguveege yenu myule miminyi ne mi ngyenze miganile me David.”

³⁵ Re disine dirungule wurange gu mbure yimosi re: “Yisakesiingise re me musalitsi wagu maboli gu ngile.”

³⁶ David, adyanze mu dikyesi dyandi naroonde Nzambi; ve yulu vane afu, averu ve mbare mikoku myandi ne nyurwandi yibole gu ngile.

³⁷ Te wufwangulu gu difu ne Nzambi, nyurwandi yisebole gu ngile.

³⁸ Baane ba tayi kagu yabanu re: mu Sesu, yenu diloonzu mu dyaambu diwusiingulu kokolu yi mabi. Kokolwene, yiserungule wudile yenu mu mugage wu Muyise.

³⁹ Mu yandi, wotsu wukevage gitu aguluunzu.

⁴⁰ Kagu, diraambile, mure maambu mateende babigitsi makererugile yenu:

⁴¹ “Moniganu, batu bange dileenze, bilanu digibe ne tsyemuganu! Mumbare vaki yenu monyu maguvage dyaambu disaketaase re diyi nungyenze, nisi mutu atsenyigule yenu dyo.”»

⁴² Ve vate Pol ne Barnabase gu ndagu disaambulu, batu baleende yawu mu wugabuge tsonu yi nzime gubeyambile yawu ke maambu ma musamu wene.

⁴³ Ve mane yawu yibeengunu, nzoku Basifu ne batu bamosi babasiinge wusaambile Nzambi Basifu balaande Pol ne Barnabase. Yawu bayambilenge nawu, bagwaarisenge yawu mu wukyelenge gitu gyawu ke mu Nzambi.

Pol ne Barnabase bagyelugu tselu yi babasaandi Basifu

⁴⁴ Tsonu yinzime mu wisi wukaloogu, gootsu batu bootsu ba divule babeengunu muyulu musamu wu Fumu.

⁴⁵ Ve labe Basifu pityene, babase ne ngusu; bakate page mu maambu mayambilenge Pol, ne baseenge yandi.

⁴⁶ Vane Pol ne Barnabase bayambile guga wome re: «Musamu wu Nzambi mbe wuloonzu mareege nde yenu. Te yenu digonebuse wo, kagu yenu digonesalugu re, disakedile monyu wu mubu ne mubu mu wutsagele ne Nzambi! Re disine yetu diguyende keke gu mbuge babasaandi Basifu.

⁴⁷ Labanu marumu yetu ne Fumu: “Matsesoole yu mu wubile ga yiveele gi bitsuku mure yikeloonzenge nguu ne guduke buloongu re Nzambi akayobuli.”»

⁴⁸ Ve yulu babasaandi Basifu mabigu mene, balabe wunyi. Bagitse Fumu mu maambu mandi. Bootsu babasoolu ne Nzambi mu wutsagele mubu naandi, basiinge Sesu.

⁴⁹ Musamu wu Fumu wudugulu museengi wene wotsu.

⁵⁰ Te Basifu basive bagyetu ba bikiti babasaambilenge Nzambi Basifu ne bivuunde bi divule. Batumbise dimbunge mu Pol ne Barnabase, ne bapunze yawu mu museengi wawu.

⁵¹ Babagele babeyi bakuremuse difufundu di mataambi mawu ne bayende gu Ikonyume.

⁵² Nane, balaanditsi ba Sesu gu Antyose babile babase ne yinyunge, ne Dinyunyi Disuungeme.