Bisalu bi Bakime 1 - Sangu: Isangu (snq) NT

Dinyunyi Disuungeme diganulu Bakime

¹ Yivuunde Tofile, mu mugaande wami wu mareege manyigule mootsu mavage ne maloonze Sesu baande ve dibaandu,

² nguu ne mu wisi wumake yandi gu yulu. Ne ginene make, Sesu aveege birumu byandi mu ngudi yi Dinyunyi Disuungeme gu bakime basoole yandi.

³ Ve yulu wulabe mbili maguge nguu ne gu difu, alabene ne bakime baandi. Aloonze yawu mbili biliimbe re ake monyu. Mu magumi mamane ma batsufu atutugilenge yawu nuyambilenge yawu maambu ma Bufumu bu Nzambi.

⁴ Wisi wumoosi, ve yanga Sesu ne bakime baandi, aveege yawu dirumu didi: «Diyaburugu gu Serusalem kwanga ne vakedile yenu ndagi yi Tate yimayambila yenu.

⁵ Sa abatisenge ne maambe, te yenu, mu ma pesu batsufu, digubatusu ne Dinyunyi Disuungeme.»

Sesu amake gu yulu

⁶ Ne vane, ve bile yawu bootsu ne yibeengunu ne Sesu, batombe yandi re: «Fumu, didi re dikyesi diketsakige yu maate makekume gu Israela?»

⁷ Sesu ayagule yawu re: Sage yenu badikerungule wuyabe magwere ne makyesi mumbare Tate yabene amane wuswekige mo ne dinyaange dyandi.

⁸ Te vakesunde Dinyunyi Disuungeme mu yenu, yenu digudile ngudi ne yenu di gubile bimweenyi byami gu Serusalem ne gu Sudé yotsu ne gu Samari nguu ne gu duke buloongu.

⁹ Ve mane Sesu wuyambile nane amake gu yulu, dibuungi diswege yandi ve miisu ma bakime, basebelabe yandi.

¹⁰ Ve siingena yawu numonige gu yulu ve yende Sesu, batu babeyi ne bidwaari bifuuge batutugile yawu.

¹¹ Bayambile yawu re: «Bisi Galilé, mugi yenu disegonesiise wumonige gu yulu? Sesu yiyi yimamake gu yulu ve miisu menu, agubegabuge munoongu wumoosi natselabe yenu amake.»

¹² Avavene bakime baburugu va mukoongu wu ba Olive, bayende gu Serusalem. Ditage dibile ke yirini gi digwere.

¹³ Ve pule yawu guune, bamake gu yirini gi yulu gi ndagu ndeki gu beengunwa yawu ne kale. Bile re: Pyere ne Sa, Sake ne André, Filip ne Tome, Batelemi ne Mati, Sake mwaane Alfé, Simu yironde yobule tseengyandi ne Sude mwaane Sake.

¹⁴ Bootsu ne ditaase dimoosi basaambilenge makyesi mootsu ne bagyetu ne Mari nguyi Sesu ne baane ba nguyi ba Sesu.

Matyas asoolu kime mukitigile Suda

¹⁵ Wisi wumoosi, batu babasiinge Sesu babile bebele ne kame ne magumi mabeyi ma batu. Pyere ateleme ve ganegarawu nuyambile re:

¹⁶ «Baane ba tayi, maambu mayambile Dinyunyi Disuungeme gu Migaande Mireele, bweedi re masupugi: Gu mune David, Dinyunyi Disuungeme diyambile kale mu dyaambu di Suda. Suda yene bile re muumbe wu mawusu mugabe Sesu gu batu babagaange yandi.

¹⁷ Nane Suda ne yandi abile ga yetu gu dikabu di bakime. Avagenge mudyanzu wumoosi netu.

¹⁸ Ne badole ba veegu yandi mu wugabe Sesu, asuumbe nuungi. Alage muru ne tsi, difumu dyandi ditubige ne misopu myandi myootsu mipusugu.

¹⁹ Batu bootsu ba Serusalem bayabe dyaambu dyene, re disine baluge nuungyene gu diloongu dyawu re Akeldama, divindugulu re, nuungi maluungu.

²⁰ Diteendu gu Mugaande wu Miimbu re: “Ndagwandi yibili banzaande, Guya tsagele mutu gu yo.” Dibeteendu re: “Mutu wumosi akitigili gu yisalu gyandi.”

^21-22 Kagu bweedi re mutu wusoolu gugare batu babakiingenge ne Sesu, baande wisi wu batusu yandi ne Sa kwanga ne ve make yandi gu yulu. Mutu wene aputegene netu mubile ga yimweenyi gi bufwangugulu bu Sesu.»

²³ Kere vane batelige babagele babeyi: Susefu ne Matyas. Susefu abile ne mine mamosi, Barsabase ne Sustus.

²⁴ Ve yulu vane batu babasiinge Sesu bavage disaambulu didi: «Fumu, yu wuyatsi mirime mi batu bootsu loonze yetu ve pwase babagele babeyi babe mutu wutsesoole yu,

²⁵ mure akekitigile Suda mu yisalu gi bukime gitsesaambule yandi muyende gu yitsige gitsesoole yandi.»

²⁶ Ve mane wusaambile yawu bavage yikanugu, ne gyo gisoole re Matyas wuputu gugare digumi di bakime ne kime moosi.