U-OBADIYA 1 - IsiNdebele 2012 Translation

Iimphorofido zaphambilini ezijamelene no-Edomu

¹ Isambulo saka-Obadiya Watjho nje uSomnini uZimami kumphorofidi ngo-Edomu: “Sizwe ilizwi elibuya kuSomnini ngombana isigijimi sathunywa ezizweni sathi, ‘Nambani sikhambeni siyokusahlela umuzi.’ ”

² Godu uSomnini wathi ngomphorofidi ku-Edomu: “Yelela, ngizakukwehlisa isithunzi unyazeke ezizweni.

³ Ukuzazi kwakho kukurhwalile, wena ohlala emipharwini yedwala, wakhe umuzi wakho esiqongolweni, wena ozitjela uthi, ‘Ngubani ongangihlakazela phasi?’

⁴ Nanyana indlwanakho ingaba phezulu njengeyedlanga, namkha ibe phezulu hlangana neenkwekwezi, ngizakuhlakaza khonapho.

⁵ “Lokha nakufika amasela ngendlini nabagongodi ebusuku, bathatha abakufunako kwaphela; kodwana wena uzakuhlangulwa. Lokha abavuni nabavuna esidiribeni batjhiya ambalwa; kodwana abantu bakwa-Esewu bazakukhuthuzwa koke;

⁶ amafa wabo afihliweko azakubhenyegululwa.

⁷ Boke abakhozi bakho bazakukghurumejela emkhawulweni; onokuthula nabo bakurhwale bebakubinde; onghwatha nabo bazakubekela isifu esihlakeni sakho.” Godu uSomnini wathi ngomphorofidi ku-Edomu: “Akukasi kuye!

⁸ Mhlokho mina Somnini ngizokutjhabalalisa iinhlakaniphi kwa-Edomu nokwazi entabeni yakwa-Esewu.” Kutjho uSomnini.

⁹ Temana, iintsitsirimba zakho zizakusatjiswa kuthi woke umuntu arhayilwe entabeni yakwa-Esewu. USomnini wathi: “Ngebanga lokubulala

Amabanga wokuhlunguphazwa kuka-Edomu

¹⁰ nelokobana ube nerawurawu phezu komfowenu uJakopo, uzokuba namatlhuwiso bewutjhabalaliswe isiphelani.

¹¹ Wajamela ncanye wabukela mhlana abaqhamuki bathumba ibutho lakaJakopo, namhlana abatjhili bafahla emasangwenakhe; namhlana baphosa ifumbe babelana ngeJerusalema. Wena-ke bewufana poro nabo.

¹² Bewungakameli ukarwe kubukela umfowenu mhlana asematjhweni, namkha uthabe mhlana kurhayilwa amaJuda, nanyana ube nomlomo omude mhlana kunamahlungu.

¹³ Bewungakameli ufahle emasangweni wabantu bami mhlana bavelelwe lilitjhwa, nanyana ukarwe kubukela ingozi kaJakopo mhlana avelelwe lilitjhwa, nanyana uhlangule ilifa lakhe mhlana avelelwe lilitjhwa.

¹⁴ Bewungakameli ukuqamulela abaphunyurhileko nababaleka ngeendlela zamakhondlo ubatjhabalalise, nanyana ubakhaphele ezitheni mhlana basemahlungwini.

¹⁵ “Ngambala, ilanga lakaSomnini selitjhidele ezizweni zoke. Lokho okwenzileko kuzakwenziwa nakuwe, uzakubethwa ngezakho.”

Ukubuyiselwa kombuso ka-Israyeli

¹⁶ “Njengombana nina bantu bakaJakopo nirhamule ikapho yomhlonyani entabenami ecwengileko nje; yeke nezizwezi zoke nje zizayirhamula mndundu. Zizakurhamula zirhubule kube ngathi azange khezibe khona phambilini.

¹⁷ “Kodwana entabeni yeZiyoni kuzakuba nerholo lokuphephela; intaba le izakuba ngecwengileko, kuthi indlu kaJakopo izuze inarha eyayilobako.

¹⁸ “Indlu kaJakopo izakuba mlilo, kuthi yakaJosefa ibe lilangabu, kodwana yaka-Esewu yona izakuba mawunguwungu; yeke bazayithungela ngomlilo itjhe thokgho. Akuzokuba khona ophunyurhako endlini ka-Esewu.” Ngambala watjho njalo uSomnini.

¹⁹ “Abantu besewula yakwaJuda bazazithumbela iintaba zakwa-Esewu, kuthi abasemibundwini engeTjingalanga bazithumbele inarha yamaFilista. Abantu bakwaJuda bona bazazithumbela amasimu wakwa-Efrayimu neweSamariya ngeTlhagwini. UBhenjamini yena azithumbele iGiliyadi ngePumalanga.

²⁰ Isiqhema sabathunjwa bakwa-Israyeli sizokuthumba inarha yamaKanana bekube seSerafadi ngeTlhagwini. Abathunjwa beJerusalema baseSefaradi bazakuthumba amadorobho angesewula.

²¹ Abahlengi bazakukhuphukela entabeni yeZiyoni ukuze babuse iintaba zakwa-Esewu. Umbuso uzokuba ngowakaSomnini.”