U-ISAYA 9 - IsiNdebele 2012 Translation

¹ Akuzokuba nokuphunyurha kilabo ababambeke ebumnyameni ngesikhatheso. Eenkathini ezadlulako wathobisa inarha yakwaZebuloni neyakwaNafthali, kodwana esikhathini esizako uzakuhlonipha iGalile labezizwe endleleni eya elwandle ngaphetjheya kweJordani.

UZimu uletha ukukhanya ebumnyameni

² Abantu abakhamba ebumnyameni babone ukukhanya okukhulu, kilabo abahlala enarheni yethunzi elesabekako ukukhanya kwakhanya phezu kwabo.

³ Sewusikhulisile isizwe, wandisa nokuthaba kwaso, sijabulile phambi kwakho njengokujabulela isivuno, iye, nanjengabantu abajabulako nababelana ipango.

⁴ Mbala, njengamhlana kuhlulwa iMidiyani, uliphohlozile ijogi elidisibeza isizwe, okulibhoko elivundle emahlombaso, iye, intonga yabatjhotjhozeli baso.

⁵ Elinye nelinye inyathelo lejoni elibhaduza ngetjhada nenaka lalo elichaphazelwe ziingazi lizakutjhiswa lidliwe mlilo.

⁶ Mbala, sibelethelwe umntwana, siphiwe indodana. Umbuso uzakuba semahlombayo, izakubizwa bona nguMlulekimmangalisi, uZimumandla, uBabasiphelani noKosikuthula,

⁷ ukuze umbuso wenabe nokuthula kungapheli esihlalweni sakaDavida nembuswenakhe. Izawunzinzisa ngokuwusekela ngobulungiswa nokulunga ukusukela ngesikhathesi bekube nini nanini. Itjisakalo kaSomnini uMninimandlawoke izakuphelelisa koke lokhu.

Uzimu uhlunguphaza ama-Israyeli

⁸ USomandla uthumele umlayezo kuJakopo, wona wehlela kuma-Israyeli.

⁹ Soke isizwe, okutjho u-Efrayimu nabahlali beSamariya, bazizwela wona, kodwana ngokuziphakamisa nokuzikhakhazisa kwehliziyo bathi:

¹⁰ “Iintina ziwele phasi, kodwana sizakwakha ngamatje abaziweko; imithi yamakhiwani igawuliwe, kodwana sizayijamiselela ngemithi yemisedari.”

¹¹ Nje-ke uSomnini wandise izitha zakaRetsini bona zijamelane nama-Israyeli, watlhorholoja namanaba wawo,

¹² okutjho ama-Aramu ngepumalanga namaFilista ngetjingalanga. Wona agomojela u-Israyeli! Kikho koke lokho ubukhali bakaSomnini akhange busuke nesandla sakhe sahlala siphakamile.

¹³ Khonapho abantu akhange babuyele kobabethileko begodu azange bafune uSomnini uMninimandlawoke.

¹⁴ Yeke uSomnini waqunta u-Israyeli ihloko nomsila, wamhluba iimpiko.

¹⁵ Ihloko yaka-Israyeli baphathi neenkhulu, umsila kube baphorofidi abafundisa amanga.

¹⁶ Iye, abarholi babantwaba bayabalahla nebegade badinga ukuhlahlwa bebakakamele.

¹⁷ Ngebangelo uSomandla akhange athabe ngamasokanabo, begodu azange arhawukele ntandani namhlolokazi. Mbala, soke isizwe besinganaZimu, siziingilamkhuba nemilomo yoke ikhuluma ubudlhayela. Kikho koke lokho ubukhali bakaSomnini akhange busuke nesandla sakhe sahlala siphakamile.

¹⁸ Ubukhohlakali buvutha njengomlilo, buqothula iminga nameva, butjhisa isithurha kube sikhatha sentuthu ekhuphukako.

¹⁹ Ngobukhali bakaSomnini uMninimandlawoke inarha izakuba libhudu nabantu bafane neensahlela zomlilo. Akuzukuba namuntu obabalela wakwabo.

²⁰ Barhiribidela ngesidleni, kodwana baba nephango, badla ngesinceleni, kodwana banganeliseka. Iye, omunye nomunye wadla umfowabo:

²¹ UManase wadla u-Efrayimu no-Efrayimu wadla uManase, bobabili njalo bebajamelene noJuda. Kikho koke lokho, ubukhali bakaSomnini akhange busuke nesandla sakhe sahlala siphakamile.