U-ISAYA 8 - IsiNdebele 2012 Translation

UZimu uhlunguphaza abangamethembiko

¹ USomnini wathi kimi: “Thatha isithetjhelele esikhulu utlole kiso ngokunghwara okujayelekileko bunje: Hlangula masinyana, uphange ngokurhaba.

² Ngibize u-Uriya umphristi noZakariya umsa kaYebherekiya bonyana bangifakazele ngokuthembekileko.”

³ Yeke ngangena umphorofidikazi, wazithwala wabeletha umsana. USomnini wathi kimi: “Mthiye ibizo bona nguMhlangulimsinyana-Mphangingokurhaba.

⁴ Phambi kobana umsanyana akwazi ukuthi ‘Babami’ namkha ‘Mmami’, umnotho weDamaseku nepango yeSamariya kuzakusiwa ekosini ye-Asiriya.”

⁵ USomnini wakhuluma nami godu wathi:

⁶ “Abantwaba bale amanzi weTjhilowarhi ageleza kabuthaka ngombana baphela amandla ngebanga lakaRetsini nomsa kaRemaliya,

⁷ ngalokho-ke uSomandla sele azobehlisela iinkhukhula ezinamandla zeYufrathe, okutjho ikosi ye-Asiriya nabahloniphekileko bayo boke. Izakuphakama ngaphezu kwawo woke amasebayo, iphuphume ngehla kwawo woke amadongayo.

⁸ Izakukhiphizela iphalalele kwaJuda, irhurhule ukufikela entanyeni. Ngambala, amaphethelo wamanzi azakunaba agcwale ububanzi benarhakho, wena Imanuweli!”

⁹ Abantu bathi: “Lokha nanirhahlawulako nina zizwe, nizokukhena! Lalelani nina bantu abasemaphethelweni wenarha: Nanizilungiselela ipi, nizokukhena! Iye, nanizilungiselela ipi, nizokukhena ngiyanitjela!

¹⁰ Ningalumbisana amano, kodwana azakufeleliswa! Nanyana ningathiyisana amaqhinga, anizukuphumelela ngombana uZimu unathi.”

¹¹ Kodwana nakhu okwatjhiwo nguSomnini kimi lokha isandla sakhe esinamandla nasingivimba kobana ngingalandeli imikghwa yabantwaba:

¹² “Ningase senivume isivumelwano njalo nje lokha abantwaba nabathi, ‘Asenzeni isivumelwano!’ Abakwesabako ningakwesabi, ningabi nevalo ngakho.

¹³ USomnini uMninimandlawoke, akabe nguye yedwa ocwengileko kini. Yena akabe kukwesaba kwenu nevalo lenu.

¹⁴ Iye, uSomnini uzakuba yindawo ecwengileko yokuphephela, kodwana kizo zombili izindlu zakwa-Israyeli uzakuba lilitje elikhubako nedwala elibawisako. Ebantwini beJerusalema uzakuba sisifu nesithiyo.

¹⁵ Abanengi babo bazokukhutjwa, bawe bebaphuke; bazagadanga isithiyo babanjwe.

¹⁶ Songa ubufakazi obutlolilekobo, unamathelise isifundweso phambi kwabafundi bami.”

¹⁷ Ngizakulindela uSomnini ositheza ubuso bakhe endlini kaJakopo. Ngizakwethembela kuye.

¹⁸ Qala, ngilapha mina nabantwana uSomnini angiphe bona kobana babe matshwayo neembonakaliso kwa-Israyeli. Koke lokhu kubuya kuSomnini uMninimandlawoke ohlala entabeni iZiyoni

^19-20 ngombana abantu bazakuthi kini: “Phengulani ezangomeni nakilabo abanemimoya abahlebahlebako nabamumuruzako. Angithi abantu kufuze babuze ebezimini babo; iye, babuze isifundo nesiqiniseko kabafileko malungana nabaphilako.” Nakube abantu abakhulumi okukhambisana nesiphorofidwesi esingeze saqedwa amandla ngomlingo

²¹ bazakuzulazula ngedorobheni badanile begodu balambile. Lokha nasele banephango, bazakubhoka ngobukhali bathuke ikosabo nabezimu babo. Bazakuthalaza phezulu

²² bafunafune phasi, kodwana kuzakuba kukhungatheka nobumnyama bodwa phezu kwabo. Bazakuqotjhwa basakhungathekile begodu basemnyameni, ngaphandle komkhanyo.