U-ISAYA 7 - IsiNdebele 2012 Translation

Ipi hlangana no-Israyeli noJuda

¹ Ngesikhathi saka-Arhazi, umsa kaJotamu omsa ka-Uziya ikosi yakwaJuda, uRetsini ikosi ye-Aramu noPhekharhi umsa kaRemaliya, ikosi yakwa-Israyeli, bajokola bakhuphuka bona balwe neJerusalema, kodwana akhange bakghone ukuyisahlela.

² Lokha indlu kaDavida nayitjelwako, kwathiwa, “i-Aramu iqheme no-Efrayimu”, u-Arhazi nabantu bakhe bahlengezela ngevalo kwanga mimithi yehlathi lokha nakunommoya.

³ Nje-ke, uSomnini wathi ku-Isaya: “Phuma wena nendodanakho uTjheyari-Yatjhubi nihlangabeze u-Arhazi ngemaphelelweni womsele ovela esizibeni esingehla, endleleni eya endaweni lapha kuhlanzwa khona iimpahla.

⁴ Ufese uthi kuye, ‘Yelela, wehlise ummoya, ungesabi begodu ungadani ngenca yemitshwinya emibili yeenkuni nangebanga lobukhali obuvuthako bakaRetsini we-Aramu nomsakaRemaliya.

⁵ Iye, ungesabi i-Aramu, u-Efrayimu nomsakaRemaliya abakusongela ngokuthi:

⁶ Asikhuphukeleni kwaJuda, asethuse iJerusalema, sizihlulele yona besenze nomsa kaThabiyali abe yikosi khonapho.

⁷ Nakhu okutjhiwo nguSomandla, uSomnini: Lokho akuzukwenzeka, abe akuzukuphumelela,

⁸ ngombana ihloko ye-Aramu seyiDamaseku nehloko yeDamaseku seyiRetsini kwaphela. (Ngeminyaka ematjhumi asithandathu nahlanu, u-Efrayimu uzabe asele asabalele khulu kobana angaba sisizwe.)

⁹ Ihloko ye-Efrayimu seyiSamariya nehloko yeSamariya seyindodana kaRemaliya kwaphela. Nawungajami uqine ekukholweni kwakho, vele awusoze wajama.’ ”

Isibonakaliso ngo-Imanuweli

¹⁰ USomnini wakhuluma no-Arhazi godu wathi:

¹¹ “Bawa isibonakaliso kuSomnini uZimakho, kungaba phasi ekuzikeni nanyana phezulu ekuphakameni.”

¹² Kodwana u-Arhazi wathi: “Angizukubawa, abe angizukulinga uSomnini.”

¹³ Yeke u-Isaya wathi: “Lalela la wena ndlu kaDavida! Akukaneli kanti ukukhola umuntu kobana ningabeze nikhole uZimami godu na?

¹⁴ Ngalokho-ke, uSomandla ngokwakhe uzonenzela isibonakaliso: Qala, iqhakazana lisidisi, lizakubeletha indodana, liyithiye ibizo bona ngu-Imanuweli.

¹⁵ Izakudla amakghamatha namanembe bekufike lapha yazi khona ukuhlukanisa okuhle nokumbi.

¹⁶ Kodwana ngaphambi kokobana indodana yazi ukwahlukanisa okuhle nokumbi, inarha yamakhosi amabili owesabako lawo izabe sele itjhiyiwe.

¹⁷ USomnini uzakuletha phezu kwakho, Arhazi, naphezu kwabantu bakho nendlini kayihlo, isikhathi esingazange khe sibe khona kusukela lapha u-Efrayimu ahlukana khona noJuda, okutjho ikosi ye-Asiriya!”

¹⁸ Mhlokho uSomnini uzakubetha ipembe abize iimpukani emaphethelweni wemilanjana yeGibhide neenyosi ezisenarheni ye-Asiriya.

¹⁹ Zizakubuya zoke zibuthane emirhobeni yamawa nemipharwini yamadwala, phezu kweminga yoke nemithonjeni yoke yamanzi.

²⁰ Mhlokho uSomandla uzakusebenzisa utjhefana oqatjhwe ngaphetjheya kweYufrathe, okutjho ikosi ye-Asiriya, agude ngaye imizimba yenu yoke. Iye, utjhefana loyo uzakususa neendevu zenu.

²¹ Mhlokho umuntu uzakufuya ithokazi, imbuzi nemvu.

²² Ngebanga lobunengi bebisi uzakudla amakghamatha. Iye, boke abasele enarheni bazakudla amakghamatha namanembe.

²³ Mhlokho, kiyo yoke indawo lapha bekuneenkulungwana zamadiribe abiza iinkulungwana zeempaparwana zesiliva, kuzakuba khona iminga nameva.

²⁴ Umuntu uzakuya lapha aphethe umsebe nemisubela ngombana yoke indawo izakuba miminga nameva.

²⁵ Emibundwini yoke eyakhe yahlawulwa ngelembe, akusazokuyiwa kiyo ngokwesaba iminga nameva. Izakuba yindawo yokukghaphela iinkomo, lapha izimvu zizazikhambela khona umathanda.