U-ISAYA 6 - IsiNdebele 2012 Translation

U-Isaya ubekwa njengomphorofidi

¹ Ngomnyaka okwahlongakala ngawo ikosi u-Uziya, ngabona uSomandla ahlezi esihlalweni sobukhosi esiphezulu nesiphakamileko; nomphetho wephuraphurakhe ugcwele ithempeli.

² Amaserafu bekaphephezela ngehla kwakhe, kungilelo nalelo lineempiko ezintandathu: Ngeempiko ezimbili gade azivale ubuso, ngezimbili iinyawo, ngezimbili aphapha.

³ Gade arhuwelelana wodwa, elinye nelinye lithi: “Ucwengile! Ucwengile! Ucwengile uSomnini uMninimandlawoke! Iphasi loke ligcwele iphazimulwakhe!”

⁴ Ngomdumo wamezwawo kwagedlezela imikhonywana yomnyango nethempeli lagcwala intuthu.

⁵ Ngalila ngathi: “Maye mina, ngiphelile! Ngimumuntu weembhena ezisilapheleko begodu ngihlala phakathi kwabantu abanemilomo esilapheleko. Nanyana kunjalo amehlwami ayibonile iKosi, uSomnini uMninimandlawoke!”

⁶ Yeke elinye lamaserafu laphaphela kimi liphethe ilahle elivuthako ebelilithethe ngedlawu e-alidarini.

⁷ Lafese lathinta umlomami ngelahlelo lathi: “Qala, njengombana lokhu sekuthinte iimbhena zakho, umlandwakho sewususiwe nezono zakho sezithethelelwe.”

⁸ Ngabese ngizwa ilizwi lakaSomandla lisithi: “Ngizakuthuma bani? Ozasiyela ngubani?” Ngaphendula ngathi: “Mina ngikhona, thuma mina!”

⁹ Wathi: “Khamba ufese uthi ebantwinaba, ‘Lalelani njalo abaphorofidi bamanga kodwana anizukuzwisisa! Yelelani njalo imibonwabo kodwana anizukulemuka!’

¹⁰ Yenza ihliziyo yabantwaba iyathe neendlebe zabo zibe buthuntu uphophaze namehlwabo ukuze bangaboni ngawo, bezwe ngeendlebe zabo, balemuke ngeenhliziyo zabo bebaphenduke bese bayaphiliswa.”

¹¹ Yeke ngabuza ngathi: “Bekube nini, Somandla na?” Yena wathi: “Bekube kulapha amadorobho aba marubhi khona, kungasahlali muntu, izindlu zisale zinganabantu nenarha ibe mrhula.

¹² Iye, bekube kulapha uSomnini asuse khona abantu, bube bukhulu ubuze bokutjhiywa kwenarha.

¹³ Ngitjho nanyana enarheni kusele itjhumi ekhulwini, nalo lizakuqothulwa godu. Kodwana njengomuthi we-owuku namkha omunye nomunye omkhulu otjhiya isiphunzi nawugawuliweko, ngokunjalo kuzakusala isiphunzi okutjho isizukulwana esicwengileko.”