U-ISAYA 5 - IsiNdebele 2012 Translation

UZimu uzakuhlunguphaza abantu bakhe

¹ Angivume ingoma esikhundleni somnganami, iye, ingoma yomnganami ngesidiribe sakhe. Umnganami gade anesidiribe embundwini onothileko.

² Wawemba, wasusa woke amatje kiwo, wawutjala isidiribe esikhethekileko. Wakha isithala somlindi phakathi kwawo bewagobhodlha ubutlhodlhelo edwaleni. Walindela bona sihlome amadiribe kodwana sahloma amunyu wommango.

³ Nje-ke uSomnini uthi: “Nina zakhamuzi zeJerusalema nani bantu bakwaJuda, gwebani hlangana nami nesidiribe sami.

⁴ Yini-ke, okhunye ebengingakwenza ngesidiribe sami ukudlula lokho esele ngikwenzileko na? Kubayini ngithi lokha nangilindele bona sihlome amadiribe, sona sihlome amunyu na?

⁵ Nje-ke, ngizonitjela bona ngizokwenzani ngesidiribe samesi: Ngizokususa isibiyelo saso bona sidliwe; ngigirize nomthangalaso bona sirathwe.

⁶ Ngizosenza bona sibe libhudu, singasahlungwa namkha sihlawulelwe, kukhule iminga nameva; ngizokuyala namafu bona angasanisi izulu phezu kwaso.”

⁷ Isidiribe sakaSomnini uMninimandlawoke siyindlu ka-Israyeli, nabantu bakwaJuda basitjalo sakhe esikhethekileko. Walindela ubulungiswa, kodwana qala, kwaba kukwephulwa komthetho walindela ukulunga, kodwana qala, kwaba sililo sesizi.

⁸ Nizazizwa nina enithumba izindlu ngezindlu, niphange isimu phezu kwamasimu bekungasabi nendawo eseleko, kusale nina nodwa phakathi nenarha.

⁹ Ngimzwile uSomnini uMninimandlawoke afunga athi: “Ngiqinisile izindlu ezinengi zizokuphenduka amarubhi, kuthi ezikulu nezihle zisale zinganabantu.

¹⁰ Mbala, emasimini alitjhumi wesidiribe kuzakuphuma imigqomu emibili yewayini kwaphela nembewini engangentundu eyodwa kadumbana kuphume upumpana wamabele kwaphela.”

¹¹ Bazazizwa labo abavuka ngamasa, bagelagele ngemva kotjwala; bahlale bekube sebusuku, bafuthunyezwe liwayini.

¹² Eminyanyenabo kukhona imihlobohlobo yamaharibha, abosotjherere, iinghwani kanye newayini; kodwana izenzo zakaSomnini abaziyeleli nemisebenzi yezandla zakhe abayitjheji.

¹³ Ngalokho abantu bami bazakuthunjwa ngebanga lokutlhoga ilwazi lakaSomnini. Abahloniphekako babo bazokufa yindlala neenqubuthu zabo zizakuphaphatheka kukoma.

¹⁴ Iye, indawo yabafileko seyikhamise umlomayo beyawukhebelelisa ngokunganeliko. Abahloniphekako neenqubuthu zeJerusalema, labo abenza itjhada lokuzikhakhazisa, bazakwehlela kiyo.

¹⁵ Ngaleyondlela abantu bazakuthotjiswa, omunye nomunye wabo arhubutjhwe, iye, amehlo wabazikhakhazisako athotjiswe.

¹⁶ Kodwana uSomnini uMninimandlawoke uzakuphakanyiswa ngomthethwakhe, uZimu ocwengileko azibonakalise ngokulunga kwakhe.

¹⁷ Iimvana zizakudla emadlelwenazo, izimvu ezinonisiweko zizidlele umathanda hlangana namarubhi.

¹⁸ Bazazizwa labo abazidosela isibetho ngemitja yekohliso nesono njengomuntu odosa ikoloyana ngentambo;

¹⁹ iye, labo abathi: “UZimu akarhabe, enze umsebenzakhe masinyana bona siwubone; ilisu loCwengileko wakwa-Israyeli alivele, ukuze nathi silazi.”

²⁰ Bazazizwa labo abathi ukonakala kulunga, ukulunga kukonakala, abenza ukukhanya inga bumnyama, ubumnyama inga kukhanya, ukubaba inga bumnandi, ubumnandi inga kubaba.

²¹ Bazazizwa labo abahlakaniphileko emehlwenabo nabazibona banokwazi ekuboneni kwabo.

²² Bazazizwa labo abaziingwenya zokusela iwayini neenkutani zokudidiyela utjwala,

²³ labo abatjhaphulula onomlandu ngokufunjathiswa bagodle ilungelo labalungileko.

²⁴ Ngebangelo-ke, njengamalangabi womlilo naqothula amawunguwungu nanjengotjani obomileko nabubabulwa malangabi, ngokunjalo imirabhabo izakukhuna namakhwa wabo aphephuke njengethuli; ngombana badele umthetho kaSomnini uMinimandlawoke banyaza amezwi woCwengileko wakwa-Israyeli.

²⁵ Nje-ke, ubukhali bakaSomnini buyavutha ebantwini bakhe; uzakuphakamisa isandla sakhe abarhadle phasi, bekuhlengezele iintaba. Iindumbu zabo zizakufana neenzibi eendledlaneni. Nangaphezu kwakho koke lokhu ubukhali bakhe abuzukusuka, isandla sakhe sizakuhlala siphakamile:

²⁶ Uzakuphakamisela izizwe ezikude iphawu, abethe ipembe, abize isizwe esisepelazwe, size masinyana nangokurhaba.

²⁷ Akakho namunye kiso odinwako namkha okhutjwako, akakho oyendako namkha alale; akunabhande elitjhaphulukako edinini nepatlagwana elinomtjana odabukako.

²⁸ Imisubela yaso ibukhali nemisebaso yoke iqutjhiwe, iinqatha zeenjomani zaso zikghwara njengelitje lomlilo, amavili weenkaranyana zaso afana nesivunguvungu.

²⁹ Umdumaso unjengokubhodla kwebhubezi, sirora njengamabhubezana, sirhonga bese sibamba inyamazana, siyithwale kusweleke nomenyeli.

³⁰ Mhlokho sizakurora ngaphezu kwayo njengokubhodla kwelwandle. Lokha umuntu naqala enarheni abone ubumnyama namatlhuwo; ukukhanya kuzakuphiphazwa mamafu.