U-ISAYA 41 - IsiNdebele 2012 Translation

UZimu usiza u-Israyeli

¹ UZimu uthi: “Lalelani buthula, nina nhlengele nezizwe! Abosingazimu abavuselele amandlabo! Abavele etjhatjhalazini bakhulume. Asihlanganeni ekugwebeni:

² Ngubani ovuse omunye epumalanga ukuze aphumelele noma kuphi lapha ayakhona na? Ngubani owethula izizwe kuye avume bona athobise amakhosi na? Isabulakhe izibhuquze zibe lithuli umsebakhe uzihlakaze njengamawunguwungu.

³ Uzigijimisa begodu aragele phambili kunganasithiyo iinyawo zakhe zijubalale.

⁴ Ngubani owenze nobangele lokhu nolawule iinzukulwana kusuka ekuthomeni na? Ngimi, mina Somnini osithomo nekupheleni ngikhona.

⁵ Iinhlengele zikubonile lokho zesaba nepelazwe yathuthumela. Zaphumela etjhatjhalazini, zahlangana;

⁶ omunye asekela omunye ngokuthi, ‘Qina amandla!’

⁷ Usosino ugqugquzela umkhandigolide, loyo oliqandula ngenondo ugqugquzela osebenza ngenonjwana athi, ‘Maye, sihle isipaparu segolide osihlanganisako!’ Nje-ke, bakokodele ngeenkhonkhwani isithombesibazwa ukuze singaketuki!

⁸ “Kodwana wena Israyeli, ncekwami, wena Jakopo, engikukhethileko, sizukulwana somnganami u-Abrahamu,

⁹ ngakugugudlhela usemikhawulweni yephasi, ngakubiza usemajukujukwini. Ngathi kuwe, ‘Uyincekwami, ngikukhethile, akhange ngikulahle.’

¹⁰ Nje-ke ungesabi ngombana nginawe, ungethuki ngombana nginguZimakho. Ngiyakuqinisa bengiyakusiza, ngikugugudlhele ngesidla sami sokuphumelela.

¹¹ Qala-ke, boke abakubhavumulelako bazakudana bebarhubutjheke; labo abakusozisako bazakuba lilize, babhubhe.

¹² Uzakufunana nabajamelani bakho, kodwana angeze ubafumane; iye, labo abalwisana nawe bazakuba lilize lakolize

¹³ ngombana nginguSomnini, uZimakho, oqinisa isandla sakho sokudla, othi kuwe, ‘Ungesabi, mina ngokwami ngiyakusiza.’

¹⁴ Ungesabi, wena pethu, Jakopo, wena Israyeli olidlanzana, ngimi ngokwami okusizako. Utjho njalo uSomnini, umhlengakho ongoCwengileko wakwa-Israyeli.

¹⁵ Qala, ngizakwenza ube sileyi sokubhula esibukhali, esitjha nesinamazinyo amanengi. Uzakubhula iintaba, uzitshidlhe, wenze imibundu ibe ngathi mawunguwungu.

¹⁶ Uzakwela izitha, ummoya uziphephethe, isiwuruwuru sizihlakaze. Kodwana wena uzakuhlokoma kuSomnini bewuzikhakhazise ngoCwengileko wakwa-Israyeli.

¹⁷ “Abachakileko nabadududu bazumana namanzi, kodwana kudududu; amalimabo athe kere ngokoma. Mina Somnini ngizabaphendula, iye, uZimu wakwa-Israyeli angeze abalahla.

¹⁸ Ngizakwenza imilambo igeleze emibunjwaneni enganalitho neeyalu emirhuleni. Ngizakuguqula irhalawumba libe sitete negagadu lehlabathi libe mithombo.

¹⁹ Ngizakumilisa erhalawumbeni imisedari, imithi yomunga, yemiritlili neye-oliva; ngimilise ebhudwini imithi ye-elimu nemihlobohlobo yemisayipurusi ndawonye

²⁰ ukuze abantu boke babone, bazi bebacabangisise begodu balemuke bona sisandla sakaSomnini esenze lokhu; iye, oCwengileko ka-Israyeli ukudalile lokho.”

Ukuphoqwa kwabosingazimu

²¹ USomnini uthi: “Lethani indabenu!” Iye, iKosi kaJakopo ithi: “Bekani iinqiniseko zenu!

²² Abosingazimu benu abalethwe etjhatjhalazini khebazosibikela bona kuzokwenzakalani. Nina bosingazimu, izinto zekadeni beziyini? Zibikeni ukuze zicatjangisiswe, kwaziwe umphumela wazo. Namkha akhe sizwe ngezinto ezizako!

²³ Yenisibikele bonyana ikusasa linjani ukuze sikghone ukutjho bona mbala nibozimu. Akube nesiga enisenzako ukuze sethuke, sesabe soke.

²⁴ Ngambala, anisililitho kokuba lilitho begodu nemisebenzenu ililize lakolize! Umuntu onikhethako usikghabhudlho!

²⁵ “Ngivuse omunye ngetlhagwini, nje-ke uyeza ngepumalanga ubizwa ngebizo lakhe nje-ke usendleleni. Uzakugadanga phezu kweenkhulu inga zilidaka iye, njengombumbi nabhica umdaka.

²⁶ Nina bosingazimu, ngubani wenu owabika ngalokho ekuthomeni ukuze sazi; iye, kusukela phambilini bona singathi, ‘Ngambala, uqinisile’ na? Awa, akunanoyedwa wenu owabikako, azange kubekhona nonomkhosi ngalokho, azange bekube nomuntu ozwa amezwenu.

²⁷ Ngubani owaba ngewokuthoma ukubikela iZiyoni wathi, ‘Qalani, napaya bayeza’ na? Ngubani owabikela iJerusalema wathi, ‘Ngikwenza isithunywa seendaba ezihle’ na?

²⁸ Ngaqala ngapha nangapha kodwana azange kube noyedwa ophendulako! Phakathi kwabosingazimu khona-ke? Awa, azange babe ngitjho nomeluleki ebe ngingambuza kobana ngaye ngifunyane igama kibo.

²⁹ Mbala, boke bayikohliso! Izenzo zabo zililize lakolize, imifanekiswabo imumoya nelize.”