U-ISAYA 4 - IsiNdebele 2012 Translation

¹ Mhlokho abafazi abalikhomba bazakunamathela endodeni yinye, bathi kiyo: “Thina sizozondla ngokudla kwethu besizembathise; into nje, sibawa bona sibizwe ngesibongo sakho, ususe ukurhubutjhwa kwethu.”

Kuzakuba nabasindileko eZiyoni

² Mhlokho ihlumela lakaSomnini lizakuba lihle liphazime neenthelo zenarha zibe ligugu nedumo labasindileko kwa-Israyeli.

³ Labo abatjhiywe eZiyoni, abaseleko eJerusalema, bazakubizwa bona ngabacwengileko, iye, omunye nomunye eJerusalema obekatlolwe kobana aphile.

⁴ Lokha uSomandla nasele ahlangule amanyala wamadodakazi weZiyoni, wahlanza amabala weengazi zeJerusalema ngaphakathi kwalo ngommoya wokugweba nokuqothula,

⁵ uzakudala ilifu emini nesikhatha esinelangabi elibomvu ebusuku phezu kwayo yoke indawo yentaba yeZiyoni, lapha abantu bahlanganyela khona. Iphazimulwakhe izakuba sithala phezu kwakho koke,

⁶ kube njengesidalasi esenza umthunzi ekutjhiseni kwemini nobuphephelo bokubalekela isiwuruwuru nezulu.