U-ISAYA 3 - IsiNdebele 2012 Translation

Ihlangahlangano eJerusalema

¹ Qalani, uSomandla onguSomnini uMninimandlawoke sewuzokususa eJerusalema nakwaJuda okwabiwako nokudzinyelelwe kikho; iye, koke okwabiwako kokudla nakho koke kwamanzi:

² itsitsirimba nejoni, umgwebi nomphorofidi, isangoma nomphathi,

³ induna yamatjhumi amahlanu kanye nesikhulu, umeluleki nosoziga ongumakadebona kanye nosomlingo onobuhlakani.

⁴ USomnini uthi: “Ngizakwenza abesana babe makhosanabo neenhlanganahloko zizakubusa phezu kwabo.

⁵ Abantu bazakugandelelana: umuntu ajamelane nomuntu, iye, umuntu ajamelane nomnganakhe. Ilutjha lizakuvukela abadala, abangazisiko bavukele abahlonitjhwa.

⁶ Umuntu uzakugugudlhela umfowabo endlini kayise athi, ‘Wena unephuraphura, yiba mbusethu, lawula nanti iqubi lamawiliwili!’

⁷ Kodwana mhlokho yena uzakurhuwelela athi, ‘Anginapengu! Ngiswele ngitjho ukudla nezambatho endlinami; yeke, musani ukungenza umbusi wabantu.’

⁸ “Mbala, iJerusalema ikhutjiwe, uJuda uwile. Ngamezwi nangezenzo bahlanuke uSomnini, badelela nobukhona bephazimulwakhe.

⁹ Ukukhetha kwabo ubuso ebandla kufakaza ngabo; njengeSodoma banegugu ngesono sabo abe abafihli. Bazazizwa ngombana bazehlisele ihlekelele!

¹⁰ “Babusisiwe abalungileko ngombana kuzabakhambela kuhle. Mbala, bazakudla iinthelo zezenzo zabo.

¹¹ Bazazizwa abakhohlakeleko ngombana kuzabakhambela kumbi. Mbala, bazakubethwa ngeentonga zabo!

¹² Abantu bami bagandelelwa bahlanguli abomatjhonisa babusa phezu kwabo. Bantu bami, abarholi benu babadukisi: Baphambanisa imizilenu.”

USomnini ulungele ukugweba

¹³ USomnini selazilungiselele umlandu, selebe asikimile bona agwebe isizwe.

¹⁴ USomnini ugweba abaphathi nabarholi babantu bakhe, uthi: “Ngini enidle isidiribe sami; okwetjiwe kwabachakileko kuseendlini zenu.

¹⁵ Nenzelelani bona nitshidlhe abantu bami nokobana nifihlize ubuso babachakileko na?” Watjho njalo uSomandla onguSomnini uMninimandlawoke.

¹⁶ USomnini uthi: “Ngebanga lokuzitjhaya kwamadodakazi weZiyoni akhamba elule iintamezi, aphayiza amehlo, akhambela phezulu, kuzwakala nobutjharhatjharha eenyaweni,

¹⁷ uSomandla uzokuhluthula iiyaya eenhloko zawo; iye, uSomnini uzokwenza iimpandla zawo zibe semtarini.

¹⁸ Mhlokho uSomandla uzowemuka imikghabiso: amatshega, amatikana, abonongoro,

¹⁹ amancina, abosotjherere, iiyaya,

²⁰ iindugu, abonomathalazana, amacutjana, imithambothi, amagolida,

²¹ iindzilamnwana ezinetshwayo, amasali wepumulo,

²² iindanda, iimphika, iimvunulo, iinkhwama zokuphathwa,

²³ izambatho ezikhanyelako, izambatho zangaphakathi, iindugu nemitshurhwana.

²⁴ Esikhundleni seenthako kuzakuba nesivunda; esikhundleni sekhiba kube mtletlana; esikhundleni somphotho kube liphandla; esikhundleni seengungu zethabo kube ziinzilo nesikhundleni sobuhle kube litshwayo lobukhoboka.

²⁵ “Wena Ziyoni, amadoda akuwe azakubulawa ngesabula, iintsitsirimba zakho zifele epini.

²⁶ Amasango weZiyoni azakulila abibitheke; libe dududu, lihlale phasi ehlabathini.”