U-ISAYA 21 - IsiNdebele 2012 Translation

Isiphorofido ngeBhabheli

¹ Isimemezelo sakaZimu ngebhudu elihlanu komlambo. Njengeemvunguvungu zangesewula eziza ngokudlhegana, ngokunjalo izitha zizakuza zivela erhalawumbeni, iye, zivela enarheni eyesabekako.

² Ngambulelwa amezwi anzima: “Umkhapheli uyakhaphela nomrhayili uyarhayila. Khuphukani ma-Elamu! Vimbezelani maMediya! Koke ukububula okubangwe yiBhabheli ngizakuphelisa.”

³ Ngalokho idini lami liyagedla ngisahlelwe ziinhlungu njengomfazi obelethako; ngiyabinyabinyeka ngebanga lalokho engikuzwako, ngikakamale ngalokho engikubonako.

⁴ Ihliziywami iyathukuza ngethuswa lithunzi elesabekako; ukuhlwa engikuthandako kuphenduke ukuthuthumela kimi.

⁵ Balungisa isithebe, bendlala iincabhana, bayagoma, bayasela. Sikimani nina nduna, nilungise iinhlangu

⁶ ngombana nakhu okutjhiwo nguSomandla kimi: “Khamba, ufese ubeke umlindi, amemezele lokho akubonako;

⁷ emini aqaphe iinjomani ezibotjhelwe eenkaraneni zepi namajoni akhwele abodumbana namakamela, ebusuku alalelisise kuhle.”

⁸ Yeke umlindi warhuwelela wathi: “Somandla, ngijame esithaleni sokulinda imini yoke, ngibekwe endawenami yokulinda ubusuku obunye nobunye.

⁹ Qala, nanguya umuntu asiza, ukhwele ikarana yeenjomani! Wabika wathi, ‘Iwile, ngithi iwile iBhabheli! Zoke iinthombembazwa, zabosingazimu bayo ziphahlazeke phasi!’ ”

¹⁰ Bantu bami abagadangiweko, iye, nina enibhuliweko, engikuzwe kuSomnini uMninimandlawoke, uZimu wakwa-Israyeli, ngikumemezela kini.

Isiphorofido ngeDuma

¹¹ Isimemezelo sakaZimu ngeDuma: Kunomuntu ongibiza aseSeyiri, uthi: “Mlindi-ke, ubusuku sele bukhambe kangangani? Mlindi-ke, ubusuku sele bukhambe kangangani?”

¹² Umlindi wathi: “Ukusa kuyeza bese kuyahlwa godu. Nanisafuna ukubuza, ningabuza; kodwana nibuye lokha godu.”

Isiphorofido nge-Arabhiya

¹³ Isimemezelo sakaZimu mayelana nerhalawumba: Nina milandelande yamaDedani nina enihlala eenthukghwini zerhalawumba ebusuku

¹⁴ lethelani owomileko amanzi. Nina bahlali benarha yeTema, hlangabezani abaphalali ngesikwa

¹⁵ ngombana babalekele iinsabula, iye, iinsabula ezirhwatjhiweko nemisebe equtjhiweko, iye, babalekele ukuwurubajwa yipi.

¹⁶ Ngambala nakhu okutjhiwo nguSomandla kimi: “Eminyakeni, njengeminyaka yesisebenzi esiqatjhiweko, loke idumo lakaKedari lizakunyelela

¹⁷ nemisebe eseleko yeengorho zamaKedari izakuba libinzana ngombana uSomnini uZimu wakwa-Israyeli ukhulumile.”